കൊച്ചി: അന്തരിച്ച പ്രശസ്ത നടനും മിമിക്രി കലാകാരനുമായ കൊല്ലം സുധിയുടെ ഭാര്യ രേണു സുധിക്ക് ബ്രെസ്റ്റ് കാൻസർ (സ്തനാർബുദം) സ്ഥിരീകരിച്ച വാർത്തയ്ക്ക് പിന്നാലെ, മാതൃകാപരമായ പ്രഖ്യാപനവുമായി പ്രമുഖ യൂട്യൂബർ സായ് കൃഷ്ണ (Youtuber Sai Krishna Secret Agent Renu Sudhi) (സീക്രട്ട് ഏജന്റ്). രേണു സുധിയുടെ പേരിൽ താൻ ചെയ്ത വീഡിയോകളിൽ നിന്ന് ലഭിച്ച വരുമാനത്തിന്റെ ഒരു വിഹിതം അവരുടെ ചികിത്സാ സഹായത്തിനായി കൈമാറുമെന്ന് സായ് കൃഷ്ണ വ്യക്തമാക്കി. സോഷ്യൽ മീഡിയയിലൂടെ രേണുവിനെ വെച്ച് വലിയ രീതിയിൽ കണ്ടന്റുകൾ നിർമ്മിച്ച മറ്റ് ക്രിയേറ്റർമാരും ഈ രീതി പിന്തുടർന്നാൽ അവർക്ക് ആരുടെയും മുന്നിൽ കൈനീട്ടാതെ ചികിത്സ പൂർത്തിയാക്കാൻ സാധിക്കുമെന്നും അദ്ദേഹം പറഞ്ഞു.
തനിക്ക് ബ്രെസ്റ്റ് കാൻസർ മൂന്നാം ഘട്ടത്തിലാണെന്ന (Stage 3 Breast Cancer) വിവരം രേണു സുധി തന്നെയാണ് അടുത്തിടെ ഒരു അഭിമുഖത്തിലൂടെ ആരാധകരെ അറിയിച്ചത്. നിലവിൽ ഇതിനായുള്ള ചികിത്സകൾ ആരംഭിച്ച രേണുവിന് വലിയ തോതിലുള്ള പിന്തുണയാണ് സോഷ്യൽ മീഡിയയിൽ നിന്നും ലഭിക്കുന്നത്. ഈ സാഹചര്യത്തിലാണ് സായ് കൃഷ്ണ തന്റെ നിലപാട് വ്യക്തമാക്കിയത്.
“രേണു സുധിയെ കുറിച്ച് ഞാൻ ഒരുപാട് കണ്ടന്റുകൾ ചെയ്തിട്ടുണ്ട്. കൃത്യമായി പറഞ്ഞാൽ 48 വീഡിയോകൾ. അവരെ വിമർശിച്ചും പിന്തുണച്ചും ഒക്കെ സംസാരിച്ചിട്ടുണ്ട്. ഈ 48 കണ്ടന്റുകൾ ചെയ്തതുകൊണ്ട് തന്നെ അതിൽ നിന്നും അത്യാവശ്യം നല്ലൊരു വരുമാനം (Revenue) എനിക്ക് യൂട്യൂബിൽ നിന്ന് ലഭിച്ചിട്ടുണ്ട്. അതിൽ നിന്നൊരു തരക്കേടില്ലാത്ത തുക ഞാൻ രേണുവിന് കൊടുക്കും. നമുക്ക് കാശുണ്ടാക്കാൻ കണ്ടന്റ് തന്ന ഒരു വ്യക്തിക്ക് ജീവിതത്തിൽ ഇങ്ങനെ ഒരു സാഹചര്യം വരുമ്പോൾ സഹായിക്കേണ്ടത് എന്റെ കടമയാണെന്ന് തോന്നുന്നു. അവരെ വെച്ച് കണ്ടന്റുണ്ടാക്കിയ മറ്റുള്ളവരും തങ്ങളുടെ വരുമാനത്തിൽ നിന്ന് ഒരിത്തിരി തുക നൽകിയാൽ അവർക്ക് സമാധാനത്തോടെ മെഡിക്കൽ ജേണി പൂർത്തിയാക്കാം. അവർ കാൻസറിനെ അതിജീവിച്ച് ശക്തമായി തിരിച്ചുവരട്ടെ,” സായ് കൃഷ്ണ പറഞ്ഞു.
രേണു സുധിയ്ക്ക് നേരെ സോഷ്യൽ മീഡിയയിൽ വരുന്ന കടുത്ത നെഗറ്റീവ് കമന്റുകളെ കുറിച്ചും സായ് കൃഷ്ണ പ്രതികരിച്ചു. ഇങ്ങനെ ഒരു ഗുരുതരമായ മെഡിക്കൽ അവസ്ഥയുണ്ടെന്ന് പറഞ്ഞിട്ട് പോലും പലരും അത് വിശ്വസിക്കാതെ മോശം കമന്റുകൾ ഇടുന്നുണ്ട്. അതിന് കാരണക്കാരായവരിൽ കണ്ടന്റ് ക്രിയേറ്റർമാരായ തങ്ങൾക്കും പങ്കുണ്ടെന്ന് അദ്ദേഹം സ്വയംവിമർശനം നടത്തി. തങ്ങളെപ്പോലുള്ളവർ ചെയ്ത വീഡിയോകളാണ് ജനങ്ങളിൽ അത്തരം ഒരു ഇംപാക്ട് ഉണ്ടാക്കിയത്. അതുകൊണ്ട് തന്നെ കമന്റ് ഇടുന്നവരെ കുറ്റം പറയാൻ തനിക്ക് അർഹതയില്ലെന്നും, അവരോട് നെഗറ്റീവ് കമന്റുകൾ ഒഴിവാക്കാൻ അഭ്യർത്ഥിക്കുക മാത്രമേ ചെയ്യാനുള്ളൂ എന്നും സായ് കൃഷ്ണ കൂട്ടിച്ചേർത്തു.
കൊല്ലം സുധിയുടെ വിയോഗത്തിന് ശേഷം സോഷ്യൽ മീഡിയയിലെ ആൽബങ്ങളിലും റീലുകളിലുമൊക്കെ രേണു സുധി സജീവമായിരുന്നു. മെയിൻസ്ട്രീം വൺ എന്ന യൂട്യൂബ് ചാനലിന് നൽകിയ അഭിമുഖത്തിലാണ് താൻ നേരിടുന്ന ആരോഗ്യപ്രശ്നങ്ങളെക്കുറിച്ച് അവർ തുറന്നുപറഞ്ഞത്. നിലവിൽ ചികിത്സ ഘട്ടങ്ങളിലൂടെ കടന്നുപോകുന്ന രേണു, തന്റെ ആരോഗ്യ വിവരങ്ങൾ സോഷ്യൽ മീഡിയയിലൂടെ ആരാധകരുമായി പങ്കുവെക്കുന്നുണ്ട്.
Story Summary: Youtuber Sai Krishna (Secret Agent) announced that he will share a portion of the revenue generated from 48 video contents he made about Renu Sudhi towards her cancer treatment. Renu Sudhi, wife of late actor Kollam Sudhi, recently revealed that she is battling Stage 3 breast cancer. Sai Krishna urged other content creators who used her name for views to follow suit so she could complete her medical journey with financial dignity.
