മിനസോട്ട: വെനസ്വേലയുടെ എണ്ണ വിപണിയെ സഹായിക്കുന്നതിനായി രാജ്യാന്തര ഉപരോധങ്ങളിൽ അടുത്തയാഴ്ചയോടെ കൂടുതൽ ഇളവുകൾ അനുവദിക്കുമെന്ന് അമേരിക്കൻ ട്രഷറി സെക്രട്ടറി സ്കോട്ട് ബെസെന്റ് (Scott Bessent) വെളിപ്പെടുത്തി. വെനസ്വേലൻ പ്രസിഡന്റ് നിക്കോളാസ് മഡുറോയെ അമേരിക്കൻ സൈന്യം പിടികൂടി ന്യൂയോർക്കിലെത്തിച്ചതിന് പിന്നാലെ രാജ്യത്തെ സാമ്പത്തികമായി സ്ഥിരപ്പെടുത്താനുള്ള ട്രംപ് ഭരണകൂടത്തിന്റെ നീക്കങ്ങളുടെ ഭാഗമാണിത്.
എണ്ണ വില്പന സുഗമമാക്കുന്നതിനും അതിലൂടെ ലഭിക്കുന്ന വരുമാനം വെനസ്വേലൻ ജനതയ്ക്ക് പ്രയോജനപ്പെടുന്ന രീതിയിൽ രാജ്യത്തേക്ക് തിരികെ എത്തിക്കുന്നതിനും വേണ്ടിയാണ് ഉപരോധങ്ങൾ നീക്കുന്നത്. അന്താരാഷ്ട്ര നാണയ നിധിയിൽ വെനസ്വേലയുടെ മരവിപ്പിക്കപ്പെട്ട ഏകദേശം 500 കോടി ഡോളർ മൂല്യമുള്ള ആസ്തികൾ രാജ്യത്തിന്റെ പുനർനിർമ്മാണത്തിനായി വിട്ടുനൽകുന്നതിനെക്കുറിച്ച് അടുത്തയാഴ്ച ഐ.എം.എഫ്, ലോകബാങ്ക് തലവന്മാരുമായി ബെസെന്റ് ചർച്ച നടത്തും. വെനസ്വേലയുടെ തകർന്നടിഞ്ഞ എണ്ണ പശ്ചാത്തല സൗകര്യങ്ങൾ വീണ്ടെടുക്കാൻ ഷെവ്റോൺ, എക്സോൺ മൊബീൽ തുടങ്ങിയ കമ്പനികൾ 10,000 കോടി ഡോളർ നിക്ഷേപിക്കണമെന്ന് പ്രസിഡന്റ് ട്രംപ് ആവശ്യപ്പെട്ടിട്ടുണ്ട്.
നിലവിൽ വെനസ്വേലയുടെ എണ്ണ കയറ്റുമതി ചരിത്രത്തിലെ ഏറ്റവും താഴ്ന്ന നിലയിലാണ്. പുതിയ നീക്കത്തിലൂടെ എണ്ണ വരുമാനം അമേരിക്കൻ ട്രഷറി അക്കൗണ്ടുകളിൽ സുരക്ഷിതമായി സൂക്ഷിക്കുമെന്നും ഇത് വെനസ്വേലയിലെ പുതിയ ഭരണകൂടത്തിന്റെ സുരക്ഷാ സേവനങ്ങൾക്കും ജനക്ഷേമ പ്രവർത്തനങ്ങൾക്കും മാത്രമേ ഉപയോഗിക്കൂ എന്ന് ഉറപ്പാക്കുമെന്നും ബെസെന്റ് പറഞ്ഞു. സ്വകാര്യ മേഖലയിലെ ചെറിയ കമ്പനികൾ വെനസ്വേലൻ എണ്ണ വിപണിയിലേക്ക് വേഗത്തിൽ മടങ്ങിവരുമെന്നാണ് അമേരിക്ക പ്രതീക്ഷിക്കുന്നത്.
The U.S. Treasury Secretary Scott Bessent has announced that additional sanctions on Venezuela could be lifted as early as next week to facilitate oil sales and economic recovery. Following the capture of Nicolas Maduro, the Trump administration is working with the IMF and World Bank to unfreeze $5 billion in assets for rebuilding the country. These moves aim to encourage U.S. oil producers to reinvest in Venezuela’s infrastructure while ensuring that oil revenues are used strictly for the benefit of the Venezuelan people.