ചെന്നൈ: തമിഴക വെട്രി കഴകം (TVK) നേതാവും നടനുമായ വിജയ്യും ഭാര്യ സംഗീതയും വിവാഹമോചനത്തിനൊരുങ്ങുന്നു (Actor Vijay Divorce News). 25 വർഷം നീണ്ട ദാമ്പത്യത്തിന് ഒടുവിൽ സംഗീത ചെങ്കൽപേട്ട് കുടുംബകോടതിയിൽ ഹർജി ഫയൽ ചെയ്തതായി ന്യൂസ് 18 റിപ്പോർട്ട് ചെയ്തു. ഹർജി ഫയലിൽ സ്വീകരിച്ച കോടതി വിജയ്ക്ക് നോട്ടീസ് അയച്ചു.
വിജയ്ക്ക് ഒരു നടിയുമായി വിവാഹേതര ബന്ധമുണ്ടായിരുന്നുവെന്നാണ് സംഗീത ഹർജിയിൽ ആരോപിക്കുന്നത്. 2021-ൽ ഈ ബന്ധം താൻ കണ്ടെത്തിയെന്നും ഇത് അവസാനിപ്പിക്കാമെന്ന് വിജയ് ഉറപ്പുനൽകിയിരുന്നതായും ഹർജിയിൽ പറയുന്നു.ബന്ധം അവസാനിപ്പിക്കാമെന്ന് പറഞ്ഞെങ്കിലും വിജയ് അത് യാതൊരു പശ്ചാത്താപവുമില്ലാതെ തുടർന്നതാണ് തന്നെ കോടതിയെ സമീപിക്കാൻ പ്രേരിപ്പിച്ചതെന്ന് സംഗീത വ്യക്തമാക്കുന്നു.
1954-ലെ സ്പെഷ്യൽ മാര്യേജ് ആക്ട് സെക്ഷൻ 27(1)(എ), 27(1)(ഡി) പ്രകാരമാണ് വിവാഹമോചനം തേടിയിരിക്കുന്നത്. ക്രൂരത, വിവാഹേതര ബന്ധം എന്നീ കാരണങ്ങൾ മുൻനിർത്തിയാണ് ഈ ഹർജി.
കേസിൽ വാദം കേൾക്കുന്നതിനായി ഏപ്രിൽ 20-ന് കോടതിയിൽ നേരിട്ട് ഹാജരാകാൻ വിജയ്യോട് കോടതി നിർദ്ദേശിച്ചു. 1999 ഓഗസ്റ്റ് 25-നായിരുന്നു ലണ്ടൻ മലയാളിയായ സംഗീതയുമായുള്ള വിജയ്യുടെ വിവാഹം. ഇവർക്ക് ജേസൺ സഞ്ജയ്, ദിവ്യ സാഷ എന്നിങ്ങനെ രണ്ട് മക്കളുണ്ട്.
കഴിഞ്ഞ കുറച്ചു കാലങ്ങളായി കുടുംബ ചടങ്ങുകളിൽ നിന്നും വിജയ്യുടെ രാഷ്ട്രീയ പരിപാടികളിൽ നിന്നും സംഗീത വിട്ടുനിൽക്കുന്നത് വലിയ ചർച്ചയായിരുന്നു. എന്നാൽ പ്രചരിക്കുന്ന വാർത്തകളെക്കുറിച്ച് വിജയ്യോ സംഗീതയോ ഇതുവരെ ഔദ്യോഗികമായി പ്രതികരിച്ചിട്ടില്ല.
Story Summary: Reports suggest that Sangeetha Sornalingam, wife of actor and TVK leader Vijay, has filed for divorce after 25 years of marriage. The petition filed in Chengalpattu Family Court alleges infidelity and cruelty under the Special Marriage Act. The court has reportedly sent a notice to Vijay, asking him to appear on April 20, 2026.
