ഭോപ്പാൽ: ക്ഷേത്രത്തിലേക്ക് നൽകാൻ ആവശ്യപ്പെട്ട ഗോതമ്പിന്റെ അളവ് കുറഞ്ഞുപോയെന്നാരോപിച്ച് മധ്യപ്രദേശിലെ ഛത്തർപൂരിൽ ദളിത് കുടുംബത്തിന് നേരെ ആക്രമണം (Dalit Family Attacked Madhya Pradesh). ഛത്തർപൂർ ജില്ലയിലെ മഹാരാജ്ഗഞ്ച് ഗ്രാമത്തിലാണ് സ്ത്രീകളും കുട്ടികളുമടങ്ങുന്ന അഞ്ചംഗ കുടുംബത്തെ ഒരു സംഘം ആളുകൾ ക്രൂരമായി മർദിച്ചത്. സംഭവത്തിൽ നാല് പ്രതികളെ പോലീസ് അറസ്റ്റ് ചെയ്തു.
ക്ഷേത്രത്തിലേക്കുള്ള സംഭാവനയായി ഗോതമ്പ് ശേഖരിക്കാൻ എത്തിയ സംഘം കുടുംബത്തോട് വലിയൊരു അളവ് ഗോതമ്പ് ആവശ്യപ്പെട്ടു. എന്നാൽ അത്രയും നൽകാൻ സാധിക്കില്ലെന്ന് അറിയിച്ചതോടെയാണ് സംഘം അക്രമാസക്തരായത്.
“ഞങ്ങൾക്ക് നൽകാൻ കഴിയുന്നതിന്റെ പരമാവധി ഞങ്ങൾ നൽകി. ബാക്കിയുള്ളത് കൂടി നൽകിയാൽ എന്റെ മക്കൾക്ക് ഞാൻ എന്ത് കൊടുക്കും എന്ന് ചോദിച്ചതോടെയാണ് അവർ മർദനം തുടങ്ങിയത്” എന്ന് പരിക്കേറ്റ ഗൃഹനാഥൻ പറഞ്ഞു. കുടുംബാംഗങ്ങളെ വീട്ടിൽ നിന്ന് പുറത്തേക്ക് വലിച്ചിഴച്ച അക്രമികൾ വടി, കല്ല്, ഇഷ്ടിക എന്നിവ ഉപയോഗിച്ചാണ് മർദിച്ചത്. പരിക്കേറ്റ അഞ്ചുപേരെയും ആശുപത്രിയിൽ പ്രവേശിച്ചു.
ശ്യാം പട്ടേൽ, ഹർദയാൽ പട്ടേൽ, കൃപാൽ പട്ടേൽ തുടങ്ങി ഒരു സംഘം ആളുകളാണ് തങ്ങളെ ആക്രമിച്ചതെന്ന് കുടുംബം പോലീസിന് നൽകിയ മൊഴിയിൽ പറയുന്നു. മർദനത്തിന് ശേഷം വീട്ടിലുണ്ടായിരുന്ന ഗോതമ്പ് ഇവർ നിർബന്ധപൂർവ്വം കടത്തിക്കൊണ്ടുപോയതായും ആരോപണമുണ്ട്.
സംഭവത്തിൽ ആറ് പേർക്കെതിരെ കേസ് രജിസ്റ്റർ ചെയ്തതായും ഇതിൽ നാല് പേരെ ഇതിനോടകം അറസ്റ്റ് ചെയ്തതായും പോലീസ് അറിയിച്ചു. പ്രതികൾക്കെതിരെ ഇന്ത്യൻ ശിക്ഷാ നിയമത്തിലെ വിവിധ വകുപ്പുകൾക്ക് പുറമെ എസ്.സി/എസ്.ടി (പീഡന നിരോധന) നിയമപ്രകാരവും കേസെടുത്തിട്ടുണ്ട്. ഒളിവിലുള്ള മറ്റ് പ്രതികൾക്കായി തിരച്ചിൽ ഊർജിതമാക്കിയതായി ജില്ലാ പോലീസ് അധികൃതർ വ്യക്തമാക്കി.
Story Summary: A Dalit family in Chhatarpur, Madhya Pradesh, was brutally attacked by a group of men after they refused to donate the requested amount of wheat for a temple. Five family members, including women and children, were injured. Police have arrested four suspects and registered a case under the SC/ST Act.
