റിയാദ്: യമനിൽ രാഷ്ട്രീയ-സൈനിക പ്രതിസന്ധി രൂക്ഷമാകുന്നു (Yemen Crisis). യുഎഇയുമായുള്ള സംയുക്ത പ്രതിരോധ കരാർ യമൻ പ്രസിഡൻഷ്യൽ കൗൺസിൽ റദ്ദാക്കി. 24 മണിക്കൂറിനുള്ളിൽ എല്ലാ യുഎഇ സൈനികരും യമൻ മണ്ണിൽ നിന്ന് പിന്മാറണമെന്ന് കൗൺസിൽ തലവൻ റഷാദ് അൽ അലിമി ഉത്തരവിട്ടു. ഇതിന് പുറമെ രാജ്യത്ത് 90 ദിവസത്തേക്ക് അടിയന്തരാവസ്ഥ പ്രഖ്യാപിക്കുകയും അടുത്ത 72 മണിക്കൂറത്തേക്ക് കര-വ്യോമ-സമുദ്ര അതിർത്തികൾ അടച്ച് ഉപരോധം ഏർപ്പെടുത്തുകയും ചെയ്തു.
സൗദി അറേബ്യയുടെ പിന്തുണയുള്ള യമൻ സർക്കാരും യുഎഇ പിന്തുണയുള്ള വിഘടനവാദ ഗ്രൂപ്പായ സതേൺ ട്രാൻസിഷണൽ കൗൺസിലും (STC) തമ്മിലുള്ള ഭിന്നതയാണ് ഈ കടുത്ത തീരുമാനത്തിലേക്ക് നയിച്ചത്. യുഎഇയുടെ നീക്കങ്ങൾ യമന്റെയും മേഖലയുടെയും സുരക്ഷയ്ക്ക് ഭീഷണിയാണെന്ന് സൗദി അറേബ്യൻ വിദേശകാര്യ മന്ത്രാലയം പ്രതികരിച്ചു. വിഘടനവാദികൾക്ക് യുഎഇ ആയുധങ്ങൾ നൽകുന്നത് "അത്യന്തം അപകടകരമായ" നടപടിയാണെന്നും സൗദി വ്യക്തമാക്കി.
മുഖല്ല തുറമുഖത്ത് കഴിഞ്ഞ ദിവസം സൗദി സഖ്യസേന നടത്തിയ വ്യോമാക്രമണത്തിന് പിന്നാലെയാണ് ഈ നാടകീയ നീക്കങ്ങൾ. അനുമതിയില്ലാതെ തുറമുഖത്തെത്തിയ കപ്പലുകളിൽ നിന്ന് വിഘടനവാദികൾക്ക് കൈമാറാൻ ഇറക്കിയ ആയുധശേഖരമാണ് സൗദി തകർത്തത്. ഈ പ്രകോപനത്തിന്റെ പശ്ചാത്തലത്തിലാണ് യുഎഇയുമായുള്ള എല്ലാ സൈനിക സഹകരണവും അവസാനിപ്പിക്കാൻ യമൻ തീരുമാനിച്ചത്. അതേസമയം, സൗദി അറേബ്യ നൽകുന്ന പിന്തുണയെ റഷാദ് അൽ അലിമി പ്രശംസിച്ചു.
Yemen's Presidential Leadership Council has formally cancelled its joint defense agreement with the UAE, ordering all Emirati forces to withdraw within 24 hours. President Rashad al-Alimi declared a 90-day state of emergency and a 72-hour total blockade on all ports and crossings. These measures follow Saudi-led airstrikes on weapons shipments intended for UAE-backed separatists, marking a severe breakdown in relations within the anti-Houthi coalition.