ചെന്നൈ: തമിഴക വെട്രി കഴകം അധ്യക്ഷനും നടനുമായ വിജയ്ക്കെതിരെ രൂക്ഷമായ പരിഹാസവുമായി മുതിർന്ന നടൻ സത്യരാജ്. തമിഴ്നാട് മുഖ്യമന്ത്രി എം.കെ. സ്റ്റാലിനെ വിജയ് ‘സ്റ്റാലിൻ അങ്കിൾ’ എന്ന് വിളിച്ചതിനെ വിമർശിക്കവെയാണ് സത്യരാജിന്റെ വിവാദ പരാമർശം (Sathyaraj Vijay Controversy). വിജയ് നായകനാകുന്ന ‘ജനനായകൻ’ എന്ന ചിത്രത്തിന്റെ റിലീസ് വൈകുന്നതുമായി ബന്ധപ്പെട്ട രാഷ്ട്രീയ തർക്കങ്ങളാണ് ഇരുവരും തമ്മിലുള്ള വാക്പോരിലേക്ക് നയിച്ചത്.
മുഖ്യമന്ത്രിയെ ബഹുമാനിക്കാതെ ‘അങ്കിൾ’ എന്ന് പരിഹാസരൂപേണ വിളിച്ച വിജയ്യുടെ നടപടി തെറ്റാണെന്ന് സത്യരാജ് പറഞ്ഞു. സ്റ്റാലിനോട് വിജയ് ബഹുമാനം കാട്ടുമെന്ന് താൻ കരുതിയിരുന്നുവെന്നും എന്നാൽ അതുണ്ടായില്ലെന്നും ഡിഎംകെ അനുഭാവിയായ സത്യരാജ് വ്യക്തമാക്കി. മുൻ മുഖ്യമന്ത്രി ജയലളിതയുടെ കാലത്തെ സംഭവങ്ങൾ സത്യരാജ് ഓർമ്മിപ്പിച്ചു. 2013-ൽ ‘തലൈവാ’ സിനിമയുടെ റിലീസ് തടഞ്ഞപ്പോൾ ജയലളിതയോട് വിജയ് മാപ്പപേക്ഷിച്ചിരുന്നു. അന്ന് ജയലളിതയെ ‘ആൻ്റി’ എന്നാണ് വിജയ് വിളിച്ചിരുന്നതെങ്കിൽ അദ്ദേഹം ‘കൊത്തുപൊറോട്ട’യെപ്പോലെ പിച്ചിച്ചീന്തപ്പെടുമായിരുന്നുവെന്ന് സത്യരാജ് പരിഹസിച്ചു.
അന്ന് അങ്ങനെ സംഭവിച്ചിരുന്നെങ്കിൽ ‘നാ റെഡി ധാ’ എന്ന പാട്ടിന് പകരം ‘മുട്ട പൊറോട്ട’യെക്കുറിച്ചുള്ള പാട്ടായിരിക്കും വിജയ്ക്ക് പാടേണ്ടി വരികയെന്നും സത്യരാജ് കൂട്ടിച്ചേർത്തു. പ്രതിഷേധവുമായി ആരാധകർ: സത്യരാജിന്റെ വാക്കുകൾക്കെതിരെ വിജയ് ആരാധകർ സോഷ്യൽ മീഡിയയിൽ കടുത്ത പ്രതിഷേധവുമായി രംഗത്തെത്തിയിട്ടുണ്ട്. ഒരു മുതിർന്ന നടൻ രാഷ്ട്രീയ വൈരാഗ്യത്തിന്റെ പേരിൽ ഇത്രയും തരംതാഴ്ന്ന രീതിയിൽ സംസാരിക്കാൻ പാടില്ലെന്നാണ് ഇവരുടെ വാദം. അതിനിടെ സത്യരാജിന്റെ മകൻ സിബിരാജ് വിജയ്ക്ക് പിന്തുണയുമായി രംഗത്തെത്തിയത് ശ്രദ്ധേയമായി. വെറുപ്പ് പ്രചരിപ്പിക്കുന്നവർക്ക് മുൻപിൽ മൗനം പാലിക്കുന്നതാണ് നല്ലതെന്ന സിബിയുടെ പോസ്റ്റ് പിതാവിനുള്ള മറുപടിയായാണ് സിനിമാ ലോകം കാണുന്നത്.
Summary: Veteran actor Sathyaraj has harshly criticized TVK leader Vijay for his recent comments against Tamil Nadu CM M.K. Stalin. Referring to Vijay calling the CM “Stalin Uncle,” Sathyaraj remarked that had Vijay addressed former CM Jayalalithaa as “Aunty,” he would have been “shredded like Kothu Parotta” by her supporters. He reminded Vijay of how he apologized to Jayalalithaa during the ‘Thalaivaa’ release crisis. While Vijay fans are protesting Sathyaraj’s comments, the actor’s son, Sibiraj, shared a supportive post for Vijay, advocating silence in the face of hatred.
