ന്യൂഡൽഹി: പശ്ചിമേഷ്യയിൽ യുദ്ധം രൂക്ഷമായ പശ്ചാത്തലത്തിലും തന്ത്രപ്രധാനമായ ഹോർമുസ് കടലിടുക്ക് വിജയകരമായി കടന്ന് ഇന്ത്യൻ എൽപിജി ടാങ്കർ ‘ഗ്രീൻ സാൻവി’ (Green Sanvi LPG Tanker India). യുദ്ധം ആരംഭിച്ച ശേഷം ഹോർമുസ് കടലിടുക്ക് സുരക്ഷിതമായി മറികടക്കുന്ന ഏഴാമത്തെ ഇന്ത്യൻ കപ്പലാണിത്. കപ്പൽ ഞായറാഴ്ചയോടെ ഇന്ത്യൻ തീരത്ത് എത്തുമെന്ന് ഷിപ്പിംഗ് മന്ത്രാലയം അറിയിച്ചു. 46,655 മെട്രിക് ടൺ ദ്രവീകൃത പെട്രോളിയം ഗ്യാസുമായി (LPG) ആണ് ഗ്രീൻ സാൻവി ഇന്ത്യയിലേക്ക് വരുന്നത്.
ഹോർമുസ് കടലിടുക്കിന്റെ പടിഞ്ഞാറ് ഭാഗത്ത് ഇനിയും 17 ഇന്ത്യൻ കപ്പലുകൾ കൂടി നാട്ടിലേക്ക് മടങ്ങാൻ കാത്തുനിൽക്കുന്നുണ്ട്. എൽപിജി ടാങ്കറുകളായ ‘ഗ്രീൻ ആശ’, ‘ജഗ് വിക്രം’ എന്നിവയാണ് ഇതിൽ പ്രധാനം. പേർഷ്യൻ ഗൾഫിലെ അബു മൂസ ദ്വീപിന് സമീപം വടക്കുകിഴക്കൻ മേഖലയിലുള്ള ഈ കപ്പലുകൾ ഇന്ത്യൻ നാവികസേനയുടെ അന്തിമ അനുമതിക്കായി കാത്തിരിക്കുകയാണ്.
യുദ്ധസാഹചര്യത്തിൽ കുടുങ്ങിക്കിടക്കുന്ന ഇന്ത്യൻ കപ്പലുകളുടെ സുരക്ഷിത യാത്ര ഉറപ്പാക്കാൻ ഇന്ത്യൻ നാവികസേന നിരന്തരമായ ശ്രമങ്ങൾ നടത്തിവരികയാണ്. ഗ്രീൻ ആശയും ജഗ് വിക്രമും ഉടൻ തന്നെ ഇന്ത്യയിലേക്ക് യാത്ര തിരിക്കുമെന്നാണ് വിവരം. ഹോർമുസ് കടലിടുക്കിലെ ഇറാൻ ഉപരോധവും മേഖലയിലെ സംഘർഷങ്ങളും നിലനിൽക്കെ, ഇന്ത്യൻ കപ്പലുകളുടെ സുരക്ഷിത മടക്കം രാജ്യത്തെ ഊർജ്ജ ലഭ്യത ഉറപ്പാക്കുന്നതിൽ നിർണ്ണായകമാണ്.
Story Summary:
The Indian LPG tanker ‘Green Sanvi’ successfully crossed the Strait of Hormuz, making it the seventh Indian vessel to do so since the regional conflict began. Carrying 46,655 metric tonnes of LPG, the ship is expected to reach Indian shores by Sunday. Currently, 17 more Indian ships, including LPG tankers ‘Green Asha’ and ‘Jag Vikram,’ remain positioned near Abu Musa Island, awaiting final clearance from the Indian Navy for their return journey.
