കൊളംബോ: 2026 ടി20 ലോകകപ്പിലെ ആദ്യ വമ്പൻ അട്ടിമറിക്ക് കൊളംബോയിലെ ആർ. പ്രേമദാസ സ്റ്റേഡിയം സാക്ഷിയായി. ഗ്രൂപ്പ് ബി-യിലെ ആവേശകരമായ പോരാട്ടത്തിൽ മുൻ ചാമ്പ്യന്മാരായ ഓസ്ട്രേലിയയെ 23 റൺസിനാണ് സിംബാബ്വെ പരാജയപ്പെടുത്തിയത് (Zimbabwe vs Australia T20 World Cup). സിംബാബ്വെ ഉയർത്തിയ 170 റൺസ് വിജയലക്ഷ്യം പിന്തുടർന്ന ഓസ്ട്രേലിയ 19.3 ഓവറിൽ 146 റൺസിന് എല്ലാവരും പുറത്തായി.
ആദ്യം ബാറ്റ് ചെയ്ത സിംബാബ്വെ ഓപ്പണർ ബ്രയാൻ ബെന്നറ്റിന്റെ (64*) അർദ്ധസെഞ്ചുറിയുടെയും സിംബാബ്വെ താരങ്ങളുടെ മികച്ച ബാറ്റിംഗിന്റെയും കരുത്തിൽ രണ്ട് വിക്കറ്റ് മാത്രം നഷ്ടപ്പെടുത്തി 169 റൺസെടുത്തു. മറുപടി ബാറ്റിംഗിനിറങ്ങിയ ഓസ്ട്രേലിയയുടെ മുൻനിരയെ തകർത്തത് ബ്ലെസിംഗ് മുസരബനിയുടെ (4/17) തീപാറുന്ന ബൗളിംഗാണ്. ഓസ്ട്രേലിയൻ നിരയിൽ മാറ്റ് റെൻഷോ (65), ഗ്ലെൻ മാക്സ്വെൽ (31) എന്നിവർ പൊരുതി നോക്കിയെങ്കിലും ലക്ഷ്യത്തിലെത്താനായില്ല.
ഈ വിജയത്തോടെ രണ്ട് കളികളിൽ നിന്ന് നാല് പോയിന്റുമായി സിംബാബ്വെ ഗ്രൂപ്പിൽ രണ്ടാം സ്ഥാനത്തേക്ക് ഉയർന്നു. 2007-ലെ പ്രഥമ ടി20 ലോകകപ്പിലും ഓസ്ട്രേലിയയെ പരാജയപ്പെടുത്തിയ ചരിത്രം സിംബാബ്വെയ്ക്കുണ്ട്. 19 വർഷങ്ങൾക്ക് ശേഷം ലോകവേദിയിൽ കംഗാരുക്കളെ വീണ്ടും മുട്ടുകുത്തിക്കാനായത് സിംബാബ്വെയ്ക്ക് വലിയ ആവേശമാണ് നൽകുന്നത്.
