വാഷിങ്ടൺ: വെനസ്വേലയുടെ ഇടക്കാല പ്രസിഡന്റായി ചുമതലയേറ്റ ഡെൽസി റോഡ്രിഗസിനെതിരെ കടുത്ത ഭീഷണിയുമായി അമേരിക്കൻ പ്രസിഡന്റ് ഡൊണാൾഡ് ട്രംപ്. വാഷിങ്ടണുമായി സഹകരിച്ചില്ലെങ്കിൽ മുൻ പ്രസിഡന്റ് നിക്കോളാസ് മഡുറോയേക്കാൾ വലിയ പ്രത്യാഘാതങ്ങൾ നേരിടേണ്ടി വരുമെന്ന് ട്രംപ് മുന്നറിയിപ്പ് നൽകി.(Will have to pay a bigger price than Maduro, Trump issues public threat to Venezuela's interim president)
ടെലിഫോൺ അഭിമുഖത്തിലാണ് ട്രംപ് തന്റെ നിലപാട് വ്യക്തമാക്കിയത്. വെനസ്വേലയുടെ എണ്ണസമ്പത്തിലേക്കും മറ്റ് പ്രകൃതിവിഭവങ്ങളിലേക്കും അമേരിക്കയ്ക്ക് 'പൂർണ്ണ പ്രവേശനം' നൽകണമെന്നാണ് ട്രംപിന്റെ പ്രധാന ആവശ്യം. "അവർക്ക് വലിയ വില നൽകേണ്ടി വരും. രാജ്യത്തിന്റെ പുനർനിർമ്മാണത്തിനായി അവരുടെ എണ്ണസമ്പത്തിൽ ഞങ്ങൾക്ക് പങ്കാളിത്തം വേണം. മഡുറോയുടെ അറസ്റ്റിലേക്ക് നയിച്ച അമേരിക്കൻ ഇടപെടലിനെ റോഡ്രിഗസ് എതിർക്കുന്നത് അംഗീകരിക്കാനാവില്ല." വെനസ്വേലയ്ക്ക് പുറമെ ഗ്രീൻലാൻഡിലും അമേരിക്കയ്ക്ക് താൽപ്പര്യമുണ്ടെന്ന് ട്രംപ് വെളിപ്പെടുത്തി. റഷ്യൻ-ചൈനീസ് സാന്നിധ്യം തടയാൻ ഗ്രീൻലാൻഡ് ആവശ്യമാണെന്നും അദ്ദേഹം പറഞ്ഞു.
ട്രംപിന്റെ ഭീഷണിയെ തള്ളിക്കളഞ്ഞുകൊണ്ട് ഇടക്കാല പ്രസിഡന്റ് ഡെൽസി റോഡ്രിഗസ് രംഗത്തെത്തി. വെനസ്വേല ഒരിക്കലും ഒരു കോളനിയാകില്ലെന്നും രാജ്യത്തിന്റെ സ്വാഭാവിക വിഭവങ്ങൾ സംരക്ഷിക്കാൻ പ്രതിജ്ഞാബദ്ധമാണെന്നും അവർ വ്യക്തമാക്കി. മഡുറോ സർക്കാരിൽ വിദേശകാര്യമന്ത്രിയായും എണ്ണമന്ത്രിയായും പ്രവർത്തിച്ചിട്ടുള്ള റോഡ്രിഗസ് മഡുറോയുടെ 'കടുവ' എന്നാണ് അറിയപ്പെടുന്നത്.
അമേരിക്കൻ സൈനിക ഇടപെടലിലൂടെ പ്രസിഡന്റ് നിക്കോളാസ് മഡുറോ അറസ്റ്റിലായതോടെയാണ് വൈസ് പ്രസിഡന്റായിരുന്ന ഡെൽസി റോഡ്രിഗസ് ഭരണഘടനയുടെ 233, 234 അനുച്ഛേദങ്ങൾ പ്രകാരം അധികാരം ഏറ്റെടുത്തത്.