തിരുവനന്തപുരം: ആറ്റുകാൽ പൊങ്കാലയോടനുബന്ധിച്ച് ഭക്തർക്ക് അടിയന്തര വൈദ്യസഹായം ഉറപ്പാക്കാൻ വിപുലമായ ക്രമീകരണങ്ങൾ പൂർത്തിയായതായി ആരോഗ്യ മന്ത്രി വീണാ ജോർജ് (Attukal Pongala 2026 Medical Facilities). പൊങ്കാല ദിവസം 10 പോയിന്റുകളിൽ പ്രത്യേക മെഡിക്കൽ ടീമുകളെയും ആംബുലൻസുകളെയും വിന്യസിക്കും. ആറ്റുകാൽ ക്ഷേത്ര പരിസരത്തും ജില്ലാ മെഡിക്കൽ ഓഫീസിലും പ്രത്യേക കൺട്രോൾ റൂമുകൾ തുറന്നിട്ടുണ്ട്.
പ്രധാന ആരോഗ്യ സജ്ജീകരണങ്ങൾ:
10 ആംബുലൻസുകൾക്ക് പുറമെ, ഇടുങ്ങിയ വഴികളിലൂടെ വേഗത്തിൽ എത്താൻ 4 ബൈക്ക് ഫസ്റ്റ് റെസ്പോൺസ് ടീം, ഗൂർഖ ആംബുലൻസ്, ബൈക്ക് ഫീഡർ ആംബുലൻസ് എന്നിവ സജ്ജമാക്കി.
അന്തരീക്ഷ താപനില വർധിക്കുന്ന സാഹചര്യത്തിൽ സൂര്യാഘാതം ഉൾപ്പെടെയുള്ള പ്രശ്നങ്ങൾ നേരിടാൻ 12 ആശുപത്രികളിൽ പ്രത്യേക സംവിധാനങ്ങൾ ഒരുക്കി. ഫോർട്ട് ആശുപത്രി, തൈക്കാട് ആശുപത്രി എന്നിവിടങ്ങളിൽ 10 കിടക്കകൾ വീതം ഇതിനായി മാറ്റിവെച്ചു. തിരുവനന്തപുരം മെഡിക്കൽ കോളേജിലും പ്രത്യേക സജ്ജീകരണങ്ങളുണ്ട്.
സുരക്ഷിതമായ ഭക്ഷണം ഉറപ്പാക്കാൻ ഭക്ഷ്യസുരക്ഷാ വകുപ്പ് പരിശോധനകൾ ശക്തമാക്കി. അന്നദാനത്തിന് രജിസ്ട്രേഷൻ നിർബന്ധമാണ്. മൊബൈൽ ലബോറട്ടറിയും ആറ്റുകാലിൽ ക്യാമ്പ് ചെയ്യും.
ഭക്തർ ശ്രദ്ധിക്കേണ്ട കാര്യങ്ങൾ:
നിർജ്ജലീകരണം ഒഴിവാക്കുക: ദാഹം തോന്നിയില്ലെങ്കിലും ഇടയ്ക്കിടെ ധാരാളം വെള്ളം കുടിക്കുക. ജലാംശമുള്ള പഴവർഗങ്ങൾ കഴിക്കുക.
വസ്ത്രധാരണം: കട്ടികുറഞ്ഞ കോട്ടൺ വസ്ത്രങ്ങൾ ധരിക്കുക. തൊപ്പി ഉപയോഗിച്ച് തല മറയ്ക്കുന്നത് നന്നായിരിക്കും.
തീപ്പൊള്ളൽ ഒഴിവാക്കാൻ: അടുപ്പിനടുത്ത് പെട്ടെന്ന് തീപിടിക്കുന്ന സാധനങ്ങൾ വെക്കരുത്. അടുത്ത് ഒരു ബക്കറ്റ് വെള്ളം കരുതുക. തീപിടിച്ചാൽ പരിഭ്രമിച്ച് ഓടരുത്.
പൊള്ളലേറ്റാൽ: പൊള്ളലേറ്റ ഭാഗം വെള്ളം ഉപയോഗിച്ച് തണുപ്പിക്കുക. വസ്ത്രമുള്ള ഭാഗമാണെങ്കിൽ അത് നീക്കം ചെയ്യാൻ ശ്രമിക്കരുത്. ഉടൻ വൈദ്യസഹായം തേടുക.
ക്ഷീണമോ തലകറക്കമോ അനുഭവപ്പെട്ടാൽ ഉടൻ തണലത്തേക്ക് മാറണമെന്നും ആരോഗ്യ പ്രവർത്തകരുടെ സേവനം തേടണമെന്നും മന്ത്രി അഭ്യർത്ഥിച്ചു. ആയുർവേദ, ഹോമിയോപ്പതി വകുപ്പുകളുടെ മെഡിക്കൽ ക്യാമ്പുകളും പൊങ്കാലാ പരിസരത്ത് സജീവമായിരിക്കും.
Story Summary: Kerala Health Minister Veena George announced extensive health arrangements for the Attukal Pongala festival. Medical teams, ambulances, and bike responders are deployed across 10 points. Special facilities have been set up in 12 hospitals to treat heat-related issues like sunstroke. Food safety wings are monitoring food distribution, and registration is mandatory for ‘Annadanam’.
