ന്യൂഡൽഹി: വടക്കുപടിഞ്ഞാറൻ ഡൽഹിയിലെ മുഖർജി നഗറിൽ ഒന്നര വയസ്സുകാരനെ സ്വന്തം ചെറിയമ്മ പാർക്കിലിട്ട് ശ്വാസം മുട്ടിച്ചു കൊലപ്പെടുത്തി (Delhi Child Murder). വെള്ളിയാഴ്ച ഉച്ചയ്ക്ക് 1.30-ഓടെയാണ് സംഭവം. മുപ്പതുകാരിയായ ചെറിയമ്മ കുട്ടിയെ പാർക്കിൽ കളിക്കാനായി കൊണ്ടുപോയപ്പോഴാണ് ആക്രമണം നടത്തിയത്. ഇവർ കടുത്ത വിഷാദരോഗത്തിന് ചികിത്സയിലാണെന്ന് പോലീസ് അറിയിച്ചു.
സീലംപൂർ സ്വദേശിയായ ഒന്നര വയസ്സുകാരൻ അമ്മയോടൊപ്പം ചെറിയമ്മയുടെ വീട്ടിൽ വിരുന്നിന് എത്തിയതായിരുന്നു. കുട്ടിയെ പാർക്കിലേക്ക് കൊണ്ടുപോയ ഇവർ അവിടെവെച്ച് ശ്വാസം മുട്ടിക്കുകയായിരുന്നു. നിലവിളി കേട്ടെത്തിയ നാട്ടുകാർ കുട്ടിയെ ഉടൻ തന്നെ അടുത്തുള്ള സ്വകാര്യ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. സംഭവസ്ഥലത്ത് അബോധാവസ്ഥയിൽ കണ്ടെത്തിയ പ്രതിയെ പോലീസ് ആശുപത്രിയിലേക്ക് മാറ്റി. ഇവർ വിവാഹിതയല്ലെന്നും മാനസികാസ്വാസ്ഥ്യം നേരിടുന്നുണ്ടെന്നുമാണ് പ്രാഥമിക വിവരം.
സംഭവത്തിന്റെ സിസിടിവി ദൃശ്യങ്ങൾ പോലീസിന് ലഭിച്ചിട്ടുണ്ട്. കുട്ടിയുടെ മൃതദേഹം മടിയിൽ വെച്ച് ഇവർ പാർക്കിൽ ഇരിക്കുന്ന ദൃശ്യങ്ങളാണ് പുറത്തുവന്നത്. കൊലപാതകത്തിന് പിന്നിലെ യഥാർത്ഥ കാരണം കണ്ടെത്താൻ പോലീസ് അന്വേഷണം ഊർജ്ജിതമാക്കിയിട്ടുണ്ട്. കുട്ടിയുടെ അമ്മയുടെ സഹോദരനാണ് പോലീസിൽ വിവരം അറിയിച്ചത്. ഈ ദാരുണമായ സംഭവം പ്രദേശവാസികളെ ഒന്നടങ്കം നടുക്കിയിരിക്കുകയാണ്.
Summary: In a horrifying incident in Delhi’s Mukherjee Nagar, a 30-year-old woman allegedly choked her 21-month-old nephew to death in a public park.
