അൽബേനിയൻ - ഗ്രീക്ക് അതിർത്തിയിലെ ഒരു ഗുഹയ്ക്കുള്ളിൽ ശാസ്ത്രജ്ഞർ കണ്ടെത്തിയത് ലോകത്തിലെ ഏറ്റവും വലിയ ചിലന്തിവല! സാധാരണയായി നമ്മുടെ വീടുകളിലും പരിസരങ്ങളിലും കാണപ്പെടാറുള്ള വിവിധ ചിലന്തി വിഭാഗങ്ങളിൽ പെട്ട 69,000 ചിലന്തികളും 42,000-ത്തിലധികം കുള്ളൻ വീവർ ചിലന്തികളും ഉൾപ്പെടുന്ന ഈ കോളനിയുടെ ആകെ വിസ്തീർണ്ണം 1,140 ചതുരശ്ര അടിയാണ്. (Largest Spider Web)
സൾഫർ ഗുഹയിലെ ജീവിതം
വേണ്ടത്ര സൂര്യപ്രകാശം ലഭിക്കാത്ത അതേസമയം, ഉയർന്ന അളവിൽ വിഷാംശമുള്ള ഹൈഡ്രജൻ - സൾഫർ വാതകത്തിന്‍റെ സാന്നിധ്യമുള്ള ഒരു സൾഫർ ഗുഹയിൽ ഈ ചിലന്തി കോളനി എങ്ങനെ നിലനിന്നു എന്നതാണ് ഇപ്പോൾ ഗവേഷകരെ ആശയക്കുഴപ്പത്തിലാക്കിയിരിക്കുന്നത്. ഭൂമിയിലെ ഏറ്റവും കഠിനമായ ആവാസ വ്യവസ്ഥകളിൽ ഒന്നാണ് സൾഫർ ഗുഹകൾ. അവ പൂർണ്ണമായും ഇരുണ്ടതും ഹൈഡ്രജൻ സൾഫൈഡ് വാതകം നിറഞ്ഞതുമാണ്, അതുകൊണ്ടുതന്നെ മിക്ക ജീവജാലങ്ങൾക്കും ഇതിനുള്ളിൽ അതിജീവനം അസാധ്യമാണ്.
ജേണൽ സബ്‌ടെറേനിയൻ ബയോളജിയിൽ പ്രസിദ്ധീകരിച്ച പഠനത്തിൽ തങ്ങൾ കണ്ടെത്തിയ ചിലന്തി കോളനിയെ കുറിച്ചുള്ള കൂടുതൽ വിവരങ്ങൾ ഗവേഷകർ പങ്കുവെച്ചിട്ടുണ്ട്. ഇത് പ്രകാരം, ചിലന്തി കോളനി സൾഫർ ഗുഹയുടെ സൾഫിഡിക് അരുവിയുടെ കരയിലാണ് കണ്ടെത്തിയത്, ഗുഹാമുഖത്ത് നിന്ന് ഏകദേശം 50 മീറ്റർ അകലെ സ്ഥിരമായി ഇരുണ്ട മേഖലയിലാണുള്ളത്.
അസാധാരണമായ സഹകരണം
സാധാരണയായി ഇതിനു മുൻപ് ഒരു രീതിയിലും ഒത്തുചേരുകയും സഹകരിക്കുകയും ചെയ്യാത്ത ജീവിവർഗ്ഗങ്ങളാണ് ഈ ഗുഹയ്ക്കുള്ളിൽ ഒരുമിച്ച് ജീവിക്കുന്നത്. സൾഫർ കേവ് സ്പൈഡർ കോളനി ഇതുവരെ രേഖപ്പെടുത്തിയിട്ടുള്ളതിൽ വച്ച് ഏറ്റവും വലിയ ഒന്നാണ്. ഗവേഷണ സംഘത്തിലെ അംഗമായ റൊമാനിയയിലെ സാപിയൻഷ്യ ഹംഗേറിയൻ യൂണിവേഴ്‌സിറ്റിയിലെ ബയോളജി അസോസിയേറ്റ് പ്രൊഫസറായ ഇസ്താൻ ഉറാക്, രണ്ട് പ്രബല ചിലന്തി ഇനങ്ങൾ ഒരുമിച്ച് ജീവിക്കുന്നത് ഒരു സവിശേഷ സംഭവമാണെന്ന് അഭിപ്രായപ്പെട്ടു.