മിനിയാപൊളിസ്: മിനസോട്ടയിലെ മിനിയാപൊളിസിൽ പ്രതിഷേധക്കാർക്കും നിരീക്ഷകർക്കും നേരെ അമേരിക്കൻ കുടിയേറ്റ വിരുദ്ധ ഏജന്റുമാർ സ്വീകരിക്കുന്ന കടുത്ത നടപടികൾക്ക് ഫെഡറൽ കോടതി നിയന്ത്രണം ഏർപ്പെടുത്തി (ICE Restrictions). സമാധാനപരമായി പ്രതിഷേധിക്കുന്നവർക്ക് നേരെ കണ്ണീർവാതകം പ്രയോഗിക്കുന്നതും അറസ്റ്റ് ചെയ്യുന്നതും കോടതി വിലക്കി. കുടിയേറ്റ വിരുദ്ധ ഏജന്റിന്റെ വെടിയേറ്റ് റെനി നിക്കോൾ ഗുഡ് എന്ന 37-കാരി കൊല്ലപ്പെട്ടതിനെത്തുടർന്ന് നഗരത്തിൽ സംഘർഷാവസ്ഥ നിലനിൽക്കെയാണ് നിർണ്ണായകമായ ഈ വിധി.
യുഎസ് ജില്ലാ ജഡ്ജി കേറ്റ് മെനെൻഡസ് പുറപ്പെടുവിച്ച 83 പേജുള്ള ഉത്തരവ് പ്രകാരം, ക്രമസമാധാനത്തിന് തടസ്സമാകാത്ത രീതിയിൽ പ്രതിഷേധിക്കുന്ന വ്യക്തികൾക്ക് നേരെ പ്രതികാര നടപടികൾ സ്വീകരിക്കാൻ ഫെഡറൽ ഏജന്റുമാർക്ക് അധികാരമില്ല. സമാധാനപരമായി പ്രതിഷേധിക്കുന്നവർക്കോ ദൃശ്യങ്ങൾ പകർത്തുന്നവർക്കോ നേരെ പെപ്പർ സ്പ്രേയോ മറ്റ് ആൾക്കൂട്ട നിയന്ത്രണ ആയുധങ്ങളോ ഉപയോഗിക്കരുത്. മതിയായ കാരണമില്ലാതെ വാഹനങ്ങൾ തടയുന്നതിനും കോടതി വിലക്കേർപ്പെടുത്തിയിട്ടുണ്ട്. തങ്ങളുടെ ഭരണഘടനാപരമായ അവകാശങ്ങൾ ലംഘിക്കപ്പെടുന്നു എന്ന് കാണിച്ച് ആറ് പ്രതിഷേധക്കാർ നൽകിയ ഹർജിയിലാണ് ഈ നടപടി.
നിലവിൽ മൂവായിരത്തോളം സായുധ ഏജന്റുമാരെയാണ് മിനിയാപൊളിസ് മേഖലയിൽ ട്രംപ് ഭരണകൂടം വിന്യസിച്ചിരിക്കുന്നത്. ജനുവരി 7-ന് ഏജന്റുമാരുടെ വെടിയേറ്റ് മൂന്ന് കുട്ടികളുടെ അമ്മയായ റെനി കൊല്ലപ്പെട്ടതോടെ പ്രാദേശിക ഭരണകൂടവും കേന്ദ്രവും തമ്മിലുള്ള ഭിന്നത രൂക്ഷമായിരുന്നു. റെനി ഭീകരപ്രവർത്തനം നടത്തിയെന്ന ഹോംലാൻഡ് സെക്യൂരിറ്റി സെക്രട്ടറി ക്രിസ്റ്റി നോമിന്റെ വാദങ്ങളെ മിനിയാപൊളിസ് മേയറും ഗവർണറും തള്ളിക്കളഞ്ഞു. ഈ സാഹചര്യത്തിൽ ഫെഡറൽ ഏജന്റുമാരെ നഗരത്തിൽ നിന്ന് പിൻവലിക്കണമെന്ന ആവശ്യം ശക്തമായിരിക്കുകയാണ്.
A federal judge in Minnesota has restricted U.S. immigration agents from using tear gas, pepper spray, and retaliatory arrests against peaceful protesters and observers in Minneapolis. The injunction follows a lawsuit and intense public outrage after an ICE agent fatally shot Renee Nicole Good, a 37-year-old mother, during a protest earlier this month. While the Trump administration has deployed nearly 3,000 agents to the region, local leaders continue to demand their withdrawal, citing reckless conduct and public safety concerns.