ഗീതയിലെ യുദ്ധതന്ത്രങ്ങൾ ക്രിക്കറ്റ് മൈതാനത്ത്; അമയ് ഖുറാസിയയുടെ പുസ്തകം മുഖ്യമന്ത്രി പ്രകാശനം ചെയ്തു | Amay Khurasiya New Book Release

ഭോപ്പാൽ: ഭഗവാൻ ശ്രീകൃഷ്ണൻ അർജ്ജുനന് നൽകിയ ഗീതാപദേശങ്ങൾ ആധുനിക ക്രിക്കറ്റിലെ സമ്മർദ്ദഘട്ടങ്ങളിൽ എങ്ങനെ പ്രയോഗിക്കാമെന്ന് വിവരിക്കുന്ന ’74 വർഷങ്ങൾക്ക് ശേഷം’ (74 Years Later) എന്ന പുസ്തകം പ്രകാശനം ചെയ്തു (Amay Khurasiya New Book Release). മുൻ ഇന്ത്യൻ താരവും കേരള ടീം പരിശീലകനുമായ അമയ് ഖുറാസിയയും മകൾ അമയ്സി കീർത്തി ഖുറാസിയയും ചേർന്ന് രചിച്ച പുസ്തകം മധ്യപ്രദേശ് മുഖ്യമന്ത്രി ഡോ. മോഹൻ യാദവാണ് പ്രകാശനം ചെയ്തത്.

ക്രിക്കറ്റിലെ സമ്മർദ്ദങ്ങൾ മറികടക്കാൻ ഏകാഗ്രതയും മാനസിക കരുത്തും എങ്ങനെ വർദ്ധിപ്പിക്കാം എന്നതിനെക്കുറിച്ച് പുസ്തകം പ്രതിപാദിക്കുന്നു. ഗീതയിലെ കാലാതീതമായ ഉപദേശങ്ങൾ കായിക മേഖലയ്ക്ക് എങ്ങനെ വഴികാട്ടിയാകുന്നു എന്നതാണ് ഇതിന്റെ ഇതിവൃത്തം. രഞ്ജി ട്രോഫിയുടെ 74 വർഷത്തെ ചരിത്രത്തിൽ ആദ്യമായി കേരളം ഫൈനലിൽ പ്രവേശിച്ചതും, ഒരേസമയം ആറ് കേരള താരങ്ങൾ ദുലീപ് ട്രോഫിയിലേക്ക് തിരഞ്ഞെടുക്കപ്പെട്ടതും താൻ നടപ്പിലാക്കിയ ഈ മൂല്യങ്ങളുടെ വിജയമാണെന്ന് അമയ് ഖുറാസിയ പുസ്തകത്തിൽ വിശദീകരിക്കുന്നു.

അനിൽ കുംബ്ലെ, രാഹുൽ ദ്രാവിഡ്, വി.വി.എസ്. ലക്ഷ്മൺ തുടങ്ങിയ ക്രിക്കറ്റ് ഇതിഹാസങ്ങൾക്കൊപ്പം മലയാളത്തിന്റെ മഹാനടൻ മോഹൻലാലും പുസ്തകത്തെക്കുറിച്ച് തങ്ങളുടെ അഭിപ്രായങ്ങൾ രേഖപ്പെടുത്തിയിട്ടുണ്ട്.

നിലവിൽ ഇംഗ്ലീഷ്, ഹിന്ദി ഭാഷകളിൽ ലഭ്യമായ ഈ ഗ്രന്ഥം കായിക താരങ്ങൾക്കും മാനസികാരോഗ്യം ആഗ്രഹിക്കുന്നവർക്കും ഒരു മികച്ച വഴികാട്ടിയായിരിക്കുമെന്ന് പ്രകാശന ചടങ്ങിൽ മുഖ്യമന്ത്രി പറഞ്ഞു. മുൻ ബിസിസിഐ സെക്രട്ടറി സഞ്ജയ് ജഗ്ദാലെ ഉൾപ്പെടെയുള്ള പ്രമുഖർ ചടങ്ങിൽ സംബന്ധിച്ചു.

Story Summary:
Madhya Pradesh CM Dr. Mohan Yadav released the book “74 Years Later,” co-authored by former Indian cricketer and Kerala coach Amay Khurasiya and his daughter Amaysi Keerti Khurasiya. The book explores how the teachings of the Bhagavad Gita can be applied to handle pressure in modern sports, specifically cricket. Khurasiya credits these spiritual strategies for Kerala’s historic run to the Ranji Trophy final. The book features insights from cricket legends like Rahul Dravid and Anil Kumble, as well as actor Mohanlal.