ന്യൂഡൽഹി: സമൂഹമാധ്യമങ്ങളിലെ ഇൻഫ്ലുവൻസർമാർക്ക് (Social Media Influencers) നിയന്ത്രണവുമായി കേന്ദ്രം. 2021-ലെ ഐടി ചട്ടത്തിൽ ഭേദഗതി വരുത്തിയാണ് കേന്ദ്ര വാർത്താവിതരണ മന്ത്രാലയം (MIB) പുതിയ നീക്കം നടത്തുന്നതെന്നാണ് ദേശീയ മാധ്യമങ്ങൾ റിപ്പോർട്ട് ചെയ്യുന്നത്. യൂട്യൂബ് ചാനലുകൾ നടത്തുന്നവർക്കും സമൂഹമാധ്യമങ്ങളിൽ വാർത്താപരമായ ഉള്ളടക്കം പോസ്റ്റ് ചെയ്യുന്നവർക്കും ഇനി മുതൽ ഡിജിറ്റൽ മാധ്യമ സ്ഥാപനങ്ങൾക്ക് തുല്യമായ ഉത്തരവാദിത്തം ഉണ്ടായിരിക്കും.
പുതിയ ഭേദഗതിയിലെ പ്രധാന നിർദ്ദേശങ്ങൾ ഇങ്ങനെ:
ഡിജിറ്റൽ മാധ്യമങ്ങൾക്ക് ബാധകമായ പരാതി പരിഹാര സംവിധാനങ്ങൾ ഇനി ഇൻഫ്ലുവൻസർമാർക്കും ബാധകമാകും. പോസ്റ്റ് ചെയ്യുന്ന ഉള്ളടക്കത്തിന്മേൽ ആരെങ്കിലും പരാതി നൽകിയാൽ ഇൻറർ-ഡിപ്പാർട്ട്മെന്റൽ കമ്മിറ്റി അത് പരിശോധിക്കും. നിയമവിരുദ്ധമോ പ്രശ്നബാധിതമോ ആയ ഉള്ളടക്കം നീക്കം ചെയ്യാൻ മന്ത്രാലയത്തിന് ഉത്തരവിടാം. കൂടാതെ മുന്നറിയിപ്പ് നൽകാനും പരസ്യമായി ക്ഷമാപണം ആവശ്യപ്പെടാനും സർക്കാരിന് അധികാരമുണ്ടാകും.
പരാതി ലഭിക്കുന്ന ഉള്ളടക്കം മാത്രമേ നീക്കം ചെയ്യാൻ സാധിക്കൂ, ഉപയോക്താവിന്റെ അക്കൗണ്ട് പൂർണ്ണമായി നീക്കം ചെയ്യാൻ കഴിയില്ല. എന്നാൽ അടിയന്തര സാഹചര്യങ്ങളിൽ ഐടി നിയമത്തിലെ 69A വകുപ്പ് ഉപയോഗിച്ച് കമ്മിറ്റിയുടെ ശുപാർശയില്ലാതെ തന്നെ ഉള്ളടക്കം നീക്കം ചെയ്യാൻ സർക്കാരിന് അധികാരമുണ്ടാകും.
നീക്കം ചെയ്ത ഉള്ളടക്കവുമായി ബന്ധപ്പെട്ട വിവരങ്ങൾ കമ്പനികൾ 180 ദിവസത്തേക്ക് സൂക്ഷിച്ചു വെക്കണമെന്ന വ്യവസ്ഥയും ഭേദഗതിയിൽ ഉൾപ്പെടുത്തിയിട്ടുണ്ട്.
വാർത്താ വിതരണ മന്ത്രാലയത്തിന് നേരിട്ടും വിഷയങ്ങൾ കമ്മിറ്റിയുടെ പരിഗണനയ്ക്ക് വിടാം. സ്വതന്ത്ര മാധ്യമപ്രവർത്തകർക്കും ഇൻഫ്ലുവൻസർമാർക്കും വലിയ വെല്ലുവിളി ഉയർത്തുന്നതാണ് ഈ നീക്കമെന്നാണ് വിലയിരുത്തപ്പെടുന്നത്.
Short Story Summary:
The Union Government has introduced a draft notification to bring social media influencers and regular users sharing news content under the ambit of the IT Rules 2021. This move implies that independent YouTube channels and digital platforms will now face the same regulatory oversight as digital news publishers. The Ministry of Information and Broadcasting (MIB) will have the authority to order the removal of problematic content, issue warnings, or demand apologies based on recommendations from an inter-departmental committee. Under Section 69A of the IT Act, the government can also exercise emergency powers to block content.
