സിയോൾ: ഇറാനെതിരെയുള്ള യുദ്ധത്തിൽ ഉപയോഗിക്കുന്നതിനായി ദക്ഷിണ കൊറിയയിൽ വിന്യസിച്ചിട്ടുള്ള അമേരിക്കയുടെ ‘പാട്രിയറ്റ്’ മിസൈൽ പ്രതിരോധ സംവിധാനങ്ങൾ പശ്ചിമേഷ്യയിലേക്ക് മാറ്റുന്നതിനെക്കുറിച്ച് ഇരുരാജ്യങ്ങളും ചർച്ച നടത്തുന്നതായി റിപ്പോർട്ട് (US South Korea Patriot Missiles Deal). ദക്ഷിണ കൊറിയൻ വിദേശകാര്യ മന്ത്രി ചോ ഹ്യുൻ വെള്ളിയാഴ്ച പാർലമെന്റിൽ നടന്ന ഹിയറിംഗിനിടെയാണ് ഇക്കാര്യം സ്ഥിരീകരിച്ചത്.
ദക്ഷിണ കൊറിയയിലെ ഓസാൻ എയർ ബേസിൽ നിന്നുള്ള ചില മിസൈൽ യൂണിറ്റുകൾ ഇതിനോടകം നീക്കം ചെയ്തതായി പ്രാദേശിക മാധ്യമങ്ങൾ റിപ്പോർട്ട് ചെയ്തിരുന്നു. എന്നാൽ സുരക്ഷാ കാരണങ്ങളാൽ മിസൈലുകളുടെ സ്ഥാനമാറ്റത്തെക്കുറിച്ച് കൂടുതൽ പ്രതികരിക്കാൻ വിദേശകാര്യ മന്ത്രാലയമോ ദക്ഷിണ കൊറിയയിലെ യുഎസ് സേനയോ തയ്യാറായില്ല. ഇറാനിലെ ആണവായുധ കേന്ദ്രങ്ങളും ബാലിസ്റ്റിക് മിസൈൽ ശേഷിയും തകർക്കുക എന്ന ലക്ഷ്യത്തോടെ ട്രംപ് ഭരണകൂടം നടത്തുന്ന സൈനിക നീക്കത്തിന്റെ ഏഴാം ദിവസമാണ് ഈ സുപ്രധാന നീക്കം.
ഏകദേശം 28,500 അമേരിക്കൻ സൈനികരാണ് നിലവിൽ ദക്ഷിണ കൊറിയയിലുള്ളത്. ഉത്തര കൊറിയയിൽ നിന്നുള്ള ഭീഷണി നേരിടാനാണ് ഇവിടെ പാട്രിയറ്റ് മിസൈലുകൾ വിന്യസിച്ചിരിക്കുന്നത്. ഇറാൻ യുദ്ധത്തിൽ ഏതൊരു രാജ്യത്ത് നിന്നുമുള്ള സഹായവും സ്വീകരിക്കാൻ തയ്യാറാണെന്ന് അമേരിക്കൻ പ്രസിഡന്റ് ഡൊണാൾഡ് ട്രംപ് നേരത്തെ വ്യക്തമാക്കിയിരുന്നു. അമേരിക്ക ഔദ്യോഗികമായി സൈനിക സഹായം ആവശ്യപ്പെട്ടിട്ടില്ലെങ്കിലും, നിലവിലെ സാഹചര്യത്തിൽ മിസൈൽ പ്രതിരോധ സംവിധാനങ്ങൾ വിട്ടുനൽകുന്നതിനെക്കുറിച്ച് ചർച്ചകൾ നടക്കുന്നുണ്ടെന്ന് വിദേശകാര്യ മന്ത്രി അറിയിച്ചു. അമേരിക്കൻ സൈനിക വിമാനങ്ങൾ ഓസാൻ എയർ ബേസിൽ എത്തിയതായും മിസൈലുകൾ പശ്ചിമേഷ്യയിലേക്ക് കൊണ്ടുപോകാനുള്ള തയ്യാറെടുപ്പുകൾ പൂർത്തിയായതായും ദക്ഷിണ കൊറിയൻ സർക്കാർ വൃത്തങ്ങളെ ഉദ്ധരിച്ച് അന്താരാഷ്ട്ര മാധ്യമങ്ങൾ റിപ്പോർട്ട് ചെയ്യുന്നു.
Summary: South Korea and the United States are discussing the potential redeployment of U.S. Patriot missile defense systems from South Korea to the Middle East for the ongoing war against Iran.
