പൗരി: ഉത്തരാഖണ്ഡിലെ പൗരി ജില്ലയിൽ നാല് വയസ്സുകാരി പുള്ളിപ്പുലിയുടെ ആക്രമണത്തിൽ കൊല്ലപ്പെട്ടു (Uttarakhand Leopard Attack). പോഖ്റ മേഖലയിലെ ഭട്കോട്ട് ഗ്രാമത്തിൽ വ്യാഴാഴ്ച രാത്രി ഒമ്പത് മണിയോടെയാണ് ദാരുണമായ സംഭവം നടന്നത്. ദൃഷ്ടി റാവത്ത് എന്ന പെൺകുട്ടിയാണ് മരിച്ചത്.
വീടിന് പുറത്ത് സഹോദരിക്കും മുത്തശ്ശിക്കുമൊപ്പം ഭക്ഷണം കഴിച്ചുകൊണ്ടിരിക്കുകയായിരുന്നു ദൃഷ്ടി. ഈ സമയത്ത് കാട്ടിൽ നിന്നെത്തിയ പുള്ളിപ്പുലി പെട്ടെന്ന് കുട്ടിയെ കടന്നുപിടിക്കുകയും കാട്ടിലേക്ക് വലിച്ചിഴച്ചുകൊണ്ടുപോവുകയുമായിരുന്നു. വീട്ടുകാരും നാട്ടുകാരും ചേർന്ന് നടത്തിയ തിരച്ചിലിനൊടുവിൽ വീടിന് രണ്ട് കിലോമീറ്റർ അകലെ നിന്ന് കുട്ടിയുടെ മൃതദേഹം കണ്ടെടുത്തു.
സംഭവത്തിൽ ക്ഷുഭിതരായ ഗ്രാമവാസികൾ മുതിർന്ന ഉദ്യോഗസ്ഥർ സ്ഥലത്തെത്തണമെന്ന് ആവശ്യപ്പെട്ട് പ്രതിഷേധിച്ചു. വെള്ളിയാഴ്ച രാവിലെ സബ് ഡിവിഷണൽ മജിസ്ട്രേറ്റും ഡിവിഷണൽ ഫോറസ്റ്റ് ഓഫീസറും സ്ഥലത്തെത്തി കുടുംബത്തിന് സഹായം ഉറപ്പുനൽകിയ ശേഷമാണ് മൃതദേഹം പോസ്റ്റ്മോർട്ടത്തിന് വിട്ടുനൽകിയത്. പുള്ളിപ്പുലിയുടെ സാന്നിധ്യം ഭീഷണിയായ സാഹചര്യത്തിൽ പോഖ്റ, ബിരോൺഖൽ മേഖലകളിലെ സ്കൂളുകൾക്ക് ഏപ്രിൽ 4, ഏപ്രിൽ 6 തീയതികളിൽ അവധി പ്രഖ്യാപിച്ചു. കുട്ടികളുടെ സുരക്ഷ മുൻനിർത്തിയാണ് ജില്ലാ മജിസ്ട്രേറ്റ് അവധി നൽകാൻ ഉത്തരവിട്ടത്. വനംവകുപ്പ് മേഖലയിൽ നിരീക്ഷണം ശക്തമാക്കിയിട്ടുണ്ട്.
Summary: A four-year-old girl named Drishti Rawat was killed by a leopard in Bhatkot village, Uttarakhand, on Thursday night. The child was having a meal with her grandmother and sister when the leopard snatched her. Her body was later found two kilometers away. Following protests by villagers, authorities assured assistance to the family. Schools in the Pokhra and Bironkhal areas have been closed on April 4 and 6 as a safety precaution.
