തിരുവനന്തപുരം: പൊതുവിഭാഗത്തിൽപ്പെട്ട റേഷൻ കാർഡുകൾ മുൻഗണനാ വിഭാഗത്തിലേക്ക് തരംമാറ്റുന്നതിനായി നാളെ മുതൽ ഓൺലൈൻ വഴി അപേക്ഷിക്കാമെന്ന് പൊതുവിതരണ ഉപഭോക്തൃകാര്യ കമ്മീഷണർ അറിയിച്ചു (Kerala priority ration card application). റേഷൻ കാർഡ് ഒഴിവാക്കൽ മാനദണ്ഡങ്ങളിൽ ഉൾപ്പെടാത്ത അർഹരായ കുടുംബങ്ങളുടെ നിലവിലെ പൊതുവിഭാഗം (വെള്ള, നീല) റേഷൻ കാർഡുകൾ പി.എച്ച്.എച്ച്. വിഭാഗത്തിലേക്ക് (PHH – പിങ്ക് കാർഡ്) മാറ്റാനാണ് അവസരമൊരുങ്ങുന്നത്. നാളെ (2026 ജൂൺ 27) മുതൽ അടുത്ത മാസം 17 (17/07/2026) വരെയാണ് അപേക്ഷകൾ സ്വീകരിക്കുക.
അർഹതയുള്ള കാർഡുടമകൾ ആവശ്യമായ അനുബന്ധ രേഖകൾ സഹിതം സംസ്ഥാനത്തെ അക്ഷയ കേന്ദ്രങ്ങൾ വഴിയോ അല്ലെങ്കിൽ സിറ്റിസൺ ലോഗിൻ പോർട്ടൽ (ecitizen.civilsupplieskerala.gov.in) മുഖേനയോ ഓൺലൈനായി അപേക്ഷകൾ സമർപ്പിക്കേണ്ടതാണ്. മുൻഗണനാ റേഷൻ കാർഡുകൾ ലഭിക്കാൻ നിയമപരമായി അർഹതയുണ്ടായിട്ടും നിലവിൽ മുൻഗണനേതര വിഭാഗത്തിൽ തുടരുന്ന സാധാരണക്കാരായ കുടുംബങ്ങൾക്ക് ഈ ഒരൊറ്റ അവസരത്തിലൂടെ ഇതിന്റെ പൂർണ്ണ പ്രയോജനം ലഭ്യമാകും. സമയപരിധിക്ക് ശേഷം ലഭിക്കുന്ന അപേക്ഷകൾ പരിഗണിക്കുന്നതല്ലെന്ന് സിവിൽ സപ്ലൈസ് വകുപ്പ് വ്യക്തമാക്കിയിട്ടുണ്ട്.
Story Summary:
Applications for converting non-priority (White/Blue) ration cards to the priority PHH (Pink) category can be submitted online from tomorrow until July 17, 2026. Eligible cardholders can apply via Akshaya Centres or through the official citizen login portal.
