ഒട്ടാവ: കാനഡയിലെ സറേയിൽ ഇന്ത്യൻ വംശജനായ യുവാവ് വെടിയേറ്റു മരിച്ചു (Indian Origin Killed Canada). സള്ളിവൻ ഹൈറ്റ്സിലെ ടൗൺഹൗസ് കോംപ്ലക്സിൽ രാത്രിയിലുണ്ടായ വെടിവെപ്പിൽ പഞ്ചാബ് സ്വദേശിയായ ജസ്മാൻ സെഖോൺ (27) ആണ് കൊല്ലപ്പെട്ടത്. സറേയിൽ കഴിഞ്ഞ 48 മണിക്കൂറിനുള്ളിൽ റിപ്പോർട്ട് ചെയ്യുന്ന നാലാമത്തെ വെടിവെപ്പ് സംഭവമാണിത്.
ലഹരിമരുന്ന് ഇടപാടുകളുമായി ബന്ധപ്പെട്ട് നേരത്തെ തന്നെ പോലീസിന്റെ നിരീക്ഷണത്തിലായിരുന്ന വ്യക്തിയാണ് ജസ്മാൻ സെഖോൺ. അതിനാൽ തന്നെ, ഇത് ഗുണ്ടാസംഘങ്ങൾ തമ്മിലുള്ള കുടിപ്പകയുടെ ഭാഗമായുള്ള ആസൂത്രിത കൊലപാതകമാണെന്ന് ഇന്റഗ്രേറ്റഡ് ഹോമിസൈഡ് ഇൻവെസ്റ്റിഗേഷൻ ടീം (IHIT) വിലയിരുത്തുന്നു.
ദൃക്സാക്ഷികൾ നൽകുന്ന വിവരമനുസരിച്ച്, കറുത്ത നിറത്തിലുള്ള എസ്യുവി കാറിൽ പിന്തുടർന്നെത്തിയ സംഘമാണ് ജസ്മാനെ ആക്രമിച്ചത്. വാഹനത്തിൽ നിന്നിറങ്ങിയ രണ്ട് പേർ ജസ്മാന് നേരെ വെടിയുതിർക്കുകയായിരുന്നു. സംഭവസ്ഥലത്തിന് സമീപത്ത് നിന്ന് കത്തിക്കരിഞ്ഞ നിലയിൽ ഒരു വാഹനം പോലീസ് കണ്ടെത്തിയിട്ടുണ്ട്. കൊലപാതകത്തിന് ശേഷം തെളിവ് നശിപ്പിക്കാനായി അക്രമികൾ വാഹനം ഉപേക്ഷിച്ചതാകാമെന്നാണ് പ്രാഥമിക നിഗമനം.
സറേയിൽ വർദ്ധിച്ചുവരുന്ന വെടിവെപ്പ് സംഭവങ്ങൾ പ്രവാസി മലയാളി സമൂഹത്തിനിടയിലും വലിയ ആശങ്കയ്ക്ക് കാരണമായിട്ടുണ്ട്. ഗുണ്ടാസംഘങ്ങൾ തമ്മിലുള്ള ഏറ്റുമുട്ടലുകൾ തടയാൻ കനേഡിയൻ പോലീസ് അന്വേഷണം ഊർജ്ജിതമാക്കി.
Story Summary:
Jasman Sekhon, a 27-year-old Indian-origin youth from Punjab, was shot dead in a targeted attack at Sullivan Heights, Surrey, Canada. Authorities suspect organized crime and drug-related rivalries behind the murder. This is the fourth shooting incident in Surrey within 48 hours. Police discovered a burnt vehicle nearby, suspected to be used by the assailants to destroy evidence.
