ന്യൂ ഡൽഹി: ഇന്ത്യയിൽ തെക്കുപടിഞ്ഞാറൻ മൺസൂൺ മഴയിൽ ആശങ്കാജനകമായ കുറവ് രേഖപ്പെടുത്തുന്നു. ജൂൺ 4 മുതൽ ജൂൺ 14 വരെയുള്ള കണക്കുകൾ പ്രകാരം രാജ്യത്ത് സാധാരണ ലഭിക്കേണ്ട മഴയേക്കാൾ 28 ശതമാനം കുറവാണ് രേഖപ്പെടുത്തിയിരിക്കുന്നത് (Rainfall Deficit India). 47.7 മില്ലിമീറ്റർ ലഭിക്കേണ്ട സ്ഥാനത്ത് 34.3 മില്ലിമീറ്റർ മഴ മാത്രമാണ് ലഭിച്ചത്. എൽ നിനോ പ്രതിഭാസത്തിന്റെ സ്വാധീനം മൂലം മൺസൂണിന്റെ വേഗത കുറഞ്ഞതാണ് മഴക്കമ്മിക്ക് പ്രധാന കാരണമായി കാലാവസ്ഥാ നിരീക്ഷണ കേന്ദ്രം ചൂണ്ടിക്കാട്ടുന്നത്.
മധ്യ ഇന്ത്യയിൽ 55 ശതമാനവും, കിഴക്കൻ-വടക്കുകിഴക്കൻ ഇന്ത്യയിൽ 40 ശതമാനവും മഴക്കമ്മി രേഖപ്പെടുത്തിയിട്ടുണ്ട്. വടക്കുപടിഞ്ഞാറൻ ഇന്ത്യയിൽ മാത്രമാണ് സാധാരണയേക്കാൾ 13 ശതമാനം അധികം മഴ ലഭിച്ചത്. ഗുജറാത്ത് (75%), മഹാരാഷ്ട്ര (69%), മേഘാലയ (86%) എന്നീ സംസ്ഥാനങ്ങളിലാണ് ഏറ്റവും വലിയ മഴക്കമ്മി അനുഭവപ്പെടുന്നത്. ഏകദേശം 200-ഓളം ജില്ലകളിൽ മഴക്കുറവ് മൂലം കാർഷിക മേഖലയും ജലക്ഷാമവും നേരിടേണ്ടി വരുമെന്ന ആശങ്ക ശക്തമാണ്.
എന്നാൽ, ജൂൺ 22 മുതൽ 28 വരെയുള്ള കാലയളവിൽ സ്ഥിതിഗതികളിൽ നേരിയ മാറ്റം ഉണ്ടാകുമെന്ന് കാലാവസ്ഥാ വിഭാഗം അറിയിക്കുന്നു. കർണാടകയുടെ ഉൾപ്രദേശങ്ങളിലും തമിഴ്നാടിന്റെ തെക്കൻ ഭാഗങ്ങളിലും പശ്ചിമഘട്ടത്തിലും ഇടിമിന്നലോട് കൂടിയ മഴയ്ക്ക് സാധ്യതയുണ്ട്. ജൂൺ 29 മുതൽ ജൂലൈ 5 വരെയുള്ള കാലയളവിൽ മൺസൂൺ കൂടുതൽ ശക്തിപ്പെടുകയും കേരളത്തിന്റെ തീരപ്രദേശങ്ങളിലും കൊങ്കൺ തീരത്തും ശക്തമായ മഴ ലഭിക്കുമെന്നും പ്രതീക്ഷിക്കുന്നു. 2026-ൽ മൊത്തത്തിൽ ശരാശരിയേക്കാൾ കുറഞ്ഞ മഴയേ ലഭിക്കൂ എന്ന് ഐഎംഡി നേരത്തെ മുന്നറിയിപ്പ് നൽകിയിരുന്നു. ജൂൺ അവസാനത്തോടെ മൺസൂൺ ശക്തമായാൽ കാർഷിക മേഖലയിലുണ്ടായേക്കാവുന്ന പ്രതിസന്ധി മറികടക്കാമെന്ന പ്രതീക്ഷയിലാണ് അധികൃതർ.
Summary: India is experiencing a significant 28% rainfall deficit in the southwest monsoon as of mid-June, largely attributed to the influence of El Nino. While northwest India has received surplus rain, central and northeastern regions are facing severe shortages, with Gujarat, Maharashtra, and Meghalaya reporting steep declines. The India Meteorological Department (IMD) expects the current weak monsoon phase to persist until June 21, with scattered thunderstorms providing limited relief.
