സൂറത്ത്: മുംബൈ – ഡൽഹി ദേശീയ പാതയിൽ വാഹനങ്ങൾക്ക് നിർത്താതെ കടന്നുപോകാൻ സാധിക്കുന്ന ഇന്ത്യയിലെ ആദ്യത്തെ ബാരിയർ രഹിത ടോൾ പ്ലാസ പ്രവർത്തനമാരംഭിച്ചു. ഗുജറാത്തിലെ സൂറത്തിനും ബറൂച്ചിനുമിടയിലുള്ള ചോര്യാസി ടോൾ പ്ലാസയിലാണ് ഈ നൂതന സംവിധാനം നടപ്പിലാക്കിയിരിക്കുന്നത്. ഫെബ്രുവരി 2 മുതൽ നടന്ന പരീക്ഷണ ഓട്ടത്തിന് ശേഷമാണ് ഇപ്പോൾ ഇത് പൂർണ്ണതോതിൽ സജ്ജമായത്.(Mumbai-Delhi National Highway Gets India’s First Barrier-Free Toll Plaza)
മൾട്ടി-ലെയ്ൻ ഫ്രീ ഫ്ലോ സാങ്കേതികവിദ്യ അടിസ്ഥാനമാക്കിയാണ് ഈ സംവിധാനം പ്രവർത്തിക്കുന്നത്. ടോൾ പ്ലാസകളിൽ സാധാരണ കാണാറുള്ള ബാരിയറുകൾ ഇവിടെ ഉണ്ടാകില്ല. പകരം, റോഡിന് മുകളിലായി സ്ഥാപിച്ചിട്ടുള്ള ഗാൻട്രികളിലെ അത്യാധുനിക ക്യാമറകളും സെൻസറുകളും വാഹനങ്ങൾ കടന്നുപോകുമ്പോൾ തന്നെ വിവരങ്ങൾ ശേഖരിക്കും.
ഓട്ടോമാറ്റിക് നമ്പർ പ്ലേറ്റ് റെക്കഗ്നിഷൻ വഴി വാഹനത്തിന്റെ നമ്പർ പ്ലേറ്റ് സ്കാൻ ചെയ്യും. ആർഎഫ്ഐഡി സെൻസറുകൾ ഫാസ്ടാഗ് വിവരങ്ങൾ വായിച്ച് ബന്ധിപ്പിച്ച ബാങ്ക് അക്കൗണ്ടിൽ നിന്ന് തുക സ്വയം കുറയ്ക്കും. മണിക്കൂറിൽ 80 കിലോമീറ്റർ വേഗതയിൽ പോകുന്ന വാഹനങ്ങളുടെ ടോൾ പോലും ഇത്തരത്തിൽ കൃത്യമായി ശേഖരിക്കാനാകും. ഫാസ്ടാഗ് ഇല്ലാത്ത വാഹനങ്ങളെ നമ്പർ പ്ലേറ്റ് വഴി തിരിച്ചറിഞ്ഞ് ഉടമയ്ക്ക് ഇലക്ട്രോണിക് നോട്ടീസ് അയക്കും.
2026 അവസാനത്തോടെ രാജ്യത്തെ 1,050-ലധികം ടോൾ പ്ലാസകൾ ഇത്തരത്തിൽ ആർട്ടിഫിഷ്യൽ ഇന്റലിജൻസ് അധിഷ്ഠിത ബാരിയർ രഹിത സംവിധാനത്തിലേക്ക് മാറ്റാനാണ് കേന്ദ്ര സർക്കാർ ലക്ഷ്യമിടുന്നത്. സൂറത്തിലെ പ്ലാസ ഇതിന്റെ പൈലറ്റ് പ്രോജക്റ്റാണെന്ന് കേന്ദ്ര ഉപരിതല ഗതാഗത മന്ത്രി നിതിൻ ഗഡ്കരി നേരത്തെ വ്യക്തമാക്കിയിരുന്നു.
ടോൾ പ്ലാസകളിലെ ക്യൂ ഒഴിവാകുന്നതിലൂടെ പ്രതിവർഷം 1,500 കോടി രൂപയുടെ ഇന്ധന ലാഭം പ്രതീക്ഷിക്കുന്നു. വാഹനങ്ങൾ നിർത്തേണ്ടതില്ലാത്തതിനാൽ യാത്രാസമയം ഗണ്യമായി കുറയും. ടോൾ പിരിവ് കൂടുതൽ കാര്യക്ഷമമാകുന്നതിലൂടെ പ്രതിവർഷം 6,000 കോടി രൂപയുടെ അധിക വരുമാനവും അധികൃതർ പ്രതീക്ഷിക്കുന്നു.
