ചെന്നൈ: തന്റെ ജീവിതത്തിലെ ഏറ്റവും വലിയ സന്തോഷങ്ങളായ വളർത്തുനായ്ക്കൾക്കൊപ്പം സമയം ചെലവഴിക്കുന്നതിന്റെ വിശേഷങ്ങൾ പങ്കുവെച്ച് നടി അഞ്ജലി (Actress Anjali Pets). തന്റെ രണ്ടാമത്തെ വളർത്തുനായ നിക്കോയുടെ ഒന്നാം ജന്മദിനം ആഘോഷമാക്കുകയാണ് താരം. നിക്കോയ്ക്കും മറ്റൊരു വളർത്തുനായ പോളോയ്ക്കും (Polo) ഒപ്പമുള്ള ചിത്രങ്ങൾ പങ്കുവെച്ചുകൊണ്ടാണ് അഞ്ജലി ഹൃദയസ്പർശിയായ കുറിപ്പ് പങ്കുവെച്ചത്.
കഴിഞ്ഞ ഒരു വർഷത്തിനിടയിൽ എപ്പോഴാണ് നിക്കോ തന്റെ കണ്മണിയായി മാറിയതെന്ന് അറിയില്ലെന്ന് താരം കുറിച്ചു. “നീ എന്റെ ജീവിതത്തിലേക്ക് കടന്നുവരികയും സന്തോഷവും ആശ്വാസവും കുസൃതിയും കൊണ്ട് ജീവിതം നിറയ്ക്കുകയും ചെയ്തു. പോളോയും നിക്കോയും വരുന്നതിന് മുൻപുള്ള ജീവിതം ഇപ്പോൾ മറ്റൊരു അധ്യായം പോലെ തോന്നുന്നു. എന്റെ ഈ രണ്ട് ആൺമക്കളും ലോകത്തെ ഏറ്റവും പവിത്രമായ രീതിയിൽ മാറ്റിമറിച്ചു,” അഞ്ജലി പറഞ്ഞു.
വീട്ടിലെ കുസൃതിയുള്ള അനിയൻ എന്ന വേഷം നിക്കോ പൂർണ്ണമായും ഏറ്റെടുത്തുവെന്ന് അഞ്ജലി തമാശരൂപേണ പറയുന്നു. എല്ലാവരുടെയും ശ്രദ്ധ പിടിച്ചുപറ്റുകയും കുസൃതികൾ കാണിച്ച ശേഷം നിഷ്കളങ്കമായ മുഖം കാണിച്ച് രക്ഷപ്പെടുകയും ചെയ്യുന്നതാണ് അവന്റെ രീതിയെന്നും, രണ്ടാമത്തെ കുട്ടിയോട് എല്ലാ അമ്മമാർക്കും ഉള്ളതുപോലെ തനിക്ക് അവനോട് അല്പം കൂടുതൽ ഇഷ്ടമുണ്ടെന്നും താരം കുറിപ്പിൽ വ്യക്തമാക്കി.
View this post on Instagram
2006-ൽ ‘ഫോട്ടോ’ എന്ന ചിത്രത്തിലൂടെ അഭിനയരംഗത്തെത്തിയ അഞ്ജലി, തമിഴിലെ ‘അങ്ങാടി തെരു’, ‘എങ്കേയും എപ്പോതും’ എന്നീ ചിത്രങ്ങളിലൂടെയാണ് പ്രശസ്തയായത്. മലയാളത്തിൽ ജയസൂര്യക്കൊപ്പം ‘പയ്യൻസ്’, ജോജു ജോർജിന്റെ ‘ഇരട്ട’ എന്നീ ചിത്രങ്ങളിലും ശ്രദ്ധേയമായ വേഷങ്ങൾ ചെയ്തിട്ടുണ്ട്. സോഷ്യൽ മീഡിയയിൽ സജീവമായ താരം തന്റെ നായക്കുട്ടികളായ പോളോയുടെയും നിക്കോയുടെയും വിശേഷങ്ങൾ സ്ഥിരമായി പങ്കുവെക്കാറുണ്ട്.
Story Summary: South Indian actress Anjali shared a heartfelt post on social media celebrating the first birthday of her pet dog, Niko. Describing her pets Niko and Polo as her “sons,” she expressed how they have transformed her life with joy and mischief, garnering warm responses from her followers.
