വാഷിങ്ടൺ: സൗദി അറേബ്യയ്ക്ക് അത്യാധുനിക എഫ്-35 യുദ്ധവിമാനങ്ങൾ വിൽക്കുമെന്ന് യു.എസ്. പ്രസിഡന്റ് ഡോണൾഡ് ട്രംപ് പ്രഖ്യാപിച്ചു. സൗദി കിരീടാവകാശി മുഹമ്മദ് ബിൻ സൽമാൻ യു.എസ്. സന്ദർശിക്കാനിരിക്കെയാണ് ട്രംപിന്റെ സുപ്രധാന പ്രഖ്യാപനം. ഏഴ് വർഷത്തെ ഇടവേളയ്ക്ക് ശേഷമാണ് സൗദി കിരീടാവകാശി അമേരിക്കയിലെത്തുന്നത്.(Will provide F-35 fighter jets to Saudi Arabia, says Trump)
സൗദി അറേബ്യയ്ക്ക് വിമാനങ്ങൾ വിൽക്കുമോ എന്ന മാധ്യമപ്രവർത്തകരുടെ ചോദ്യത്തിന് "ഞങ്ങൾ അത് ചെയ്യുമെന്ന് ഞാൻ പറയുന്നു. ഞങ്ങൾ എഫ്-35 വിമാനങ്ങൾ വിൽക്കും," എന്നായിരുന്നു ട്രംപിന്റെ പ്രതികരണം. സൗദിക്ക് എഫ്-35 വിമാനങ്ങൾ നൽകുന്നത് പരിഗണനയിലാണെന്ന് ട്രംപ് അടുത്തിടെ സൂചിപ്പിച്ചിരുന്നു.
അതേസമയം, സൗദിക്ക് എഫ്-35 യുദ്ധവിമാനങ്ങൾ കൈമാറുന്ന വിഷയത്തിൽ ഇസ്രയേൽ യു.എസിനെ തങ്ങളുടെ നിലപാട് അറിയിച്ചതായി റിപ്പോർട്ടുകളുണ്ട്. എഫ്-35 വിമാനങ്ങൾ സൗദിക്ക് കൈമാറുന്നത് ഇസ്രയേലുമായുള്ള സൗദിയുടെ നയതന്ത്ര ബന്ധം ആരംഭിക്കുന്നതിന് വിധേയമായിരിക്കണം എന്നാണ് ഇസ്രയേലിന്റെ ആവശ്യം.
പ്രാദേശിക സുരക്ഷാ സഹകരണത്തിന്റെ ഭാഗമായി വേണം യുദ്ധവിമാനങ്ങളുടെ കൈമാറ്റമെന്നും ഇസ്രയേൽ ആവശ്യപ്പെട്ടിട്ടുണ്ട്. ഈ യുദ്ധവിമാന കരാർ അമേരിക്കയും സൗദിയും തമ്മിലുള്ള പ്രതിരോധ ബന്ധത്തിൽ വലിയ മുന്നേറ്റമാകും.