മസ്കത്ത്: പരിസ്ഥിതി സംരക്ഷണത്തിന്റെ ഭാഗമായി ഒറ്റത്തവണ ഉപയോഗിക്കുന്ന പ്ലാസ്റ്റിക് ബാഗുകൾക്ക് ഏർപ്പെടുത്തിയ നിരോധനം ഒമാനിൽ കൂടുതൽ മേഖലകളിലേക്ക് വ്യാപിപ്പിക്കുന്നു. നിരോധനത്തിന്റെ നാലാം ഘട്ടം 2026 ജനുവരി 1 മുതൽ പ്രാബല്യത്തിൽ വരുമെന്ന് ഒമാൻ പരിസ്ഥിതി അതോറിറ്റി അറിയിച്ചു. പ്ലാസ്റ്റിക് മലിനീകരണം കുറയ്ക്കുന്നതിനും സുസ്ഥിരമായ പരിസ്ഥിതി സൗഹൃദ ശീലങ്ങൾ പ്രോത്സാഹിപ്പിക്കുന്നതിനുമാണ് ഈ നീക്കം.
നാലാം ഘട്ടത്തിൽ നിയന്ത്രണം വരുന്ന മേഖലകൾ:
ജനുവരി 1 മുതൽ താഴെ പറയുന്ന ഉൽപ്പന്നങ്ങൾ വിൽക്കുന്ന വ്യാപാര സ്ഥാപനങ്ങളിൽ പ്ലാസ്റ്റിക് ബാഗുകൾക്ക് നിരോധനമുണ്ടാകും:
നിർമ്മാണ മേഖല: കെട്ടിട നിർമ്മാണ സാമഗ്രികൾ, വാട്ടർ ഫിൽട്ടറുകൾ, പമ്പുകൾ.
കാർഷിക മേഖല: വളം, കീടനാശിനികൾ, കാർഷിക വസ്തുക്കൾ, ജലസേചന സംവിധാനങ്ങൾ, സസ്യങ്ങൾ.
ഭക്ഷ്യവസ്തുക്കൾ: ധാന്യങ്ങൾ, കാലിത്തീറ്റ, ഐസ്ക്രീം, മിഷ്കാക്ക്, തേൻ, ഈത്തപ്പഴം, മധുരപലഹാരങ്ങൾ, നട്സ്, ജ്യൂസ്.
മറ്റുള്ളവ: പാത്രങ്ങൾ, വളർത്തുമൃഗങ്ങൾക്കുള്ള ഭക്ഷണങ്ങൾ.
പരിശോധന കർശനമാക്കും
നിയമം ലംഘിക്കപ്പെടുന്നുണ്ടോ എന്ന് ഉറപ്പുവരുത്താൻ ഒമാനിലെ വിവിധ ഗവർണറേറ്റുകളിൽ അഞ്ച് പ്രത്യേക പരിശോധനാ സംഘങ്ങളെ അതോറിറ്റി വിന്യസിച്ചിട്ടുണ്ട്. വ്യാപാരികളെ ബോധവൽക്കരിക്കാനും തുണി സഞ്ചി പോലുള്ള സുസ്ഥിരമായ ബദലുകളിലേക്ക് അവരെ മാറ്റാനുമാണ് അധികൃതർ മുൻഗണന നൽകുന്നത്. വരും ഘട്ടങ്ങളിൽ കൂടുതൽ വാണിജ്യ മേഖലകളെ നിരോധനത്തിന്റെ പരിധിയിൽ കൊണ്ടുവരുമെന്നും അധികൃതർ വ്യക്തമാക്കി.
2024 ജൂലൈ ഒന്നിന് ഫാർമസികളിലും ക്ലിനിക്കുകളിലും നിയന്ത്രണം ഏർപ്പെടുത്തിക്കൊണ്ടാണ് ആദ്യ ഘട്ടം ആരംഭിച്ചത്. തുടർന്ന് വസ്ത്ര വ്യാപാര ശാലകൾ, ഇലക്ട്രോണിക്സ് കടകൾ, ഫർണിച്ചർ ഷോപ്പുകൾ എന്നിവടങ്ങളിലും നിരോധനം നടപ്പിലാക്കിയിരുന്നു.