വാഷിങ്ടൺ: വെനസ്വേലൻ പ്രസിഡന്റിനെ തടവിലാക്കാൻ ജനുവരി ഒന്ന് രാത്രി 10.46-നാണ് ഡോണൾഡ് ട്രംപ് അന്തിമ അനുമതി നൽകിയത്. തുടർന്ന് നടന്ന സംഭവങ്ങൾ അതീവ നാടകീയമായിരുന്നു.
സി.ഐ.എ (CIA), എൻ.എസ്.എ (NSA), എൻ.ജി.എ (NGA) എന്നീ ഇന്റലിജൻസ് ഏജൻസികളുടെ കൃത്യമായ വിവരങ്ങളുടെ അടിസ്ഥാനത്തിലാണ് നീക്കം നടന്നത്. എഫ്-35, എഫ്-22 ഉൾപ്പെടെയുള്ള അത്യാധുനിക യുദ്ധവിമാനങ്ങളും ഡ്രോണുകളും ദൗത്യത്തിൽ പങ്കാളികളായി. മഡൂറോയുടെ കൊട്ടാരസമാനമായ വസതിയുടെ മാതൃക (Replication) മുൻകൂട്ടി നിർമ്മിച്ചാണ് യു.എസ് സൈന്യം പരിശീലനം നടത്തിയത്. വസതിയിലെ അതിസുരക്ഷാ മുറികൾ തകർക്കാനുള്ള സംവിധാനങ്ങളും കരുതിയിരുന്നു.
പുലർച്ചെ 2.01-ന് കാരക്കാസിലെ മഡൂറോയുടെ വസതിക്ക് മുകളിലെത്തിയ സൈന്യം, വെറും 30 മിനിറ്റിനുള്ളിൽ മഡൂറോയെയും ഭാര്യ സിലിയ ഫ്ലോറസിനെയും പിടികൂടി. പ്രതിരോധിക്കാൻ ശ്രമിച്ച മഡൂറോയുടെ സുരക്ഷാ സേനയെ യു.എസ് കമാൻഡോകൾ നിഷ്പ്രഭരാക്കി.
മഡൂറോയെ സുരക്ഷിതമായി രാജ്യം കടത്താൻ മാത്രമായി വിവിധ ഭാഗങ്ങളിൽ നിന്ന് 150-ഓളം വിമാനങ്ങളാണ് പറന്നുയർന്നത്. ഈ നീക്കത്തിനിടെ ഏഴോളം സ്ഫോടനങ്ങൾ കാരക്കാസ് നഗരത്തിൽ മുഴങ്ങിക്കേട്ടു.
"ഇരട്ടുമൂടിയതും മാരകവും" (Dark and Deadly) എന്നാണ് ട്രംപ് ഈ ദൗത്യത്തെ വിശേഷിപ്പിച്ചത്. ചെറിയൊരു പാകപ്പിഴ പോലും ദൗത്യത്തെ പരാജയപ്പെടുത്താമായിരുന്ന സാഹചര്യത്തിൽ സൈന്യം പുലർത്തിയ കൃത്യതയെ ജനറൽ ഡാൻ കെയ്ൻ പ്രശംസിച്ചു.