ന്യൂഡൽഹി: ഡൽഹിയിലെ രോഹിണിയിൽ നിന്നും 25 ദിവസം പ്രായമുള്ള കുഞ്ഞിനെ പോലീസ് രക്ഷപ്പെടുത്തി. ശിശുക്കടത്തുമായി ബന്ധപ്പെട്ട് എട്ട് ലക്ഷം രൂപയ്ക്ക് കുഞ്ഞിനെ വാങ്ങിയ ഗരിമ ജെയിൻ, സതീഷ് ജെയിൻ എന്നിവരെ പോലീസ് അറസ്റ്റ് ചെയ്തു. ഇതോടെ ഈ റാക്കറ്റിൽ നിന്നും ഇതുവരെ രക്ഷപ്പെടുത്തിയ കുട്ടികളുടെ എണ്ണം ആറായി.(Child trafficking racket Delhi, Delhi Police Bust Interstate Child Trafficking Racket Arresting 13 People)
ഈ മാസം ആദ്യം പുറത്തുകൊണ്ടുവന്ന ശിശുക്കടത്ത് സംഘത്തെക്കുറിച്ചുള്ള അന്വേഷണത്തിന്റെ ഭാഗമായാണ് രോഹിണിയിലെ ജെയിൻ കുടുംബത്തെ പിടികൂടിയത്. തങ്ങൾക്ക് കുട്ടികളില്ലാത്തതിനാലാണ് സംഘത്തിൽ നിന്ന് കുഞ്ഞിനെ വാങ്ങിയതെന്ന് ഇവർ പോലീസിനോട് സമ്മതിച്ചു. രാജസ്ഥാനിലെ പാലി ജില്ലയിൽ നിന്ന് ഒന്നര മുതൽ രണ്ട് ലക്ഷം രൂപ വരെ നൽകി വാങ്ങിയ കുഞ്ഞിനെയാണ് എട്ട് ലക്ഷം രൂപയ്ക്ക് ഇവർക്ക് വിറ്റതെന്ന് പോലീസ് സംശയിക്കുന്നു.
കഴിഞ്ഞ 18 മാസത്തിനുള്ളിൽ ഏകദേശം 30 കുട്ടികളെ ഇവർ വിവിധ സംസ്ഥാനങ്ങളിലായി വിറ്റഴിച്ചതായാണ് പോലീസ് നൽകുന്ന വിവരം. രാജസ്ഥാൻ, ഗുജറാത്ത് എന്നിവിടങ്ങളിലെ ഗോത്രവർഗ മേഖലകളിൽ നിന്നും പാവപ്പെട്ട കുടുംബങ്ങളിൽ നിന്നും 10,000 മുതൽ 20,000 രൂപ വരെ നൽകി കുട്ടികളെ വാങ്ങിയ ശേഷം, വന്ധ്യതയുള്ള ദമ്പതികൾക്ക് 6 ലക്ഷം മുതൽ 10 ലക്ഷം രൂപ വരെ ഈടാക്കിയാണ് വിൽക്കുന്നത്.
സ്വകാര്യ ആശുപത്രികളുടെയും വ്യാജ ജനന സർട്ടിഫിക്കറ്റുകളുടെയും സഹായത്തോടെയാണ് സംഘം പ്രവർത്തിച്ചിരുന്നത്. ജൂൺ 5-ന് പഹാഡ്ഗഞ്ചിലെ ആർ.കെ ആശ്രം മെട്രോ സ്റ്റേഷന് സമീപം നടത്തിയ ഓപ്പറേഷനിലൂടെയാണ് സംഘം പോലീസിന്റെ പിടിയിലായത്. പ്രധാന സൂത്രധാരനായ ഗുജറാത്ത് സ്വദേശി സയ്യഭായി ഘമാർ ഉൾപ്പെടെ 13 പേർ ഇതുവരെ അറസ്റ്റിലായിട്ടുണ്ട്. രക്ഷപ്പെടുത്തിയ കുഞ്ഞിനെ ശിശുക്ഷേമ സമിതിയുടെ സംരക്ഷണത്തിലേക്ക് മാറ്റി. ഡൽഹി, ഹരിയാന, രാജസ്ഥാൻ, ഗുജറാത്ത്, മധ്യപ്രദേശ് എന്നിവിടങ്ങളിൽ കൂടുതൽ കുട്ടികളെ കണ്ടെത്താനും സംഘത്തിലെ മറ്റുള്ളവരെ പിടികൂടാനും വ്യാപകമായ റെയ്ഡുകൾ തുടരുകയാണ്.
Story Summary
Delhi Police has rescued a 25-day-old infant from a child trafficking syndicate operating across multiple states, leading to the arrest of two buyers. This latest recovery brings the total number of rescued infants to six, with investigators revealing that the organized gang has potentially trafficked 30 babies in the last 18 months by exploiting vulnerable families and forging medical records.
