വാഷിംഗ്ടൺ: ലോക ഭൂപടത്തിൽ കാനഡയെയും ഗ്രീൻലൻഡിനെയും വെനിസ്വേലയെയും അമേരിക്കയുടെ ഭാഗമായി ചിത്രീകരിക്കുന്ന എഡിറ്റ് ചെയ്ത ചിത്രം പങ്കുവെച്ച് യുഎസ് പ്രസിഡന്റ് ഡൊണാൾഡ് ട്രംപ് (US Territory Claim). ട്രംപിന്റെ സ്വന്തം സോഷ്യൽ മീഡിയ പ്ലാറ്റ്ഫോമായ 'ട്രൂത്ത് സോഷ്യൽ' വഴിയാണ് ഈ വിവാദ ചിത്രം പുറത്തുവിട്ടത്. ലോക നേതാക്കൾക്ക് മുന്നിൽ ട്രംപ് ഈ പുതിയ ഭൂപടം വിശദീകരിക്കുന്ന രീതിയിലാണ് ചിത്രം എഡിറ്റ് ചെയ്തിരിക്കുന്നത്.
ബ്രിട്ടീഷ് പ്രധാനമന്ത്രി കീർ സ്റ്റാമർ, ജർമ്മൻ ചാൻസലർ ഫ്രെഡറിക് മെർസ്, ഫ്രഞ്ച് പ്രസിഡന്റ് ഇമ്മാനുവൽ മാക്രോൺ, നാറ്റോ സെക്രട്ടറി ജനറൽ ജെൻസ് സ്റ്റോൾട്ടൻബർഗ് എന്നിവർ ട്രംപിന്റെ വാക്കുകൾ ശ്രദ്ധയോടെ കേട്ടിരിക്കുന്നതായി ചിത്രത്തിൽ കാണാം. ഇതിന് പിന്നാലെ ഗ്രീൻലൻഡിൽ യുഎസ് പതാക ഉയർത്തി നിൽക്കുന്ന മറ്റൊരു ചിത്രവും ട്രംപ് പങ്കുവെച്ചു. "ഗ്രീൻലൻഡ്, 2026 മുതൽ യുഎസ് ടെറിട്ടറി" എന്ന ബോർഡും ചിത്രത്തിലുണ്ട്. വൈസ് പ്രസിഡന്റ് ജെ.ഡി. വാൻസും സ്റ്റേറ്റ് സെക്രട്ടറി മാർക്കോ റൂബിയോയും ട്രംപിനൊപ്പമുണ്ട്.
ട്രംപിന്റെ ഈ നീക്കം യൂറോപ്യൻ രാജ്യങ്ങളെ പ്രകോപിപ്പിച്ചിരിക്കുകയാണ്. ഡെന്മാർക്കിന്റെ സ്വയംഭരണ പ്രദേശമായ ഗ്രീൻലൻഡിനെ വിട്ടുതരണമെന്ന ട്രംപിന്റെ ആവശ്യം നേരത്തെ തന്നെ തർക്കങ്ങൾക്ക് വഴിവെച്ചിരുന്നു. ഇതേത്തുടർന്ന് യൂറോപ്യൻ രാജ്യങ്ങൾ ഗ്രീൻലൻഡിലേക്ക് സൈന്യത്തെ അയക്കുകയും സംയുക്ത സൈനികാഭ്യാസം നടത്തുകയും ചെയ്തു. അമേരിക്കയും യൂറോപ്പും തമ്മിലുള്ള 'ട്രാൻസ്അറ്റ്ലാന്റിക് സഖ്യം' ചരിത്രത്തിലെ ഏറ്റവും വലിയ പ്രതിസന്ധിയിലൂടെയാണ് കടന്നുപോകുന്നത്.
അതേസമയം, വെനിസ്വേലയിലെ നിക്കോളാസ് മഡുറോയുടെ ഭരണകൂടത്തെ പുറത്താക്കിയ സൈനിക നീക്കത്തിന് ശേഷം വെനിസ്വേലയുടെ മേൽ അമേരിക്കയ്ക്ക് പൂർണ്ണ നിയന്ത്രണമുണ്ടെന്നും ട്രംപ് അവകാശപ്പെടുന്നു. കാനഡയെ അമേരിക്കയുടെ 51-ാം സംസ്ഥാനമായി മാറ്റണമെന്ന തന്റെ പഴയ നിർദ്ദേശം ട്രംപ് ആവർത്തിച്ചതും കാനഡയുടെ ശക്തമായ പ്രതിഷേധത്തിന് കാരണമായിട്ടുണ്ട്. ഗ്രീൻലൻഡ് വിട്ടുതന്നില്ലെങ്കിൽ ഡെന്മാർക്കിനും മറ്റ് യൂറോപ്യൻ രാജ്യങ്ങൾക്കും മേൽ കനത്ത നികുതി ചുമത്തുമെന്നും ട്രംപ് ഭീഷണിപ്പെടുത്തിയിട്ടുണ്ട്.
U.S. President Donald Trump has sparked a global diplomatic row by posting altered images on Truth Social depicting Canada, Greenland, and Venezuela as U.S. territories. One image shows Trump lecturing European leaders over a revised map, while another portrays him hoisting the American flag in Greenland with a sign reading "U.S. Territory from 2026." This provocation follows intensifying tensions with Denmark over Greenland and the recent military intervention in Venezuela, raising serious concerns about the stability of the Transatlantic Alliance.