ടെഹ്റാൻ: ഒമാൻ ഉൾക്കടലിൽ വെച്ച് യുഎസ് സൈന്യം പിടിച്ചെടുത്ത ഇറാനിയൻ കപ്പലായ ‘തൂസ്ക’യിൽ സൈനിക ആവശ്യങ്ങൾക്കും വ്യവസായ ആവശ്യങ്ങൾക്കും ഒരുപോലെ ഉപയോഗിക്കാവുന്ന ഉപകരണങ്ങൾ ഉണ്ടെന്ന് സംശയിക്കുന്നതായി റിപ്പോർട്ട് (Seized Iranian Ship Touska). ചൈനയിൽ നിന്നുള്ള യാത്രാമധ്യേ കഴിഞ്ഞ ഞായറാഴ്ചയാണ് ചബാഹർ തുറമുഖത്തിന് സമീപം വെച്ച് യുഎസ് സെൻട്രൽ കമാൻഡ് ഈ കപ്പൽ പിടിച്ചെടുത്തത്.
ലോഹങ്ങൾ, പൈപ്പുകൾ, ഇലക്ട്രോണിക് ഘടകങ്ങൾ തുടങ്ങിയവയാണ് കപ്പലിലുണ്ടാകാൻ സാധ്യതയുള്ള ‘ഡ്യൂവൽ യൂസ്’ ഇനങ്ങൾ എന്ന് കരുതപ്പെടുന്നു. ഇറാൻ ഷിപ്പിംഗ് ലൈൻസ് (IRISL) ഗ്രൂപ്പിന്റെ ഭാഗമായ ഈ കപ്പലിന് നേരത്തെയും ഇത്തരം ചരക്കുകൾ കടത്തിയ ചരിത്രമുണ്ടെന്ന് സുരക്ഷാ വൃത്തങ്ങൾ സൂചിപ്പിക്കുന്നു. ആറ് മണിക്കൂർ നീണ്ട മുന്നറിയിപ്പുകൾ അവഗണിച്ചതിനെത്തുടർന്നാണ് കപ്പൽ പിടിച്ചെടുത്തതെന്ന് യുഎസ് സൈന്യം അറിയിച്ചു. യുഎസ് ഏർപ്പെടുത്തിയ ഉപരോധം ലംഘിച്ചതിനാണ് നടപടി. യുഎസ് മറൈൻ കമാൻഡോകൾ ഹെലികോപ്റ്ററിൽ നിന്ന് കപ്പലിലേക്ക് ഇറങ്ങുന്ന ദൃശ്യങ്ങൾ പുറത്തുവിട്ടിട്ടുണ്ട്. കപ്പൽ പിടിച്ചെടുത്തത് ‘സായുധ കടൽക്കൊള്ള’ ആണെന്ന് ഇറാൻ ആരോപിച്ചു. കപ്പലിലെ
ജീവനക്കാരെയും അവരുടെ കുടുംബാംഗങ്ങളെയും ഉടൻ വിട്ടയക്കണമെന്ന് ഇറാൻ വിദേശകാര്യ മന്ത്രാലയം ആവശ്യപ്പെട്ടു. ഈ നടപടി നിലവിലുള്ള വെടിനിർത്തൽ കരാറിന്റെ ലംഘനമാണെന്നും അവർ മുന്നറിയിപ്പ് നൽകി. കപ്പൽ തടഞ്ഞുവെച്ചതിൽ ചൈന ആശങ്ക രേഖപ്പെടുത്തി. ചൈനയിലെ തായ്കാങ്, ഗാവോലാൻ തുറമുഖങ്ങളിൽ നിന്നാണ് കപ്പൽ ചരക്ക് കയറ്റിയത്. മലേഷ്യയിലും കപ്പൽ അടുത്തിരുന്നു. യുഎസ് പ്രസിഡന്റ് ഡൊണാൾഡ് ട്രംപ് ഈ നടപടിയെ ന്യായീകരിച്ചു. കപ്പലിൽ നിയമവിരുദ്ധമായ ചരക്കുകൾ ഉണ്ടോ എന്ന് പരിശോധിച്ചു വരികയാണെന്ന് അദ്ദേഹം വ്യക്തമാക്കി. ഇറാനിലേക്കുള്ള ചരക്ക് നീക്കത്തിന്മേൽ യുഎസ് ഏർപ്പെടുത്തിയ കർശനമായ നാവിക ഉപരോധത്തിന്റെ ഭാഗമാണ് ഈ നടപടി.
Summary: The Iranian-flagged container ship ‘Touska’, seized by U.S. forces in the Gulf of Oman, is suspected of carrying “dual-use” items suitable for both military and industrial purposes. The vessel, operated by the sanctioned IRISL, was intercepted after a voyage from China and Malaysia. While U.S. Central Command cites blockade violations, Iran has condemned the move as “armed piracy” and a breach of the current ceasefire. China has also expressed concern over the interception of the commercial vessel.
