ഉക്രൈൻ സമാധാന ചർച്ചകളിൽ നിർണ്ണായക പുരോഗതി; ഡാവോസിൽ ട്രംപും സെലൻസ്‌കിയും കൂടിക്കാഴ്ച നടത്തും | Zelenskyy-Trump Davos Meeting

ഡാവോസ്: ഉക്രൈൻ-റഷ്യ യുദ്ധം അവസാനിപ്പിക്കാനുള്ള നീക്കങ്ങളിൽ വലിയ പുരോഗതി ഉണ്ടായതായി അമേരിക്കൻ പ്രതിനിധി സ്റ്റീവ് വിറ്റ്‌കോഫ് (Zelenskyy-Trump Davos Meeting). സ്വിറ്റ്‌സർലൻഡിലെ ഡാവോസിൽ നടക്കുന്ന ലോക സാമ്പത്തിക ഫോറത്തിനിടെ ഉക്രൈൻ പ്രസിഡന്റ് വൊളോഡിമിർ സെലൻസ്‌കി അമേരിക്കൻ പ്രസിഡന്റ് ഡൊണാൾഡ് ട്രംപുമായി കൂടിക്കാഴ്ച നടത്തും. സമാധാന ചർച്ചകളിൽ ഇനി ഒരേയൊരു വിഷയത്തിൽ മാത്രമാണ് തീരുമാനമാകാനുള്ളതെന്നും 90 ശതമാനം കാര്യങ്ങളിലും ധാരണയായെന്നും വിറ്റ്‌കോഫ് വ്യക്തമാക്കി.

നേരത്തെ രാജ്യത്തെ ഊർജ്ജ പ്രതിസന്ധി കണക്കിലെടുത്ത് ഡാവോസിലേക്ക് ഇല്ലെന്ന് പറഞ്ഞിരുന്ന സെലൻസ്‌കി, ട്രംപുമായുള്ള കൂടിക്കാഴ്ചയ്ക്ക് അവസരം ഒരുങ്ങിയതോടെയാണ് സ്വിറ്റ്‌സർലൻഡിൽ എത്തിയത്. റഷ്യൻ ആക്രമണത്തിൽ തകർന്ന ഉക്രൈന്റെ ഊർജ്ജ നിലയങ്ങളും അടിസ്ഥാന സൗകര്യങ്ങളും പുനർനിർമ്മിക്കുന്നതിനും സുരക്ഷാ ഉറപ്പുകൾക്കുമായുള്ള ചർച്ചകൾ ഇരുവരും നടത്തും. പ്രാദേശിക സമയം ഉച്ചയ്ക്ക് 1 മണിക്ക് (ഇന്ത്യൻ സമയം വൈകുന്നേരം 5.30) ഇരുവരും കൂടിക്കാഴ്ച നടത്തുമെന്നും തുടർന്ന് സെലൻസ്‌കി ഉച്ചകോടിയെ അഭിസംബോധന ചെയ്യുമെന്നുമാണ് റിപ്പോർട്ടുകൾ.

അതേസമയം, യുഎസ് പ്രതിനിധികളായ സ്റ്റീവ് വിറ്റ്‌കോഫും ജാരെഡ് കുഷ്നറും ഇന്ന് മോസ്കോയിൽ റഷ്യൻ പ്രസിഡന്റ് വ്ലാഡിമിർ പുടിനുമായി കൂടിക്കാഴ്ച നടത്തും. യുദ്ധം അവസാനിപ്പിക്കാനുള്ള സമാധാന പദ്ധതിയോടൊപ്പം ട്രംപ് മുന്നോട്ടുവെച്ച 'ബോർഡ് ഓഫ് പീസ്' പദ്ധതിയെക്കുറിച്ചും ഇവർ ചർച്ച ചെയ്യും. അമേരിക്കയിൽ മരവിപ്പിച്ചിട്ടുള്ള റഷ്യൻ ആസ്തികൾ ഉക്രൈൻ പുനർനിർമ്മാണത്തിന് ഉപയോഗിക്കാൻ തയ്യാറാണെന്ന് പുടിൻ ഇതിനോടകം സൂചന നൽകിയിട്ടുണ്ട്. നാലാം വർഷത്തിലേക്ക് കടക്കുന്ന യുദ്ധം അവസാനിപ്പിക്കാൻ ട്രംപിന്റെ മധ്യസ്ഥതയിലുള്ള ഈ നീക്കങ്ങൾ വഴിതുറക്കുമെന്ന പ്രതീക്ഷയിലാണ് ലോകം.