കൊച്ചി: ഭവനനിർമ്മാണ പദ്ധതികളുമായി ബന്ധപ്പെട്ട് മുഖ്യമന്ത്രി പിണറായി വിജയൻ നടത്തിയ പരാമർശങ്ങൾക്കെതിരെ പ്രതിപക്ഷ നേതാവ് വി.ഡി. സതീശൻ രംഗത്തെത്തി (V D Satheesan vs Pinarayi Vijayan). ഉമ്മൻചാണ്ടി സർക്കാരിന്റെ കാലത്ത് നാല് ലക്ഷം വീടുകൾ നിർമ്മിച്ചെന്ന തന്റെ പ്രസ്താവന ‘യമണ്ടൻ നുണ’യാണെന്ന് പറഞ്ഞ മുഖ്യമന്ത്രിയാണ് യഥാർത്ഥത്തിൽ നുണ പറയുന്നതെന്ന് സതീശൻ ആരോപിച്ചു.
തന്നെ തകർക്കാനാണ് മുഖ്യമന്ത്രി ‘നുണേശൻ’ എന്ന് വിളിക്കുന്നത്. സിനിമയിൽ ശങ്കരാടി പറയുന്നതുപോലെ എങ്ങനെയെങ്കിലും തന്നെ കുടുക്കുക എന്നതാണ് മുഖ്യമന്ത്രിയുടെ ലക്ഷ്യം. നുണയാശാൻ എന്നാണോ ‘നുണറായി’ എന്നാണോ മുഖ്യമന്ത്രിയെ വിളിക്കേണ്ടതെന്ന് വരും ദിവസങ്ങളിൽ കാണാമെന്നും അദ്ദേഹം പറഞ്ഞു.
ഭവനനിർമ്മാണ കണക്കുകൾ ഉൾപ്പെടെയുള്ള വിഷയങ്ങളിൽ മുഖ്യമന്ത്രിയുമായി പരസ്യമായ സംവാദത്തിന് താൻ തയ്യാറാണ്. എപ്പോൾ വേണമെങ്കിലും മുഖ്യമന്ത്രിക്ക് തന്നെ വിളിക്കാം. ഉമ്മൻചാണ്ടി സർക്കാർ നിർമ്മിച്ച 50,000 വീടുകൾ കൂടി എൽഡിഎഫ് സർക്കാർ സ്വന്തം കണക്കിൽ പെടുത്തിയാണ് വീരവാദം മുഴക്കുന്നത്.
ജമാഅത്തെ ഇസ്ലാമിയുമായി ബന്ധമില്ലെന്ന മുഖ്യമന്ത്രിയുടെ വാദം വീഡിയോ തെളിവുകൾ സഹിതം താൻ പൊളിച്ചടുക്കിയതാണെന്നും സതീശൻ ഓർമ്മിപ്പിച്ചു.
തന്നെ ‘ഗീബൽസൻ’ എന്ന് വിളിച്ചെങ്കിലും മുഖ്യമന്ത്രിക്ക് പ്രായമുള്ളതുകൊണ്ട് താൻ തിരിച്ച് അങ്ങനെ വിളിക്കില്ലെന്നും വി.ഡി. സതീശൻ കൂട്ടിച്ചേർത്തു. തിരഞ്ഞെടുപ്പ് പ്രചാരണം അവസാനഘട്ടത്തിലേക്ക് കടക്കുമ്പോൾ മുഖ്യമന്ത്രിയും പ്രതിപക്ഷ നേതാവും തമ്മിലുള്ള ഈ വ്യക്തിപരമായ വാക്പോര് രാഷ്ട്രീയ രംഗത്ത് വലിയ ചർച്ചയാകുകയാണ്.
Short Story Summary:
Opposition Leader V.D. Satheesan hit back at CM Pinarayi Vijayan, calling him “Nunarayi” in response to the CM’s “Nuneshan” jibe. The conflict sparked over the number of houses built during the Oommen Chandy government. Satheesan challenged the CM to an open debate and accused the LDF of hijacking the credit for 50,000 houses built by the previous UDF government. He also referenced past video evidence to debunk the CM’s claims regarding Jamat-e-Islami.
