Follow on Google News
കന്യാകുമാരി: തമിഴ്നാട് നിയമസഭാ തിരഞ്ഞെടുപ്പിന് ദിവസങ്ങൾ മാത്രം ബാക്കിനിൽക്കെ, അഴിമതിക്കെതിരെയും ആധുനിക സാങ്കേതികവിദ്യയ്ക്ക് പ്രാധാന്യം നൽകിയുമുള്ള വമ്പൻ വാഗ്ദാനങ്ങളുമായി തമിഴക വെട്രി കഴകം നേതാവ് വിജയ്. കന്യാകുമാരിയിൽ നടന്ന തിരഞ്ഞെടുപ്പ് പ്രചാരണ റാലിയിലാണ് വിജയ് തന്റെ പ്രകടനപത്രികയിലെ പ്രധാന വശങ്ങൾ വെളിപ്പെടുത്തിയത്.(Will make Tamil Nadu AI and digital capital of India, Vijay showers promises in Kanniyakumari rally)
അധികാരത്തിൽ വന്നാൽ സർക്കാർ പദ്ധതികൾക്കും സേവനങ്ങൾക്കും കൈക്കൂലി വാങ്ങുന്നത് പൂർണ്ണമായും നിരോധിക്കുമെന്ന് വിജയ് പ്രഖ്യാപിച്ചു. ആനുകൂല്യങ്ങൾക്കായി ജനങ്ങൾ ഓഫീസുകൾ കയറേണ്ടതില്ല, പകരം സർക്കാർ സഹായങ്ങൾ ജനങ്ങളുടെ വീട്ടുപടിക്കൽ എത്തും.
ഏതെങ്കിലും വിഷയത്തിൽ പത്തു ലക്ഷം പേർ ഒപ്പിട്ട പരാതി ലഭിച്ചാൽ അത് നിയമസഭയിൽ ചർച്ച ചെയ്യും. നിയമസഭാ സമ്മേളനത്തിലെ ഒരു ദിവസം ജനങ്ങളുടെ പരാതികൾ പരിഹരിക്കാനായി മാത്രം മാറ്റിവെക്കും. തമിഴ്നാടിനെ ആർട്ടിഫിഷ്യൽ ഇന്റലിജൻസിന്റെ ആഗോള തലസ്ഥാനമാക്കി മാറ്റുമെന്നതാണ് മറ്റൊരു പ്രധാന വാഗ്ദാനം. സേലം, തിരുച്ചിറപ്പള്ളി എന്നിവിടങ്ങളിൽ എഐ ഇന്നൊവേഷൻ സെന്ററുകൾ സ്ഥാപിക്കും. സംസ്ഥാനത്ത് ഒരു എഐ സർവകലാശാല ആരംഭിക്കുമെന്നും വിജയ് ഉറപ്പുനൽകി.
തീരദേശ മേഖലയുടെ വോട്ടുകൾ ലക്ഷ്യമിട്ട് വമ്പിച്ച ധനസഹായ പദ്ധതികളാണ് വിജയ് പ്രഖ്യാപിച്ചത്. നിലവിലെ 8,000 രൂപയിൽ നിന്ന് 20,000 രൂപയായി സുരക്ഷാ അലവൻസ് ഉയർത്തും. ശ്രീലങ്കൻ നാവികസേന പിടിച്ചെടുക്കുന്ന ബോട്ടുകൾ തിരികെ ലഭിക്കുന്നത് വരെ ഉടമയ്ക്ക് 5 ലക്ഷം രൂപ നൽകും. മത്സ്യത്തൊഴിലാളികൾക്കായി പുതിയ വീടുകൾ നിർമ്മിച്ചു നൽകുന്ന പദ്ധതി നടപ്പിലാക്കും.
ദ്രാവിഡ പാർട്ടികളുടെ ഭരണത്തിൽ അഴിമതി വ്യാപകമാണെന്ന ജനങ്ങളുടെ പരാതിയെ മുൻനിർത്തിയാണ് വിജയ്യുടെ നീക്കങ്ങൾ. മുൻപ് രജനികാന്ത് ഉയർത്തിയ ‘സിസ്റ്റം മാറ്റം’ എന്ന മുദ്രാവാക്യത്തിന് സമാനമായ നിലപാടാണ് വിജയ് ഇപ്പോൾ സ്വീകരിക്കുന്നത്. ഡിഎംകെ, എഐഎഡിഎംകെ മുന്നണികൾക്കൊപ്പം സീമാന്റെ നാം തമിഴർ കക്ഷിയും സജീവമായ പ്രചാരണരംഗത്തുണ്ട്. താരപരിവേഷത്തിനപ്പുറം വിജയ്യുടെ ഈ ഭരണപരിഷ്കാര വാഗ്ദാനങ്ങൾ വോട്ടായി മാറുമോ എന്നാണ് തമിഴ്നാട് ഉറ്റുനോക്കുന്നത്.
