പാരിസ്: ഡിസ്നിലാൻഡിൽ കുട്ടികളുടെ പ്രിയപ്പെട്ട കഥാപാത്രമായ ‘ഒലാഫ്’ റോബോട്ട് തകർന്നു വീഴുന്ന ദൃശ്യങ്ങൾ സമൂഹമാധ്യമങ്ങളിൽ വൈറലാകുന്നു (Olaf Robot Collapse Disneyland). പാരിസ് ഡിസ്നിലാൻഡിലെ പുതിയ ‘ഫ്രോസൺ’ തീം ഏരിയയിലാണ് സംഭവം നടന്നത്. മൂന്നടി ഉയരമുള്ള റോബോട്ട് സന്ദർശകരുമായി സംവദിക്കുന്നതിനിടെ പെട്ടെന്ന് പിന്നിലേക്ക് മറിഞ്ഞു വീഴുകയായിരുന്നു.
റോബോട്ട് വീണ ആഘാതത്തിൽ അതിന്റെ കാരറ്റ് മൂക്ക് തെറിച്ചുപോയത് കാണികളെ കൂടുതൽ അമ്പരപ്പിച്ചു. ഇത് കണ്ട ചില കുട്ടികൾ പേടിച്ച് കരഞ്ഞപ്പോൾ മറ്റു ചിലർക്ക് ഇതൊരു തമാശയായാണ് തോന്നിയത്. ഉടൻ തന്നെ ഡിസ്നിലാൻഡ് ജീവനക്കാർ സ്ഥലത്തെത്തി റോബോട്ടിനെയും അതിന്റെ ഭാഗങ്ങളെയും അവിടെ നിന്ന് മാറ്റി. ബെൽജിയൻ ഡിസ്നി ഫാൻ സൈറ്റായ മാജിക് ടൂർ ക്ലബ് പങ്കുവെച്ച വീഡിയോ ഇതിനോടകം 4.5 ദശലക്ഷത്തിലധികം ആളുകൾ കണ്ടുകഴിഞ്ഞു.
ഡിസ്നിയുടെ ഇമാജിനീയറിംഗ് ടീം വികസിപ്പിച്ചെടുത്ത ഈ റോബോട്ട് ആർട്ടിഫിഷ്യൽ ഇന്റലിജൻസ് ഉപയോഗിച്ചാണ് പ്രവർത്തിക്കുന്നത്. സിനിമയിലെ ഒലാഫിന്റെ അതേ ചലനങ്ങളും ഭാവങ്ങളും പ്രതിഫലിപ്പിക്കുന്ന രീതിയിലാണ് ഇതിന്റെ നിർമ്മാണം. മൃദുവായ ‘മഞ്ഞ്’ പോലുള്ള മെറ്റീരിയൽ ഉപയോഗിച്ചാണ് റോബോട്ടിന്റെ ശരീരം നിർമ്മിച്ചിരിക്കുന്നത്. റോബോട്ടിക് സാങ്കേതികവിദ്യയിൽ വലിയ മുന്നേറ്റമായി ഡിസ്നി അവതരിപ്പിച്ച ഒലാഫിന്റെ ഈ വീഴ്ച അധികൃതർക്ക് ചെറിയ തോതിൽ നാണക്കേടുണ്ടാക്കിയിട്ടുണ്ട്.
Animatronic Olaf collapses at Disneyland Paris’ newly-opened World of Frozen. pic.twitter.com/sNEadP9izY
— Pop Crave (@PopCrave) March 31, 2026
