വാഷിംഗ്ടൺ: ലാറ്റിൻ അമേരിക്കൻ രാജ്യമായ വെനസ്വേലയ്ക്ക് നേരെ ആദ്യമായി കരയാക്രമണം നടത്തി അമേരിക്ക. വെനസ്വേലൻ മണ്ണിലെ ലഹരിമരുന്ന് കടത്ത് കേന്ദ്രം ലക്ഷ്യമിട്ടായിരുന്നു ആക്രമണമെന്ന് അമേരിക്കൻ പ്രസിഡന്റ് ഡോണൾഡ് ട്രംപ് സ്ഥിരീകരിച്ചു. ബോട്ടുകളിലേക്ക് ലഹരിമരുന്ന് കയറ്റി അയക്കുന്ന പ്രധാന കേന്ദ്രമാണ് തകർത്തതെന്നും അവിടെ ശക്തമായ സ്ഫോടനം നടന്നതായും ട്രംപ് വ്യക്തമാക്കി.(US launches first ground attack on Venezuela, Trump says drug trafficking center destroyed)
ആക്രമണം നടത്തിയത് അമേരിക്കൻ സൈന്യമാണോ അതോ രഹസ്യാന്വേഷണ ഏജൻസിയായ സി.ഐ.എ (CIA) ആണോ എന്ന കാര്യം വെളിപ്പെടുത്താൻ പ്രസിഡന്റ് തയ്യാറായില്ല. എന്നാൽ വെനസ്വേലൻ അതിർത്തിക്കുള്ളിൽ കയറിയുള്ള ഈ നീക്കം മേഖലയിൽ വലിയ രാഷ്ട്രീയ ചർച്ചകൾക്ക് വഴിതുറന്നിരിക്കുകയാണ്. ആക്രമണത്തെക്കുറിച്ച് വെനസ്വേലൻ സർക്കാർ ഔദ്യോഗികമായി ഇതുവരെ പ്രതികരിച്ചിട്ടില്ല.
ലഹരിക്കടത്ത് തടയുക എന്ന ലക്ഷ്യത്തോടെ പസഫിക്കിലും കരീബിയൻ കടലിലും അമേരിക്ക ശക്തമായ നിരീക്ഷണം തുടരുകയാണ്. കഴിഞ്ഞ ദിവസം കിഴക്കൻ പസഫിക്കിൽ ഒരു ബോട്ടിന് നേരെയുണ്ടായ ആക്രമണത്തിൽ രണ്ട് പേർ കൊല്ലപ്പെട്ടതായി പ്രതിരോധ വകുപ്പ് അറിയിച്ചു. സെപ്റ്റംബർ 2 മുതൽ പസഫിക്, കരീബിയൻ മേഖലകളിലായി മയക്കുമരുന്ന് കടത്ത് ആരോപിച്ച് 29 ബോട്ടുകൾക്ക് നേരെ അമേരിക്ക ആക്രമണം നടത്തി. ഈ ആക്രമണ പരമ്പരകളിൽ ഇതുവരെ 105 പേർ കൊല്ലപ്പെട്ടതായാണ് റിപ്പോർട്ടുകൾ.
വെനസ്വേലൻ പ്രസിഡന്റ് നിക്കോളാസ് മഡൂറോയെ അധികാരത്തിൽ നിന്ന് പുറത്താക്കാനുള്ള അമേരിക്കയുടെ ആസൂത്രിത നീക്കമാണിതെന്ന് വെനസ്വേല നേരത്തെ ആരോപിച്ചിരുന്നു. ഇതിന്റെ ഭാഗമായി വെനസ്വേലയിലേക്കും പുറത്തേക്കും പോകുന്ന എണ്ണക്കപ്പലുകൾക്ക് അമേരിക്ക നിരോധനം ഏർപ്പെടുത്തിയിട്ടുണ്ട്.