അബുദാബി/ദോഹ: യു.എ.ഇ ലക്ഷ്യമാക്കി ഇറാൻ നടത്തിയ പുതിയ ഡ്രോൺ-മിസൈൽ ആക്രമണങ്ങളിൽ 10 പേർക്ക് കൂടി പരിക്കേറ്റു (Iran Attack UAE Casualties). ഇതോടെ ആകെ പരിക്കേറ്റവരുടെ എണ്ണം 68 ആയി. ഇന്ന് മാത്രം 148 ഡ്രോണുകളും 9 ബാലിസ്റ്റിക് മിസൈലുകളും 6 ക്രൂയിസ് മിസൈലുകളുമാണ് യു.എ.ഇ അതിർത്തിക്കുള്ളിലെത്തിയത്.
തങ്ങളുടെ വ്യോമാതിർത്തി ലംഘിക്കാൻ ശ്രമിച്ച ഇറാന്റെ രണ്ട് ഫൈറ്റർ ജെറ്റുകൾ വെടിവെച്ചിട്ടതായി ഖത്തർ പ്രതിരോധ മന്ത്രാലയം അറിയിച്ചു. കൂടാതെ ഏഴ് ബാലിസ്റ്റിക് മിസൈലുകളും അഞ്ച് ഡ്രോണുകളും തകർത്തു. രാജ്യത്ത് സുരക്ഷാ നില ഭദ്രമാണെന്നും ജനങ്ങൾ പരിഭ്രാന്തരാകേണ്ടതില്ലെന്നും സൗദി ആഭ്യന്തര മന്ത്രാലയം അറിയിച്ചു. തീർഥാടകരുടെയും പൊതുജനങ്ങളുടെയും സുരക്ഷയ്ക്കാണ് മുൻഗണനയെന്നും വ്യാജവാർത്തകൾ പ്രചരിപ്പിക്കരുതെന്നും മന്ത്രാലയം കർശന നിർദ്ദേശം നൽകി.
ഗൾഫ് രാജ്യങ്ങളിൽ നിന്ന് കുട്ടികൾ, ഗർഭിണികൾ, രോഗികൾ എന്നിവരെ ഒഴിപ്പിക്കാൻ ജർമ്മനി തീരുമാനിച്ചു. റിയാദ്, മസ്കറ്റ് എന്നിവിടങ്ങളിലേക്ക് പ്രത്യേക വിമാനങ്ങൾ അയക്കും. സംഘർഷം കാരണം റദ്ദാക്കിയ സർവീസുകൾ ഭാഗികമായി പുനരാരംഭിച്ചു. ദുബായ്, അബുദാബി എന്നിവിടങ്ങളിൽ നിന്ന് പരിമിതമായ സർവീസുകൾ നടക്കുന്നുണ്ട്.
അബുദാബിയിൽ നിന്നുള്ള ഇത്തിഹാദ് വിമാനം ഡൽഹിയിലെത്തി. ദുബായിൽ നിന്നുള്ള വിമാനം രാത്രി 11:30-ഓടെ കൊച്ചിയിൽ എത്തും.
എയർ ഇന്ത്യ എക്സ്പ്രസ് നാളെ മുതൽ മസ്കറ്റിലേക്കുള്ള സർവീസുകൾ പുനരാരംഭിക്കും.
ഡിജിസിഎ (DGCA) ജാഗ്രത: മിഡിൽ ഈസ്റ്റിലെ സാഹചര്യം സൂക്ഷ്മമായി നിരീക്ഷിക്കുകയാണെന്ന് ഇന്ത്യൻ വ്യോമയാന വകുപ്പ് അറിയിച്ചു. ഇന്ന് മാത്രം 357 വിമാനങ്ങളാണ് റദ്ദാക്കിയത്.
Story Summary: Tensions escalate in the Middle East as Iran continues its strikes, injuring 68 people in the UAE so far. Qatar claimed to have shot down two Iranian fighter jets and intercepted several missiles. Saudi Arabia assured normalcy, while Germany announced plans to evacuate vulnerable citizens. Flight operations have partially resumed, with an Etihad flight expected to land in Kochi tonight.
