ചെന്നൈ: തമിഴ്നാട് നിയമസഭാ തിരഞ്ഞെടുപ്പിൽ എഐഎഡിഎംകെ അനുവദിച്ച മണ്ഡലങ്ങളുടെ കാര്യത്തിൽ ബിജെപി ദേശീയ നേതൃത്വത്തെ അതൃപ്തി അറിയിച്ച് മുൻ സംസ്ഥാന അധ്യക്ഷൻ കെ. അണ്ണാമലൈ. ഇത്തവണ താൻ മത്സരിക്കാനില്ലെന്നും അതിനാൽ തനിക്കായി പ്രത്യേക മണ്ഡലം കണ്ടെത്തേണ്ടതില്ലെന്നും അദ്ദേഹം നേതൃത്വത്തോട് ആവശ്യപ്പെട്ടതായാണ് വിവരം. എങ്കിലും, ബിജെപിയുടെയും എൻഡിഎയുടെയും എല്ലാ സ്ഥാനാർത്ഥികൾക്കുമായി ഒരു പാർട്ടി ‘കാര്യകർത്താവായി’ താൻ തുടർന്നും പ്രവർത്തിക്കുമെന്ന് അദ്ദേഹം വ്യക്തമാക്കി.(Deeply dissatisfied with seat sharing, K Annamalai says he will not contest
മറ്റ് രണ്ട് സഖ്യകക്ഷികൾക്ക് സീറ്റുകൾ നൽകിയ ശേഷമാണ് ബിജെപിയോട് താല്പര്യമുള്ള മണ്ഡലങ്ങളെക്കുറിച്ച് എഐഎഡിഎംകെ ചോദിച്ചതെന്ന് അണ്ണാമലൈ കരുതുന്നു. ഇത് പാർട്ടിയെ തഴയുന്നതിന് തുല്യമാണെന്നാണ് അദ്ദേഹത്തിന്റെ പക്ഷം.
എഐഎഡിഎംകെ എംഎൽഎമാർ നിലവിലുള്ള സീറ്റുകൾ ചോദിക്കാൻ പാടില്ലെന്ന നിബന്ധന ബിജെപിയുടെ വിജയസാധ്യതകളെയും താല്പര്യങ്ങളെയും പരിമിതപ്പെടുത്തിയതായി അദ്ദേഹം നേതൃത്വത്തിന് അയച്ച സന്ദേശത്തിൽ പറയുന്നു. ബിജെപിക്ക് സ്വാധീനമുള്ളതോ വളർച്ചാ സാധ്യതയുള്ളതോ ആയ മണ്ഡലങ്ങളല്ല നിലവിൽ അനുവദിച്ചിരിക്കുന്നത്. തിരുവണ്ണാമലൈ പോലുള്ള സീറ്റുകൾ ബിജെപിക്ക് നൽകുന്നത് ഭരണകക്ഷിയായ ഡിഎംകെയ്ക്ക് മാത്രമേ ഗുണം ചെയ്യൂ എന്നും അണ്ണാമലൈ ചൂണ്ടിക്കാട്ടി. പാർട്ടി ശക്തിപ്പെടുന്നതിന് പകരം ദുർബലമായ മണ്ഡലങ്ങൾ ഏറ്റെടുക്കുന്നത് ഗുണകരമാകില്ലെന്ന കർക്കശ നിലപാടിലാണ് അണ്ണാമലൈ. അദ്ദേഹത്തിന്റെ ഈ പിന്മാറ്റം തമിഴ്നാട് ബിജെപിയിൽ വലിയ ചർച്ചകൾക്ക് വഴിവെച്ചിരിക്കുകയാണ്.
