ചെന്നൈ: ബി.ജെ.പി വിട്ടേക്കുമെന്നും തമിഴ്നാട്ടിൽ പുതിയ രാഷ്ട്രീയ പാർട്ടി രൂപീകരിക്കുമെന്നുമുള്ള അഭ്യൂഹങ്ങൾ ശക്തമായി നിലനിൽക്കെ, തന്റെ നിലപാട് വെള്ളിയാഴ്ച പ്രഖ്യാപിക്കുമെന്ന് ബി.ജെ.പി മുൻ സംസ്ഥാന അധ്യക്ഷൻ കെ. അണ്ണാമലൈ (K Annamalai political entry new party). വെള്ളിയാഴ്ച ഉച്ചയ്ക്ക് 12 മണിക്ക് സാമൂഹിക മാധ്യമ പ്ലാറ്റ്ഫോമായ എക്സിലൂടെ (X) തത്സമയം വന്ന് മനസ്സ് തുറന്ന് സംവദിക്കുമെന്നാണ് അദ്ദേഹം അറിയിച്ചിരിക്കുന്നത്. ഡൽഹിയിൽ ബി.ജെ.പി ദേശീയ നേതൃത്വവുമായി നടത്തിയ നിർണ്ണായക കൂടിക്കാഴ്ചകൾക്ക് ശേഷമാണ് അണ്ണാമലൈയുടെ ഈ പ്രതികരണം.
“നാളെ (വെള്ളിയാഴ്ച) ഉച്ചയ്ക്ക് 12 മണിക്ക്, എന്റെ ആശയങ്ങൾ പങ്കുവെക്കാനും നിങ്ങളുമായി മനസ്സ് തുറന്ന് സംവദിക്കാനും ഞാൻ ആവേശത്തോടെ കാത്തിരിക്കുന്നു,” അണ്ണാമലൈ എക്സിൽ കുറിച്ചു.
അടുത്തിടെ കഴിഞ്ഞ തമിഴ്നാട് നിയമസഭാ തെരഞ്ഞെടുപ്പിലെ ഫലങ്ങൾക്ക് പിന്നാലെയാണ് മുൻ ഐ.പി.എസ് ഓഫീസർ കൂടിയായ അണ്ണാമലൈ പാർട്ടിയുമായി അകൽച്ചയിലാണെന്ന വാർത്തകൾ സജീവമായത്. 2025-ന്റെ അവസാനത്തോടെ ബി.ജെ.പി-എ.ഐ.എ.ഡി.എം.കെ സഖ്യം പുനരുജ്ജീവിപ്പിച്ചതിനെ തുടർന്ന് അദ്ദേഹത്തെ സംസ്ഥാന അധ്യക്ഷ പദവിയിൽ നിന്ന് മാറ്റി നൈനാർ നാഗേന്ദ്രനെ നിയമിച്ചിരുന്നു. ഇത്തവണ നിയമസഭാ തെരഞ്ഞെടുപ്പിൽ മത്സരിക്കാൻ അണ്ണാമലൈക്ക് പാർട്ടി സീറ്റ് നൽകിയിരുന്നതുമില്ല. കഴിഞ്ഞ ദിവസം ഡൽഹിയിലെത്തിയ അണ്ണാമലൈ കേന്ദ്ര ആഭ്യന്തര മന്ത്രി അമിത് ഷാ, ബി.ജെ.പി ദേശീയ അധ്യക്ഷൻ നിതിൻ നവിൻ, ബി.എൽ സന്തോഷ് എന്നിവരുമായി പ്രത്യേക കൂടിക്കാഴ്ച നടത്തിയിരുന്നു. പാർട്ടി പദവി രാജിവെക്കാൻ അദ്ദേഹം സന്നദ്ധത അറിയിച്ചതായാണ് ദേശീയ മാധ്യമങ്ങൾ റിപ്പോർട്ട് ചെയ്യുന്നത്.
അതേസമയം, അണ്ണാമലൈ ബി.ജെ.പി വിടുമെന്ന വാർത്തകൾ തമിഴ്നാട് ബി.ജെ.പി സംസ്ഥാന അധ്യക്ഷൻ നൈനാർ നാഗേന്ദ്രൻ പൂർണ്ണമായി തള്ളി. അണ്ണാമലൈ പാർട്ടിയിൽ നിന്ന് രാജിവെച്ചിട്ടില്ലെന്നും പുതിയ പാർട്ടി രൂപീകരിക്കുന്നതിനെക്കുറിച്ച് നേതാക്കളോട് ഒന്നും സംസാരിച്ചിട്ടില്ലെന്നും അദ്ദേഹം ചെന്നൈയിൽ പറഞ്ഞു. വാർത്തകൾ അടിസ്ഥാനരഹിതമായ കിംവദന്തികൾ മാത്രമാണെന്നും തമിഴ്നാട് ബി.ജെ.പിയിൽ യാതൊരുവിധ അഭിപ്രായവ്യത്യാസങ്ങളുമില്ലെന്നും നാഗേന്ദ്രൻ അവകാശപ്പെട്ടു. അണ്ണാമലൈയുടെ നാളത്തെ സോഷ്യൽ മീഡിയ ലൈവോടെ തമിഴ്നാട് രാഷ്ട്രീയത്തിലെ വൻ അനിശ്ചിതത്വങ്ങൾക്ക് വിരാമമാകും.
Story Summary: Amid intense speculation regarding his political future and rumors of floating a new political outfit, former Tamil Nadu BJP Chief K. Annamalai announced that he will share his stance via a live interaction on social media platform X on Friday at 12 PM. The announcement comes after his meetings with senior BJP leaders, including Union Home Minister Amit Shah, in New Delhi.
