ഡൽഹി: ദേശീയതലത്തിൽ വൻ വിവാദമായ നീറ്റ് (NEET) പരീക്ഷാ ക്രമക്കേടുകൾക്കും ചോദ്യപേപ്പർ ചോർച്ചയ്ക്കുമെതിരെ കോക്രോച്ച് ജനതാ പാർട്ടി (CJP) ഡൽഹി ജന്തർ മന്ദിറിൽ നടത്തുന്ന പ്രതിഷേധ സമരം തിങ്കളാഴ്ചയും തുടരുമെന്ന് പാർട്ടി നേതൃത്വം അറിയിച്ചു (Cockroach Janata Party Jantar Mantar). നാളെ (തിങ്കളാഴ്ച) വൈകിട്ട് സമരപ്പന്തലിൽ മെഴുകുതിരി കത്തിച്ച് ശക്തമായ രീതിയിൽ പ്രതിഷേധം രേഖപ്പെടുത്താനാണ് പാർട്ടി തീരുമാനം.
വരും ദിവസങ്ങളിൽ കൂടുതൽ പൊതുജനങ്ങളെ അണിനിരത്തി സമരം വിപുലമാക്കുമെന്നും, വിദ്യാർത്ഥികളുടെ ഭാവിക്കായുള്ള ഈ സമരത്തിന് പിന്തുണ പ്രഖ്യാപിച്ച് പ്രമുഖ കർഷക സംഘടനകൾ കൂടി ജന്തർ മന്ദിറിലേക്ക് എത്തണമെന്നും സി.ജെ.പി സ്ഥാപകൻ അഭിജീത് ദിപ്കെ ഔദ്യോഗികമായി ആവശ്യപ്പെട്ടു. സാധാരണ ജനങ്ങളുടെ സജീവ പങ്കാളിത്തം കൂടി ഉറപ്പാക്കി വരുംദിവസങ്ങളിൽ സമരം കൂടുതൽ ശക്തമാക്കാനാണ് കേന്ദ്ര നേതൃത്വത്തിന്റെ നീക്കം.
കേന്ദ്ര വിദ്യാഭ്യാസ മന്ത്രി ധർമേന്ദ്ര പ്രധാന്റെ അടിയന്തിര രാജി ആവശ്യപ്പെട്ടാണ് ജന്തർ മന്ദിറിൽ ഈ സമരം നടക്കുന്നത്. എന്നാൽ, ജനാധിപത്യപരമായ ഈ സമരത്തിന് നേരെ ഡൽഹി പൊലീസിന്റെ ഭാഗത്തുനിന്ന് കടുത്ത നിയന്ത്രണങ്ങളും നിരീക്ഷണങ്ങളുമാണ് ഉണ്ടാകുന്നതെന്ന് അഭിജീത് ദിപ്കെ കുറ്റപ്പെടുത്തി. സമരപ്പന്തലിൽ പ്രതിഷേധത്തിൽ പങ്കെടുക്കുന്നവർക്ക് കുടിവെള്ളവും പഴങ്ങളും നൽകി സഹായിക്കുന്ന സാധാരണക്കാരുടെ പോലും തിരിച്ചറിയൽ രേഖകളും വിലാസവും ഡൽഹി പൊലീസ് നിർബന്ധപൂർവ്വം ശേഖരിക്കുന്നുണ്ടെന്നാണ് സി.ജെ.പി നേതാവ് ആരോപിക്കുന്നത്.
വിദ്യാഭ്യാസ മേഖലയെ തകർത്ത മന്ത്രിയെ സ്ഥാനത്തുനിന്ന് നീക്കാൻ പ്രധാനമന്ത്രി നരേന്ദ്ര മോദി ഉടൻ തയ്യാറാകണമെന്നും, അല്ലാത്തപക്ഷം ഇന്ത്യൻ ചരിത്രത്തിലെ ഏറ്റവും പരാജയപ്പെട്ട പ്രധാനമന്ത്രിയായി അദ്ദേഹം മാറുമെന്നും അഭിജീത് ദിപ്കെ നേരത്തെ കടുത്ത ഭാഷയിൽ വിമർശിച്ചിരുന്നു. ശനിയാഴ്ച വൈകിട്ട് 5 മണി വരെ മാത്രമാണ് പ്രതിഷേധത്തിന് കോടതി അനുമതി നൽകിയിരുന്നതെങ്കിലും, വിദ്യാർത്ഥികൾക്ക് നീതി ലഭിക്കും വരെ അതിനുശേഷവും പ്രതിഷേധവുമായി മുന്നോട്ട് പോകാനാണ് പാർട്ടിയുടെ തീരുമാനം. ഇതിനിടയിൽ, പ്രതിഷേധക്കാർക്ക് ഡൽഹി പൊലീസ് അടിസ്ഥാന സൗകര്യങ്ങളായ കുടിവെള്ളവും ശുചിമുറി സൗകര്യവും ബോധപൂർവ്വം നിഷേധിക്കുന്നതായും സി.ജെ.പി ആരോപിക്കുന്നുണ്ട്.
അതേസമയം, നീറ്റ് ക്രമക്കേടിൽ കേന്ദ്ര വിദ്യാഭ്യാസ മന്ത്രി ധർമേന്ദ്ര പ്രധാനെതിരെ പ്രധാനമന്ത്രി ഉചിതമായ നടപടി സ്വീകരിച്ചില്ലെങ്കിൽ, വിദ്യാർത്ഥികൾക്ക് പിന്തുണ പ്രഖ്യാപിച്ച് താൻ നേരിട്ട് നിരാഹാര സമരം ആരംഭിക്കുമെന്ന് പ്രമുഖ കാലാവസ്ഥാ–സാമൂഹ്യ പ്രവർത്തകൻ സോനം വാങ്ചുക് വ്യക്തമാക്കിയത് ഈ പോരാട്ടത്തിന് പുതിയ വീര്യം പകർന്നിട്ടുണ്ട്.
Story Summary: The Cockroach Janata Party (CJP), founded by Abheet Dipke, announced that its protest at Jantar Mantar against NEET exam irregularities and paper leaks will continue on Monday with a candle-light vigil. Dipke urged farmer organizations and the general public to join the stir demanding Union Education Minister Dharmendra Pradhan’s resignation. He alleged that the Delhi Police is closely monitoring the event, collecting IDs of water providers, and denying basic amenities. Meanwhile, climate activist Sonam Wangchuk has threatened a hunger strike if no action is taken against the minister.
