തിരുവനന്തപുരം: പശ്ചിമേഷ്യൻ സംഘർഷത്തെത്തുടർന്ന് വിമാനങ്ങൾ വഴിതിരിച്ചുവിട്ടപ്പോൾ പാക്കിസ്ഥാനിലെ കറാച്ചിയിൽ കുടുങ്ങിപ്പോയ മലയാളി യാത്രക്കാർ നാളെ നാട്ടിലെത്തും (Malayalis Stranded in Karachi Airport). നോർക്ക റൂട്ട്സ് റെസിഡന്റ് വൈസ് ചെയർമാൻ പി. ശ്രീരാമകൃഷ്ണന്റെ നേതൃത്വത്തിൽ നടന്ന അവലോകന യോഗത്തിലാണ് യാത്രക്കാരുടെ മടക്കയാത്ര സംബന്ധിച്ച ഔദ്യോഗിക സ്ഥിരീകരണം ഉണ്ടായത്.
കറാച്ചിയിൽ കുടുങ്ങിയ യാത്രക്കാർ ഇന്ന് (മാർച്ച് 2) ഉച്ചയോടെ വിമാനമാർഗ്ഗം ശ്രീലങ്കയിലെ കൊളംബോയിൽ എത്തിച്ചേർന്നിട്ടുണ്ട്. മാർച്ച് 3-ന് പുലർച്ചെ 12:30-നുള്ള ശ്രീലങ്കൻ എയർവേയ്സ് വിമാനത്തിൽ ഇവർ കൊളംബോയിൽ നിന്ന് ഡൽഹിയിലേക്ക് തിരിക്കും. തുടർന്ന് അവിടെനിന്ന് എയർ ഇന്ത്യ വിമാനത്തിൽ ഇവർ കൊച്ചിയിൽ എത്തും.
യാത്രക്കാരുടെ സുരക്ഷ ഉറപ്പാക്കാനും അവർക്ക് ആവശ്യമായ സൗകര്യങ്ങൾ ഒരുക്കാനും നോർക്ക നിരന്തരമായി കേന്ദ്ര വിദേശകാര്യ മന്ത്രാലയവുമായും വിമാനക്കമ്പനികളുമായും ഏകോപനം നടത്തിവരികയാണെന്ന് അധികൃതർ വ്യക്തമാക്കി.
കറാച്ചി വിമാനത്താവളത്തിൽ സാങ്കേതിക കാരണങ്ങളാൽ കുടുങ്ങിയ യാത്രക്കാരുടെ സുരക്ഷയെക്കുറിച്ച് നാട്ടിലുള്ള ബന്ധുക്കൾ വലിയ ആശങ്കയിലായിരുന്നു. നോർക്കയുടെ സജീവമായ ഇടപെടൽ ഈ പ്രതിസന്ധിക്ക് പരിഹാരമായിരിക്കുകയാണ്.
Story Summary: Malayali passengers stranded at Karachi International Airport due to flight diversions will reach Kochi on March 3. NORKA Roots, led by P. Sreeramakrishnan, coordinated the evacuation. The passengers have already reached Colombo and will fly to Delhi tonight before reaching Kochi via Air India.
