മെക്സിക്കോ സിറ്റി: ദക്ഷിണ കൊറിയയെ ഏകപക്ഷീയമായ ഒരു ഗോളിന് പരാജയപ്പെടുത്തി ദക്ഷിണാഫ്രിക്ക ലോകകപ്പ് ഫുട്ബോൾ നോക്കൗട്ട് ഘട്ടത്തിലേക്ക് മുന്നേറി. ടീമിന്റെ ചരിത്രത്തിലെ ആദ്യ നോക്കൗട്ട് പ്രവേശനമാണിത്. 2010-ന് ശേഷം ആദ്യമായാണ് ദക്ഷിണാഫ്രിക്ക ലോകകപ്പ് വേദിയിലെത്തുന്നത്.(South Africa vs South Korea, South Africa Secures Historic World Cup Knockout Berth)
തപെലോ മാസെക്കോയാണ് ദക്ഷിണാഫ്രിക്കയുടെ വിജയഗോൾ നേടിയത്. ടൂർണമെന്റിലെ ആദ്യ മത്സരത്തിൽ മെക്സിക്കോയോട് തോൽവി വഴങ്ങിയതോടെ ദക്ഷിണാഫ്രിക്കയുടെ സാധ്യതകൾ മങ്ങിയിരുന്നു. എന്നാൽ, കരുത്തരായ ചെക്ക് റിപ്പബ്ലിക്കിനെ സമനിലയിൽ തളയ്ക്കുകയും തുടർന്ന് ദക്ഷിണ കൊറിയയെ അട്ടിമറിക്കുകയും ചെയ്തതോടെ ഗ്രൂപ്പിൽ രണ്ടാം സ്ഥാനക്കാരായി അവർ നോക്കൗട്ട് ഉറപ്പിച്ചു.
ദക്ഷിണ കൊറിയൻ കോച്ച് ഹോങ് മ്യുങ് ബോ ക്യാപ്റ്റൻ സൺ ഹ്യൂങ്-മിനെ ആദ്യ ഇലവനിൽ ഉൾപ്പെടുത്താതിരുന്ന തീരുമാനം വലിയ വിമർശനങ്ങൾക്ക് വഴിവെച്ചു. മത്സരം ഉടനീളം ശക്തമായ മുന്നേറ്റങ്ങൾ നടത്താൻ കൊറിയ ശ്രമിച്ചെങ്കിലും ലക്ഷ്യം കാണാൻ കഴിഞ്ഞില്ല. മറുഭാഗത്ത്, മികച്ച ഒത്തിണക്കത്തോടെ കളിച്ച ദക്ഷിണാഫ്രിക്ക ഫിനിഷിംഗിൽ കൂടുതൽ ശ്രദ്ധ പുലർത്തിയിരുന്നെങ്കിൽ ഗോൾനില ഇനിയും ഉയർന്നേനെ. മറ്റൊരു മത്സരത്തിൽ ചെക്ക് റിപ്പബ്ലിക്കിനെ എതിരില്ലാത്ത മൂന്ന് ഗോളുകൾക്ക് തകർത്ത് ആതിഥേയരായ മെക്സിക്കോ ഗ്രൂപ്പ് എ ചാമ്പ്യന്മാരായി നോക്കൗട്ടിലേക്ക് യോഗ്യത നേടി. തോൽവി വഴങ്ങിയ ദക്ഷിണ കൊറിയ മികച്ച മൂന്നാം സ്ഥാനക്കാരുടെ പട്ടികയിൽ ഇടംപിടിച്ചാൽ മാത്രമേ ഇനി നോക്കൗട്ട് സാധ്യതയുള്ളൂ.
Story Summary
South Africa scripted history by advancing to the knockout stage of the World Cup for the first time after defeating South Korea 1-0. Following an early loss to Mexico and a draw with the Czech Republic, South Africa’s gritty performance secured them second place in Group A, while Mexico topped the group.
