വാഷിങ്ടൺ: ഡോണൾഡ് ട്രംപ് ബ്രസീലിനെതിരെ ഏർപ്പെടുത്തിയ താരിഫ് യു.എസ്. സെനറ്റ് റദ്ദാക്കി. റിപ്പബ്ലിക്കൻ പാർട്ടിക്ക് വ്യക്തമായ ഭൂരിപക്ഷമുള്ള സെനറ്റിൽ, 48-നെതിരെ 52 വോട്ടുകൾ നേടിയാണ് പുതിയ നിയമനിർമ്മാണം പാസായത്. ഇത് ട്രംപിനും റിപ്പബ്ലിക്കൻ പാർട്ടിക്കും വലിയ തിരിച്ചടിയാണ്.(US Senate repeals tariffs against Brazil, 5 Republicans support, a setback for Trump)
ഭരണ അട്ടിമറി ശ്രമത്തിന്റെ പേരിൽ ബ്രസീൽ മുൻ പ്രസിഡന്റ് ജെയർ ബൊൾസനാരോയെ പ്രോസിക്യൂട്ട് ചെയ്യാനുള്ള ബ്രസീൽ സർക്കാരിന്റെ തീരുമാനത്തിൽ കുപിതനായാണ് ട്രംപ് ബ്രസീലിന് മേൽ അധിക തീരുവ പ്രഖ്യാപിച്ചത്.
ഈ നിർണ്ണായക വോട്ടെടുപ്പിൽ അഞ്ച് റിപ്പബ്ലിക്കൻ പാർട്ടി അംഗങ്ങൾ ബില്ലിനെ പിന്തുണച്ച് വോട്ട് ചെയ്തു. കാനഡയ്‌ക്കെതിരായ ട്രംപിന്റെ താരിഫുകളും മറ്റ് രാജ്യങ്ങൾക്കെതിരായ അദ്ദേഹത്തിന്റെ തീരുവകളും അവസാനിപ്പിക്കുന്നതിനുള്ള നിയമനിർമ്മാണ നടപടികൾ ഈ ആഴ്ച അവസാനം വോട്ടിനിടുമെന്നും പ്രതീക്ഷിക്കുന്നുണ്ട്. ഏപ്രിലിൽ, കാനഡയ്‌ക്കെതിരായ താരിഫുകൾ അവസാനിപ്പിക്കുന്നതിനുള്ള നിയമനിർമ്മാണം സെനറ്റ് പാസാക്കിയിരുന്നു.
ബ്രസീലിനെതിരായ താരിഫ് നടപടികൾ അവസാനിപ്പിക്കുന്നതിനുള്ള ബിൽ ഇനി റിപ്പബ്ലിക്കൻ പാർട്ടിക്ക് മേധാവിത്തമുള്ള യു.എസ്. പ്രതിനിധി സഭയിലേക്ക് എത്തും. എന്നാൽ, ഇവിടെ ഇത് തള്ളപ്പെടാനാണ് സാധ്യത. ബില്ലിനെതിരെ വോട്ട് ചെയ്യാൻ റിപ്പബ്ലിക്കൻ പാർട്ടി അംഗങ്ങളോട് പാർട്ടി ശക്തമായി ആവശ്യപ്പെടുന്നുണ്ട്. പ്രതിനിധി സഭയിൽ ബിൽ പാസാകുകയാണെങ്കിൽ അത് ട്രംപിന് കൂടുതൽ വലിയ തിരിച്ചടിയാകും.
ട്രംപിന്റെ താരിഫ് നടപടികൾ യു.എസ്. പൗരന്മാരെ ദോഷകരമായി ബാധിക്കുമെന്നും സാധനങ്ങളുടെ വില ഉയരാൻ കാരണമാകുമെന്നും വിമർശനങ്ങൾ ഉയർന്നിരുന്നു. അതേസമയം, കഴിഞ്ഞ 15 വർഷത്തിനിടെ ബ്രസീലുമായി 410 ബില്യൺ ഡോളറിന്റെ വ്യാപാര മിച്ചം യു.എസിനുണ്ടായതായി ബ്രസീലിയൻ ഉദ്യോഗസ്ഥർ ചൂണ്ടിക്കാട്ടുന്നു.
ഈ സംഭവങ്ങൾക്കിടെ, ട്രംപ് മലേഷ്യ, ജപ്പാൻ, ദക്ഷിണ കൊറിയ എന്നിവിടങ്ങളിൽ പര്യടനം നടത്തുകയാണ്. വ്യാഴാഴ്ച ചൈനീസ് പ്രസിഡന്റ് ഷി ജിൻപിങ്ങുമായും അദ്ദേഹം കൂടിക്കാഴ്ച നടത്തുന്നുണ്ട്.