ലോസ് ആഞ്ചലസ്: 2026 ഫിഫ ലോകകപ്പ് (FIFA World Cup 2026) ആവേശം മൈതാനങ്ങൾക്ക് പുറത്തും തരംഗമാകുമ്പോൾ, കായികലോകത്തെ ചിരിപ്പിക്കുന്ന ഒരു അപൂർവ്വ നിമിഷം സോഷ്യൽ മീഡിയയിൽ വൈറലാകുന്നു (Woman kisses South Korean reporter). വിമാനത്താവളത്തിന് പുറത്തുനിന്നും ലോകകപ്പ് വിശേഷങ്ങൾ തത്സമയം (Live on Air) റിപ്പോർട്ട് ചെയ്യുകയായിരുന്ന ദക്ഷിണ കൊറിയൻ (South Korean) മാധ്യമപ്രവർത്തകനെ ഒരു വിദേശ യുവതി അപ്രതീക്ഷിതമായി ചുംബിച്ചതാണ് ഇപ്പോഴത്തെ ചർച്ചാവിഷയം.
സ്റ്റേഡിയത്തിന് പുറത്തുള്ള ആരാധകരുടെ ആവേശത്തെക്കുറിച്ച് ചാനലിൽ തത്സമയം സംസാരിക്കുകയായിരുന്നു കൊറിയൻ റിപ്പോർട്ടർ. ഇതിനിടയിലാണ് ഫുട്ബോൾ ആരാധകയായ ഒരു യുവതി പെട്ടെന്ന് ക്യാമറയ്ക്ക് മുന്നിലേക്ക് ഓടിയെത്തിയത്. റിപ്പോർട്ടിംഗ് തടസ്സപ്പെടുത്താതെ തന്നെ അവർ മാധ്യമപ്രവർത്തകന്റെ കവിളിൽ ഉമ്മ വെക്കുകയായിരുന്നു. ഒട്ടും പ്രതീക്ഷിക്കാത്ത നിമിഷമായിരുന്നിട്ടും പരിഭ്രാന്തനാകാതെ അതീവ പ്രൊഫഷണലായി തന്റെ ലൈവ് റിപ്പോർട്ടിംഗ് പൂർത്തിയാക്കാൻ ഇയാൾക്ക് സാധിച്ചു.
View this post on Instagram
യുവതി കടന്നുപോയ ഉടൻ തന്നെ ക്യാമറയ്ക്ക് മുന്നിൽ ചിരിയടക്കാൻ പാടുപെടുന്ന റിപ്പോർട്ടറുടെ ദൃശ്യങ്ങളാണ് ആരാധകരെ ആകർഷിച്ചത്. മുഖം ചുവന്ന്, ചിരിച്ചുകൊണ്ട് ഇയാൾ വാർത്താ വിവരണം തുടരുന്ന ദൃശ്യങ്ങൾ ഇൻസ്റ്റാഗ്രാമിലും എക്സിലും (X) ദശലക്ഷക്കണക്കിന് ആളുകളാണ് ഇതിനോടകം കണ്ടത്. ലോകകപ്പ് പോലെയുള്ള വലിയ കായിക മാമാങ്കങ്ങളിൽ ഇത്തരം രസകരമായ ആരാധക ഇടപെടലുകൾ പതിവാണെങ്കിലും റിപ്പോർട്ടറുടെ നിഷ്കളങ്കമായ ഭാവങ്ങളാണ് വീഡിയോ ഇത്രയധികം ജനപ്രിയമാക്കിയത്.
അതേസമയം, ഈ വീഡിയോയെ അനുകൂലിച്ചും പ്രതികൂലിച്ചും സോഷ്യൽ മീഡിയയിൽ ചർച്ചകൾ നടക്കുന്നുണ്ട്. ഇതൊരു തമാശയായി കണ്ട് ചിരിച്ചുതള്ളണമെന്ന് ഒരു വിഭാഗം വാദിക്കുമ്പോൾ, ജോലി ചെയ്യുന്ന ഒരാളുടെ വ്യക്തിസ്വാതന്ത്ര്യത്തിന്മേലുള്ള കടന്നുകയറ്റമാണിതെന്ന് മറ്റൊരു വിഭാഗം വിമർശിക്കുന്നു. മുൻപ് നടന്ന ലോകകപ്പുകളിലും സമാനമായ രീതിയിൽ പുരുഷ-വനിതാ റിപ്പോർട്ടർമാർക്ക് നേരെ ആരാധകരുടെ ഭാഗത്തുനിന്ന് ഇത്തരം അതിക്രമങ്ങളും രസകരമായ നിമിഷങ്ങളും ഉണ്ടായിട്ടുണ്ട്.
