കൊച്ചി: കേരളത്തിൽ തെക്കുപടിഞ്ഞാറൻ കാലവർഷം (Kerala monsoon arrival weather updates) നാളെ ഒഫീഷ്യലായി എത്തുന്നതിന് മുന്നോടിയായി സംസ്ഥാനത്തുടനീളം കനത്ത മഴ മുന്നറിയിപ്പ്. അറബിക്കടലിൽ ചക്രവാതച്ചുഴി രൂപപ്പെട്ട പശ്ചാത്തലത്തിൽ വരും ദിവസങ്ങളിൽ അതിശക്തമായ മഴ പെയ്യാൻ സാധ്യതയുണ്ടെന്ന് കേന്ദ്ര കാലാവസ്ഥ വകുപ്പ് (IMD) അറിയിച്ചു. ഇന്ന് മുതൽ അടുത്ത അഞ്ച് ദിവസത്തേക്ക് സംസ്ഥാനത്തെ 14 ജില്ലകളിലും വിവിധ അലേർട്ടുകൾ പ്രഖ്യാപിച്ചിട്ടുണ്ട്.
ഇന്നത്തെ അലേർട്ടുകൾ:
ഓറഞ്ച് അലേർട്ട്: ആലപ്പുഴ, കോട്ടയം, എറണാകുളം.
യല്ലോ അലേർട്ട്: തിരുവനന്തപുരം, കൊല്ലം, പത്തനംതിട്ട, ഇടുക്കി, തൃശ്ശൂർ, പാലക്കാട്, മലപ്പുറം, കോഴിക്കോട്, വയനാട്, കണ്ണൂർ, കാസർഗോഡ്.
നാളെ (വ്യാഴാഴ്ച) കാലവർഷം കരതൊടുന്നതോടെ തെക്കൻ-മധ്യ കേരളത്തിൽ മഴ കടുക്കും. തിരുവനന്തപുരം മുതൽ തൃശ്ശൂർ വരെയുള്ള 8 ജില്ലകളിൽ നാളെ ഓറഞ്ച് അലേർട്ട് പ്രഖ്യാപിച്ചിട്ടുണ്ട്. മറ്റന്നാൾ (വെള്ളിയാഴ്ച) മഴ വടക്കൻ കേരളത്തിലേക്ക് വ്യാപിക്കുന്നതോടെ തൃശ്ശൂർ മുതൽ കാസർഗോഡ് വരെയുള്ള 7 വടക്കൻ ജില്ലകളിൽ ഓറഞ്ച് അലേർട്ട് ആയിരിക്കും.
ചക്രവാതച്ചുഴിയുടെ സ്വാധീനം മൂലം കൊല്ലം മുതൽ കോഴിക്കോട് വരെയുള്ള തീരദേശ മേഖലകളിൽ കടൽ അതീവ പ്രക്ഷുബ്ധമാകാൻ സാധ്യതയുണ്ട്. ജൂൺ 5 വരെ മണിക്കൂറിൽ 40 മുതൽ 50 കിലോമീറ്റർ വരെ വേഗതയിൽ ശക്തമായ കാറ്റിനും ഇടിമിന്നലോടു കൂടിയ മഴയ്ക്കും സാധ്യതയുണ്ടെന്ന് കാലാവസ്ഥാ നിരീക്ഷകർ മുന്നറിയിപ്പ് നൽകുന്നു. അപകടസാധ്യത കണക്കിലെടുത്ത് കേരള-ലക്ഷദ്വീപ് തീരങ്ങളിൽ വ്യാഴാഴ്ച വരെ മത്സ്യബന്ധനത്തിന് പൂർണ്ണ വിലക്കേർപ്പെടുത്തിയിട്ടുണ്ട്.
തുടർച്ചയായ മഴ മലയോര മേഖലകളിൽ ഉരുൾപൊട്ടൽ, മണ്ണിടിച്ചിൽ, മലവെള്ളപ്പാച്ചിൽ എന്നിവയ്ക്ക് കാരണമായേക്കാം. അതിനാൽ അപകടസാധ്യതാ പ്രദേശങ്ങളിൽ താമസിക്കുന്നവർ റവന്യൂ അധികൃതരുടെ നിർദ്ദേശാനുസരണം അടിയന്തിരമായി സുരക്ഷിത സ്ഥാനങ്ങളിലേക്ക് മാറിത്താമസിക്കണം. നദിക്കരകളിലും അണക്കെട്ടുകളുടെ കീഴ്പ്രദേശങ്ങളിലും ഉള്ളവരും പകൽ സമയത്തുതന്നെ തദ്ദേശ സ്ഥാപനങ്ങൾ ഒരുക്കുന്ന ദുരിതാശ്വാസ ക്യാമ്പുകളിലേക്ക് മാറാൻ തയ്യാറാകേണ്ടതാണ്.
Story Summary: The IMD has issued severe rain alerts for all 14 districts in Kerala for the next five days as the Southwest Monsoon is expected to hit the state tomorrow. Orange alerts have been sounded in several districts, and fishermen are banned from entering the sea until Thursday due to cyclonic circulation over the Arabian Sea.
