ന്യൂഡൽഹി: ലബനനിലെ യുഎൻ മിഷനിലെ (UNIFIL Lebanon) ഫ്രഞ്ച് സമാധാന സേനാംഗങ്ങൾക്ക് നേരെ നടന്ന ആക്രമണത്തെ ഇന്ത്യ ശക്തമായി അപലപിച്ചു. ആക്രമണത്തിൽ വീരമൃത്യു വരിച്ച സൈനികന് ആദരാഞ്ജലി അർപ്പിച്ച ഇന്ത്യ, പരിക്കേറ്റ മറ്റ് മൂന്ന് പേർ എത്രയും വേഗം സുഖം പ്രാപിക്കട്ടെയെന്നും ആശംസിച്ചു. വിദേശകാര്യ മന്ത്രാലയമാണ് ഇത് സംബന്ധിച്ച ഔദ്യോഗിക പ്രസ്താവന പുറത്തിറക്കിയത്.
സമാധാന സേനാംഗങ്ങൾക്ക് എതിരെയുള്ള കുറ്റകൃത്യങ്ങളിൽ കുറ്റവാളികളെ നിയമത്തിന് മുന്നിൽ കൊണ്ടുവരണമെന്ന് ഇന്ത്യ ആവശ്യപ്പെട്ടു. സമാധാന സേനയുടെ സുരക്ഷ ഉറപ്പാക്കുന്നതിനായി ഇന്ത്യ മുൻകൈയെടുത്ത് യുഎൻ രക്ഷാസമിതിയിൽ അവതരിപ്പിച്ച പ്രമേയം 2589 പ്രസ്താവനയിൽ പ്രത്യേകമായി പരാമർശിച്ചു. ഈ ആക്രമണത്തെക്കുറിച്ച് അടിയന്തര അന്വേഷണം വേണമെന്നും ഇത്തരം കുറ്റകൃത്യങ്ങളിൽ ഏർപ്പെടുന്നവർക്കെതിരെ ശക്തമായ നടപടി വേണമെന്നും ഇന്ത്യ വ്യക്തമാക്കി.
യുഎൻ കാര്യാലയങ്ങളുടെയും ഉദ്യോഗസ്ഥരുടെയും സുരക്ഷ ഉറപ്പാക്കേണ്ടത് അത്യാവശ്യമാണെന്ന് ഇന്ത്യ ആവർത്തിച്ചു. യുഎൻ രക്ഷാസമിതിയുടെ നിർദ്ദേശപ്രകാരം സമാധാന ദൗത്യത്തിൽ ഏർപ്പെട്ടിരിക്കുന്ന ഉദ്യോഗസ്ഥരുടെ സുരക്ഷ ഉറപ്പാക്കാൻ ബന്ധപ്പെട്ട എല്ലാ കക്ഷികളും പ്രതിജ്ഞാബദ്ധരാകണമെന്നും വിദേശകാര്യ മന്ത്രാലയം ആവശ്യപ്പെട്ടു.
Story Summary: India has strongly condemned the attack on French UN peacekeepers in Lebanon and called for an immediate investigation to bring the perpetrators to justice. Highlighting UN Resolution 2589, the Ministry of External Affairs emphasized the urgent need to ensure the safety and security of all UN personnel deployed in conflict zones.
