ജൂലൈ 25, ഒരു സാധാരണ ദിവസമായി തോന്നിയേക്കാം. എന്നാൽ ലോകമെമ്പാടുമുള്ള ആയിരക്കണക്കിന് കുടുംബങ്ങൾക്ക്, ഇത് ശാസ്ത്രത്തിന്റെയും, കാരുണ്യത്തിന്റെയും, പ്രത്യാശയുടെയും നിശബ്ദ വിജയത്തിന്റെ അടയാളപ്പെടുത്തലാണ്. ഇന്ന് ലോക ഭ്രൂണശാസ്ത്ര ദിനം (World Embryologist Day)
പ്രത്യുൽപാദന വൈദ്യശാസ്ത്രത്തിലും അസിസ്റ്റഡ് റീപ്രൊഡക്റ്റീവ് ടെക്നോളജിയിലും (ART) ഭ്രൂണശാസ്ത്രജ്ഞർ നൽകിയ സുപ്രധാന സംഭാവനകളെ അംഗീകരിക്കുന്നതിനായി എല്ലാ വർഷവും ജൂലൈ 25 ന് ലോക ഭ്രൂണശാസ്ത്ര ദിനം ലോകമെമ്പാടും ആഘോഷിക്കുന്നു. ഫെർട്ടിലിറ്റി സയൻസിൽ വിപ്ലവം സൃഷ്ടിച്ച ലൂയിസ് ബ്രൗൺ - ലോകത്തിലെ ആദ്യത്തെ വിജയകരമായ IVF (ഇൻ വിട്രോ ഫെർട്ടിലൈസേഷൻ) കുഞ്ഞ് 1978 ജൂലൈ 25 ന് ഇംഗ്ലണ്ടിൽ ജനിച്ചു. ഈ കുഞ്ഞിന്റെ ജന്മദിനമാണ് ലോക ഭ്രൂണശാസ്ത്ര ദിനമായി ആചരിച്ചു പോരുന്നത്. പ്രത്യുൽപാദന വൈദ്യശാസ്ത്ര മേഖലയിലെ ഭ്രൂണശാസ്ത്രജ്ഞരുടെ അത്ഭുതകരമായ നേട്ടങ്ങളെയും സംഭാവനകളെയും ആദരിക്കുന്നതിനായി എല്ലാ വർഷവും ജൂലൈ 25 ന് ലോക ഭ്രൂണശാസ്ത്ര ദിനം ആഘോഷിക്കുന്നു.
ലോക ഭ്രൂണശാസ്ത്ര ദിനം എന്നത് ഫെർട്ടിലിറ്റി ലബോറട്ടറികളിൽ പ്രവർത്തിക്കുന്ന ശാസ്ത്രജ്ഞരുടെ കഴിവിനെയും സമർപ്പണത്തെയും ആദരിക്കുക മാത്രമല്ല, ഒരു കുഞ്ഞ് എന്ന സ്വപ്നവും പേറി ജീവിക്കുന്നവരുടെ സ്വപ്നങ്ങൾ സാക്ഷാത്കരിക്കാൻ അവർ വഹിക്കുന്ന നിർണായക പങ്കിനെയും എടുത്തുകാട്ടുന്നു. വന്ധ്യതാ നിരക്കുകളിലെ വർദ്ധനവ്, മാറിക്കൊണ്ടിരിക്കുന്ന സാമൂഹിക മാനദണ്ഡങ്ങൾ, പ്രത്യുൽപാദന സാങ്കേതികവിദ്യകളുടെ വികസനം എന്നിവയെല്ലാം ഭ്രൂണശാസ്ത്രജ്ഞരെ സമകാലിക വൈദ്യശാസ്ത്രത്തിലെ ഏറ്റവും പ്രധാനികളായി മാറ്റുന്നു.
"ജീവിതത്തിന്റെ ശാസ്ത്രം: ധാർമ്മികത, നവീകരണം, പ്രതീക്ഷ"(Science of Life: Ethics, Innovation, and Hope) എന്നതാണ് ഈ വർഷത്തെ പ്രമേയം. ഓരോ കുഞ്ഞിന്റെയും ജനനം മാതാപിതാക്കൾക്ക് നൽകുന്നത് പ്രതീക്ഷയുടെ പുതിയ കണങ്ങളാണ്, ആ പ്രതീക്ഷയ്ക്ക് രൂപം നൽകുന്നവരാണ് എംബ്രിയോളജിസ്റ്റുകൾ. കടന്നു പോകുന്ന ഓരോ ഭ്രൂണശാസ്ത്ര ദിനവും ആരോഗ്യ സമൂഹം കെട്ടിപ്പടുക്കാൻ എംബ്രിയോളജിസ്റ്റുകൾ നൽകുന്ന സംഭാവനകളെ ഓർക്കുന്നു.