നെടുങ്കണ്ടം: ഇടുക്കി നെടുങ്കണ്ടം ഇരട്ടക്കൊലപാതക കേസിലെ പ്രതി സജിയുടെ പുരയിടത്തിൽ, 2018 മുതൽ കാണാതായ അച്ഛൻ മാത്യുവിനെ കണ്ടെത്താനായി പോലീസ് നടത്തുന്ന പരിശോധന ഇന്നും തുടരും (Idukki Double Murder Case). കഴിഞ്ഞ ദിവസം നാല് മണിക്കൂറോളം സജിയുടെ വീടിന് സമീപം മണ്ണുമാന്തി യന്ത്രം ഉപയോഗിച്ച് പരിശോധന നടത്തിയെങ്കിലും വ്യക്തമായ തെളിവുകളൊന്നും ലഭിച്ചിരുന്നില്ല. അമ്മയെയും സഹോദരനെയും കൊന്ന് കുഴിച്ചുമൂടിയ സ്ഥലത്തിന് സമീപം മറ്റൊരു കുഴി കൂടി നേരത്തെ എടുത്തതായി സജി മൊഴി നൽകിയതിന്റെ അടിസ്ഥാനത്തിലാണ് പോലീസ് ഈ നീക്കം നടത്തുന്നത്.
ഇന്നലെ നടന്ന തിരച്ചിലിൽ കുഴിയിൽ നിന്ന് വസ്ത്രങ്ങളുടെ അവശിഷ്ടങ്ങളും ഒരു ചെറിയ അസ്ഥിക്കഷ്ണവും കണ്ടെത്തിയിരുന്നു. എന്നാൽ ഇത് മനുഷ്യന്റേതാണോ എന്ന് സ്ഥിരീകരിക്കാൻ ശാസ്ത്രീയ പരിശോധനകൾ ആവശ്യമാണ്. മാലിന്യങ്ങൾ നിക്ഷേപിച്ചിരുന്ന കുഴിയായതിനാൽ കൂടുതൽ ആഴത്തിൽ പരിശോധന നടത്താനാണ് അന്വേഷണ സംഘത്തിന്റെ തീരുമാനം. കട്ടപ്പന ഡിവൈഎസ്പിയുടെ നേതൃത്വത്തിലുള്ള പോലീസ് സംഘമാണ് സജിയെ സംഭവസ്ഥലത്തെത്തിച്ച് തെളിവെടുപ്പ് നടത്തുന്നത്.
സ്വന്തം അമ്മയെയും സഹോദരനെയും കൊലപ്പെടുത്തിയെന്ന് സമ്മതിച്ചെങ്കിലും അച്ഛന്റെ തിരോധാനത്തിൽ തനിക്ക് പങ്കില്ലെന്ന നിലപാടിലാണ് സജി. എന്നാൽ 2018 മാർച്ചിൽ മാത്യുവിനെ കാണാതായ സംഭവത്തിൽ ദുരൂഹതയുണ്ടെന്ന് പോലീസ് വിശ്വസിക്കുന്നു. ഇതിനുപുറമെ സജി തന്റെ അടുത്ത ബന്ധുക്കളായ രണ്ട് സ്ത്രീകളെ പീഡിപ്പിച്ചെന്ന പരാതിയിലും പോലീസ് ഉടൻ അന്വേഷണം ആരംഭിക്കും. ഇടുക്കി ജില്ലയെ നടുക്കിയ ഇരട്ടക്കൊലപാതകത്തിന് പിന്നാലെ കൂടുതൽ ക്രൂരതകളുടെ ചുരുളഴിയുമോ എന്നാണ് നാട് ഉറ്റുനോക്കുന്നത്.
Summary: Police search continues today at the property of Saji, the accused in the Idukki double murder case, to find his missing father, Mathew, who disappeared in 2018. Despite a four-hour excavation yesterday that yielded some clothing scraps and a bone fragment, no conclusive evidence has been found. Saji has admitted to killing his mother and brother but denies involvement in his father’s disappearance. Police are also investigating allegations of sexual assault against him by two female relatives.
