റിയാദ്: സുരക്ഷാ മുൻകരുതലിന്റെ ഭാഗമായി ചൊവ്വാഴ്ച രാവിലെ അടച്ചിട്ടിരുന്ന കിംഗ് ഫഹദ് കോസ്വേ ഉച്ചയോടെ വീണ്ടും ഗതാഗതത്തിനായി തുറന്നുകൊടുത്തു. മേഖലയിലെ അതീവ ജാഗ്രതാ നിർദ്ദേശത്തെത്തുടർന്ന് താൽക്കാലികമായി നിർത്തിവെച്ചിരുന്ന ഗതാഗതം, സുരക്ഷാ പരിശോധനകൾ പൂർത്തിയാക്കിയ ശേഷമാണ് പുനരാരംഭിച്ചത്.(King Fahd Causeway reopens, Traffic resumes after safety checks)
നിലവിൽ വാഹനങ്ങളുടെ തിരക്ക് നിയന്ത്രണവിധേയമായതായും കോസ്വേ വഴിയുള്ള ഗതാഗതം സാധാരണ നിലയിലായതായും കിംഗ് ഫഹദ് കോസ്വേ ജനറൽ അതോറിറ്റി ഔദ്യോഗികമായി സ്ഥിരീകരിച്ചു. പശ്ചിമേഷ്യയിലെ നിലവിലെ സംഘർഷാവസ്ഥ കണക്കിലെടുത്ത് നടത്തിയ കർശനമായ സുരക്ഷാ വിലയിരുത്തലുകൾക്ക് ശേഷമാണ് പാത തുറന്നുകൊടുക്കാൻ അധികൃതർ തീരുമാനിച്ചത്.
രാവിലെ പാത അടച്ചതിനെത്തുടർന്ന് വാഹനങ്ങളുടെ നീണ്ട നിര ദൃശ്യമായിരുന്നു. പാലം തുറന്നതോടെ യാത്രക്കാരും ചരക്കുനീക്കവും സുഗമമായിട്ടുണ്ട്. സൗദി അറേബ്യയെയും ബഹ്റൈനെയും ബന്ധിപ്പിക്കുന്ന 25 കിലോമീറ്റർ ദൈർഘ്യമുള്ള ഈ പാലം ഇരു രാജ്യങ്ങൾക്കുമിടയിലുള്ള ഏറ്റവും പ്രധാനപ്പെട്ട കരമാർഗ്ഗമാണ്.
