ന്യൂഡൽഹി: ഇസ്രായേൽ-ഇറാൻ സംഘർഷം രൂക്ഷമായ പശ്ചാത്തലത്തിൽ ഗൾഫ് രാജ്യങ്ങളിലെ സിബിഎസ്ഇ പന്ത്രണ്ടാം ക്ലാസ് പരീക്ഷകൾ വീണ്ടും മാറ്റിവെച്ചു (CBSE Class 12 exam postponed Gulf March 2026). മാർച്ച് 12 മുതൽ 16 വരെ നടക്കാനിരുന്ന പരീക്ഷകളാണ് പുതുക്കിയ സർക്കുലർ പ്രകാരം മാറ്റിയത്. ഗൾഫ് മേഖലയിലെ നിലവിലെ സാഹചര്യം കണക്കിലെടുത്ത് പത്താം ക്ലാസ് പരീക്ഷകൾ പൂർണ്ണമായും റദ്ദാക്കാനും ബോർഡ് തീരുമാനിച്ചു.
മാർച്ച് 12 മുതൽ 16 വരെയുള്ള പരീക്ഷകൾ മാറ്റിവെച്ചു. നേരത്തെ മാർച്ച് 9 മുതൽ 11 വരെയുള്ള പരീക്ഷകളും മാറ്റിയിരുന്നു. പുതുക്കിയ തീയതികൾ പിന്നീട് അറിയിക്കും. ഗൾഫ് രാജ്യങ്ങളിൽ മാർച്ച് 2 മുതൽ 11 വരെ നടക്കാനിരുന്ന പത്താം ക്ലാസ് പരീക്ഷകൾ റദ്ദാക്കി. ഈ വിദ്യാർത്ഥികളുടെ ഫലപ്രഖ്യാപനം എങ്ങനെ വേണമെന്ന് പിന്നീട് തീരുമാനിക്കും.
ബാധകമായ രാജ്യങ്ങൾ: യുഎഇ, സൗദി അറേബ്യ, ഖത്തർ, കുവൈത്ത്, ഒമാൻ, ബഹ്റൈൻ, ഇറാൻ എന്നീ രാജ്യങ്ങളിലെ സിബിഎസ്ഇ സ്കൂളുകൾക്കാണ് ഈ മാറ്റം ബാധകം.
അതേസമയം , സാഹചര്യങ്ങൾ നിരീക്ഷിച്ചുവരികയാണെന്നും മാർച്ച് 14-ന് വീണ്ടും സാഹചര്യം വിലയിരുത്തിയ ശേഷം തുടർന്നുളള പരീക്ഷകളുടെ കാര്യത്തിൽ തീരുമാനമെടുക്കുമെന്നും സിബിഎസ്ഇ പരീക്ഷാ കൺട്രോളർ സന്യം ഭരദ്വാജ് അറിയിച്ചു. പശ്ചിമേഷ്യയിലെ യുദ്ധസമാനമായ സാഹചര്യം വിദ്യാർത്ഥികളിലുണ്ടാക്കുന്ന മാനസിക സമ്മർദ്ദവും സുരക്ഷാ പ്രശ്നങ്ങളും കണക്കിലെടുത്താണ് ഈ അടിയന്തര നടപടി.
പരീക്ഷാ മാറ്റത്തെക്കുറിച്ച് വിദ്യാർത്ഥികളും രക്ഷിതാക്കളും സ്കൂൾ അധികൃതരുമായി നിരന്തരം ബന്ധപ്പെടണമെന്നും ഔദ്യോഗിക അറിയിപ്പുകൾ മാത്രം വിശ്വസിക്കണമെന്നും ബോർഡ് നിർദ്ദേശിച്ചു.
Story Summary:
Amid escalating Israel-Iran tensions, CBSE has further postponed Class 12 board exams in the Gulf region scheduled from March 12 to 16, 2026. Additionally, the board has cancelled Class 10 exams scheduled until March 11 in affected countries, including the UAE, Saudi Arabia, and Qatar. A review meeting is scheduled for March 14 to decide on the status of remaining exams. The board emphasized prioritizing student safety and mental well-being during this volatile period.
