ടെഹ്റാൻ: ഇറാൻ നേതൃത്വത്തിനുള്ളിൽ ഭിന്നതയുണ്ടെന്ന അമേരിക്കൻ പ്രസിഡന്റ് ഡൊണാൾഡ് ട്രംപിന്റെ അവകാശവാദങ്ങളെ തള്ളി പുതിയ പരമോന്നത നേതാവ് മുജ്തബ ഖമേനി ( Mojtaba Khamenei Unity Message). യുഎസ്-ഇസ്രായേൽ ആക്രമണത്തിൽ കൊല്ലപ്പെട്ട പിതാവ് അലി ഖമേനിക്ക് പിന്നാലെ അധികാമേറ്റ മുജ്തബ, സോഷ്യൽ മീഡിയ പ്ലാറ്റ്ഫോമായ എക്സിലൂടെയാണ് രാജ്യത്തിന്റെ ഐക്യത്തെക്കുറിച്ച് സന്ദേശം നൽകിയത്.
ശത്രുക്കളുടെ കുപ്രചാരണങ്ങൾ ഇറാന്റെ ദേശീയ ഐക്യത്തെ തകർക്കാനാണെന്നും എന്നാൽ ഇറാൻ ജനത കൂടുതൽ കരുത്തോടെ ഒറ്റക്കെട്ടായി നിൽക്കുമെന്നും അദ്ദേഹം പറഞ്ഞു. ശത്രുക്കളുടെ മാധ്യമ യുദ്ധങ്ങൾ ജനമനസ്സുകളെ തളർത്താൻ ഉദ്ദേശിച്ചുള്ളതാണെന്നും അദ്ദേഹം മുന്നറിയിപ്പ് നൽകി. ആക്രമണത്തിൽ മുജ്തബയ്ക്ക് ഗുരുതരമായ പരിക്കേറ്റതായാണ് റിപ്പോർട്ടുകൾ. മുഖത്തും ചുണ്ടുകൾക്കും പൊള്ളലേറ്റ അദ്ദേഹത്തിന് പ്ലാസ്റ്റിക് സർജറി ആവശ്യമാണെന്നും കാലിനും കൈയ്ക്കും ഇതിനോടകം ശസ്ത്രക്രിയകൾ നടത്തിയതായും വിവരമുണ്ട്. അധികാമേറ്റ ശേഷം അദ്ദേഹം ഇതുവരെ പൊതുവേദിയിൽ പ്രത്യക്ഷപ്പെട്ടിട്ടില്ല. ഇറാന്റെ സൈനിക-രാഷ്ട്രീയ നേതൃത്വത്തിനുള്ളിൽ കടുത്ത അഭിപ്രായവ്യത്യാസങ്ങളുണ്ടെന്നാണ് ഡൊണാൾഡ് ട്രംപ് അവകാശപ്പെട്ടത്.
എന്നാൽ ഇത് തള്ളിയ ഇറാൻ പ്രസിഡന്റ് മസൂദ് പെസെഷ്കിയൻ, ഇറാനിൽ തീവ്രവാദികളെന്നോ മിതവാദികളെന്നോ ഉള്ള വേർതിരിവില്ലെന്നും എല്ലാവരും വിപ്ലവകാരികളാണെന്നും വ്യക്തമാക്കി. ഇതിനിടെ, ഹോർമുസ് കടലിടുക്കിലെ ഇറാന്റെ ചെറിയ ബോട്ടുകളെ കണ്ടാലുടൻ വെടിവെച്ച് വീഴ്ത്താൻ ട്രംപ് യുഎസ് സൈന്യത്തിന് ഉത്തരവിട്ടു. ഇന്ത്യൻ സമുദ്രത്തിൽ ഇറാനുമായി ബന്ധമുള്ള എണ്ണക്കപ്പൽ അമേരിക്ക പിടിച്ചെടുത്തതായും റിപ്പോർട്ടുകളുണ്ട്. ഇറാൻ-അമേരിക്ക സംഘർഷം പുതിയ തലങ്ങളിലേക്ക് നീങ്ങുന്ന സാഹചര്യത്തിൽ മുജ്തബയുടെ സന്ദേശം ആഗോള രാഷ്ട്രീയത്തിൽ വലിയ പ്രാധാന്യത്തോടെയാണ് നിരീക്ഷിക്കപ്പെടുന്നത്.
Summary: Iran’s new Supreme Leader Mojtaba Khamenei issued a “unity” message to the US, dismissing Donald Trump’s claims of a leadership rift in Tehran. Despite suffering severe injuries and facial disfigurement from US-Israeli strikes—which also killed his father Ali Khamenei—Mojtaba used social media to warn against “enemy media operations.” Iran’s President Masoud Pezeshkian supported this, stating there are no divides between hardliners and moderates. Meanwhile, tensions escalated as Trump ordered the US military to engage Iranian boats in the Strait of Hormuz and seized a tanker linked to Iran in the Indian Ocean.
