ന്യൂഡൽഹി: രാജ്യതലസ്ഥാനത്തെ നടുക്കി സീനിയർ ഐആർഎസ് (IRS) ഉദ്യോഗസ്ഥന്റെ 21 വയസ്സുകാരിയായ മകളെ വീട്ടിനുള്ളിൽ കൊല്ലപ്പെട്ട നിലയിൽ കണ്ടെത്തി (Delhi murder). തെക്കുകിഴക്കൻ ഡൽഹിയിലെ കൈലാഷ് ഹിൽസിലെ ആഡംബര വസതിയിൽ ബുധനാഴ്ച രാവിലെയാണ് ദാരുണമായ സംഭവം നടന്നത്. എൻജിനീയറിംഗ് ബിരുദധാരിയായ യുവതി യുപിഎസ്സി (UPSC) പരീക്ഷയ്ക്കുള്ള തയ്യാറെടുപ്പിലായിരുന്നു.
യുവതിയെ ലൈംഗിക അതിക്രമത്തിന് ഇരയാക്കിയ ശേഷം മൊബൈൽ ചാർജർ കേബിൾ ഉപയോഗിച്ച് ശ്വാസം മുട്ടിച്ച് കൊലപ്പെടുത്തിയതാണെന്ന് പോലീസ് സംശയിക്കുന്നു. തലയ്ക്ക് കനത്ത ആയുധം കൊണ്ട് അടിയേറ്റതിന്റെ പാടുകളും മൃതദേഹത്തിലുണ്ട്.
വീട്ടിലെ മുൻ ജീവനക്കാരനായ രാഹുൽ മീണ (19) ആണ് കൊലപാതകത്തിന് പിന്നിലെന്ന് പോലീസ് ഉറച്ചു വിശ്വസിക്കുന്നു. സാമ്പത്തിക ക്രമക്കേടുകളെത്തുടർന്ന് ആറ് ആഴ്ചകൾക്ക് മുൻപാണ് ഇയാളെ ജോലിയിൽ നിന്ന് പിരിച്ചുവിട്ടത്. ബുധനാഴ്ച പുലർച്ചെ ആറ് മണിയോടെ മാതാപിതാക്കൾ ജിമ്മിൽ പോയ സമയം നോക്കിയാണ് പ്രതി ഉള്ളിൽ കടന്നത്. പുലർച്ചെ 6.15-നും 7.15-നുമിടയിൽ പ്രതി വീട്ടിൽ കയറുന്നതിന്റെയും പുറത്തുപോകുന്നതിന്റെയും ദൃശ്യങ്ങൾ സിസിടിവിയിൽ പതിഞ്ഞിട്ടുണ്ട്.
വീട്ടിലെ സുരക്ഷാ സംവിധാനങ്ങളെക്കുറിച്ചും കുടുംബത്തിന്റെ ദിനചര്യയെക്കുറിച്ചും വ്യക്തമായ ധാരണയുള്ള പ്രതി, പുറത്തു സൂക്ഷിച്ചിരുന്ന താക്കോൽ ഉപയോഗിച്ചാണ് വീട് തുറന്നതെന്ന് കരുതപ്പെടുന്നു. കൊലപാതകത്തിന് ശേഷം ഒളിവിൽ പോയ പ്രതിക്കായി ഡൽഹി പോലീസ് രാജസ്ഥാനിലെ ആൽവാറിൽ ഉൾപ്പെടെ തിരച്ചിൽ ഊർജ്ജിതമാക്കിയിട്ടുണ്ട്. കൊലപാതകത്തിന് തലേദിവസം ഇയാൾ രാജസ്ഥാനിൽ മറ്റൊരു പീഡനക്കേസിലും ഉൾപ്പെട്ടതായി വിവരമുണ്ട്. പോസ്റ്റ്മോർട്ടം റിപ്പോർട്ട് വന്നതിന് ശേഷം മാത്രമേ ലൈംഗിക അതിക്രമം സ്ഥിരീകരിക്കാനാവൂ എന്ന് പോലീസ് വ്യക്തമാക്കി.
Summary: The 21-year-old daughter of a senior IRS officer was found murdered in her Kailash Hills home, Delhi, while her parents were away at the gym. Police suspect a former domestic help, Rahul Meena, who allegedly strangled her with a mobile charger cable after a violent struggle and suspected sexual assault.
