ന്യൂഡൽഹി : ഇന്ത്യയിൽ അടിയന്തരാവസ്ഥ പ്രഖ്യാപിച്ചിട്ട് പതിറ്റാണ്ടുകൾ പിന്നിടുമ്പോൾ, ചരിത്രത്തിലെ സുപ്രധാനമായ ഈ ഏട് ആദ്യമായി ഒമ്പതാം ക്ലാസ് സാമൂഹ്യശാസ്ത്ര പാഠപുസ്തകത്തിൽ ഉൾപ്പെടുത്തി എൻസിഇആർടി. “അണ്ടർസ്റ്റാൻഡിംഗ് സൊസൈറ്റി: ഇന്ത്യ ആൻഡ് ബിയോണ്ട്” എന്ന പുതിയ പാഠപുസ്തകത്തിലാണ് ഇന്ത്യൻ ജനാധിപത്യം നേരിട്ട ഏറ്റവും വലിയ വെല്ലുവിളികളിലൊന്നായി അടിയന്തരാവസ്ഥയെ വിവരിക്കുന്നത്.(NCERT Class 9 Textbook Includes Chapter on 1975 Emergency for the First Time)
ഇന്ദിരാഗാന്ധിയുടെ നേതൃത്വത്തിലുള്ള സർക്കാർ നേരിട്ട പൊതുജന രോഷം, തൊഴിലില്ലായ്മ, വിലക്കയറ്റം, ഭരണകൂടത്തിനെതിരായ പരാതികൾ എന്നിവ എങ്ങനെയാണ് 1975-ലെ അടിയന്തരാവസ്ഥയിലേക്ക് നയിച്ചതെന്ന് പുസ്തകം വിശദീകരിക്കുന്നു. ആഭ്യന്തര അസ്വസ്ഥതകളുടെ പേരിൽ പ്രഖ്യാപിക്കപ്പെട്ട അടിയന്തരാവസ്ഥക്കാലത്ത് മൗലികാവകാശങ്ങൾ റദ്ദാക്കപ്പെട്ടതും, മാധ്യമങ്ങൾക്ക് സെൻസർഷിപ്പ് ഏർപ്പെടുത്തിയതും, രാഷ്ട്രീയ നേതാക്കളെയും പ്രവർത്തകരെയും അറസ്റ്റ് ചെയ്തതുമെല്ലാം പാഠഭാഗത്തുണ്ട്.
ജയപ്രകാശ് നാരായണന്റെ നേതൃത്വത്തിൽ ബിഹാറിലും ഗുജറാത്തിലുമുണ്ടായ വിദ്യാർത്ഥി-ജനകീയ പ്രക്ഷോഭങ്ങളെക്കുറിച്ചും പുസ്തകം പരാമർശിക്കുന്നു. 1977-ൽ അടിയന്തരാവസ്ഥ പിൻവലിച്ചതിന് ശേഷം നടന്ന പൊതുതിരഞ്ഞെടുപ്പിൽ ഭരണകൂടം പരാജയപ്പെട്ടത് ഇന്ത്യൻ ജനാധിപത്യത്തിന്റെ കരുത്താണ് വെളിപ്പെടുത്തുന്നതെന്ന് പുസ്തകം ചൂണ്ടിക്കാട്ടുന്നു. ഇതിനപ്പുറം വ്യാജവാർത്തകൾ, ദാരിദ്ര്യം, സാമൂഹിക വിവേചനം, ലിംഗസമത്വമില്ലായ്മ തുടങ്ങിയ സമകാലിക ജനാധിപത്യ വെല്ലുവിളികളും പുതിയ പാഠപുസ്തകം ചർച്ച ചെയ്യുന്നു. പൗരന്മാരെന്ന നിലയിൽ വിദ്യാർത്ഥികളുടെ ഉത്തരവാദിത്തങ്ങളെക്കുറിച്ച് അവബോധം നൽകുന്നതിനായി “ജനാധിപത്യവും നിങ്ങളും” എന്ന പുതിയ വിഭാഗവും പുസ്തകത്തിലുണ്ട്.
Story Summary
For the first time, NCERT has introduced the topic of the 1975 Emergency in its new Class 9 Social Science textbook, “Understanding Society: India and Beyond.” The chapter discusses the democratic challenges during that period, the role of mass movements led by Jayaprakash Narayan, and the resilience of Indian democracy, while also addressing contemporary issues like misinformation and social inequality.
